Haryanvi Bible
हाग्गै 1
परमेसवर का भवन बणाण का हुकम
दारा राजा के फारस पै राज्य के दुसरे साल के छठवें महिन्ने के पैहले दिन, यहोवा का यो वचन, हाग्गै भविष्यवक्ता के द्वारा, शालतीएल के बेट्टे जरुब्बाबेल कै धोरै, जो यहूदा का अधिपति1 था, अर यहोसादाक के बेट्टे यहोशू महायाजक के धोरै पोहच्या “सेनाओं का यहोवा हाग्गै तै न्यू कहवै सै, ये माणस कहवैं सैं के यहोवा का भवन बणाण का सही बखत न्ही आया सै।” फेर यहोवा का यो वचन हाग्गै भविष्यवक्ता कै द्वारा पोहच्या, “के थारे खात्तर अपणी छात आळे घरां म्ह रहण का बखत सै, जिब के यो भवन2 उजाड़ पड़या सै? इस करकै इब सेनाओं का यहोवा न्यू कहवै सै, अपणी-अपणी चाल-चलण पै ध्यान करो। थमनै घणा बोया लेकिन थोड़ा काटया; थम खाओ सो, पर पेट न्ही भरदा; थम पीओ सो, पर प्यास न्ही बुझदी; थम लत्ते पैहरो सो, पर गरम न्ही होन्दे; अर जो मजदूरी कमावै सै, वो अपणी मजदूरी की कमाई नै छेद आळी थैल्ली म्ह धरै सै।”
“सेनाओं का यहोवा थारे तै न्यू कहवै सै, अपणे-अपणे चाल चलण पै सोच्चो। पहाड़ पै चढ़ जाओ अर लाकड़ी ले आओ अर इस भवन नै बणाओ; अर मै उस ताहीं देखकै खुश होऊँगा, अर मेरी महिमा होवैगी, यहोवा का योए वचन सै। थमनै घणी फसल की उम्मीद राक्खी, पर देक्खो थोड़ी-ए सै; अर जिब थम उसनै घर ले आवै, फेर मन्नै उस ताहीं उड़ा दिया। सेनाओं के यहोवा की या वाणी सै, इसा क्यूँ होया? के इस करकै न्ही, के मेरा भवन उजाड़ पड़या सै अर थारे म्ह तै हर एक अपणे-अपणे घर नै बणाण खात्तर दौड़या चल्या जावै सै? इस कारण अकास तै ओस गिरणा अर धरती तै अन्न उपजणा दोन्नु बन्द सैं। अर मेरा हुकम सै धरती अर पहाड़ां पै, अर अन्न अर नये दाखमधु पै अर ताजे तेल पै, अर जो कुछ धरती तै उपजदा सै उसपै, अर माणसां अर घरेलू पशुआं पै, अर उनके मेहनत की सारी कमाई पै भी काळ पड्या सै।”
माणसां की आज्ञाकारिता
फेर शालतीएल के बेट्टे जरुब्बाबेल अर यहोसादाक के बेट्टे यहोशू महायाजक नै सारे बचे होए माणसां समेत अपणे परमेसवर यहोवा की बात मान्नी; अर जो वचन उनके परमेसवर यहोवा नै गुलाम्मी तै बोहड़े होए माणसां तै कहण कै खात्तर हाग्गै भविष्यवक्ता ताहीं भेज दिया था, उस ताहीं उननै मान लिया; अर माणसां नै यहोवा का भय मान्या। फेर यहोवा के दूत हाग्गै नै यहोवा तै हुकम पाकै उन माणसां तै न्यू कह्या, “यहोवा की या वाणी सै, मै थारे गैल सूं।”3 अर यहोवा नै शालतीएल के बेट्टे जरुब्बाबेल ताहीं जो यहूदा का अधिपति था, अर यहोसादाक के बेट्टे यहोशू महायाजक ताहीं, अर सारे बचे होए माणसां के मन ताहीं उभार कै उत्साह तै भर दिया के वे आकै अपणे परमेसवर, सेनाओं के यहोवा के भवन नै बणाण म्ह लागगे। यो दारा राजा के राज्य के दुसरे साल के छठवें महिन्ने के चौबीसवें दिन होया जिब राजा दारा राज करै था।
Source notes (3)
- Footnote अधिपति का मतलब औड़ै यो सै के इसनै फारस राजा के जरिए अधिकारी ठहराया गया सै ताके राज्य पै राज कर सके। या अधिपति इलाके के राजयां अर प्रधानां तै अलग थे अर वा सिधा राजा नै ही बखान करण के जिम्मेदार थे।
- Footnote परमेसवर का पवित्र भवन
- Footnote मत्ती 28:20
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.