Haryanvi Bible
उत्पत्ति 23
सारा की मौत अर दफनाया जाणा
सारा एक सौ सताईस साल की होगी; अर जिब सारा की इतणी उम्र होई; तो वा किर्यतअर्बा म्ह मरगी। यो तो कनान देश म्ह सै, अर हेब्रोन भी कुह्वावै सै। ज्यांतै अब्राहम सारा कै खात्तर रोण-पीटण नै ओड़ै गया। फेर अब्राहम लाश कै धोरै तै उठकै हित्तियाँ तै कहण लाग्या, “मै थारे बिचाळै मेहमान अर परदेशी सूं; मन्नै अपणे बीच म्ह कब्रिस्तान कै खात्तर इसी धरती द्यो जो मेरी खुद की हो जावै, ताके मै अपणे मरे होया नै दफनाकै अपणी आँख तै दूर करुँ।” हित्तियाँ नै अब्राहम तै कह्या, “हे म्हारै स्वामी, म्हारी सुण; तू तो म्हारै बिचाळै बड़ा प्रधान सै। म्हारी कब्रां म्ह तै जिसनै तू चाहवै उस म्ह अपणे मरे होया नै दफना; म्हारै म्ह तै कोए तन्नै अपणी कब्र कै लेण तै न्ही रोकैगा, के तू अपणे मरे होया नै उस म्ह दफनाण न्ही पावै।” फेर अब्राहम उठकै खड्या होया, अर हित्तियाँ कै स्याम्ही, जो उस देश के बासिन्दे थे, दण्डवत करकै कहण लाग्या, “जै थम चाहो सो के मै अपणे मरे होया नै दफनाकै अपणी आँख तै दूर करुँ, तो मेरी या बिनती सै, के सोहर के बेट्टे एप्रोन तै मेरै खात्तर बिनती करो, के वो अपणी मकपेला आळी गुफा, जो उसकी जगहां की हद पै सै; उसका पूरा दाम लेकै मन्नै दे दे, ताके वो थारै बिचाळै कब्रिस्तान कै खात्तर मेरी खुद की जगहां हो जावै।” एप्रोन तो हित्तियाँ कै बिचाळै ओड़ै बैठ्या होया था, इस करकै जितने हित्ती उसकै नगर कै फाटक तै होकै भित्तर जावै थे, उन सारया कै स्याम्ही उसनै अब्राहम तै जवाब दिया, “हे मेरै स्वामी, इसा न्ही, मेरी सुण; वो जगहां मै तन्नै दियुँ सूं, अर उस म्ह जो गुफा सै, वो भी मै तन्नै दियुँ सूं; अपणे जात्ति भाईयाँ कै स्याम्ही मै उस ताहीं तन्नै दियुँ सूं; आखर म्ह अपणे मरे होया नै कब्र म्ह राक्ख।” फेर अब्राहम नै उस देश के बाशिंद्यां कै स्याम्ही दण्डवत करया। अर उनकै1 सुणदे होए एप्रोन तै कह्या, “जै तू इसा चावै, तो मेरी सुण उस जगहां की जो कीमत हो, वो मै देणा चाऊँ सूं; उसनै मेरै तै ले ले, फेर मै अपणे मुर्दयां नै ओड़ै दफनाऊँगा।” एप्रोन नै अब्राहम तै यो उत्तर दिया, “हे मेरे स्वामी मेरी बात सुण; उस जगहां की कीमत तो च्यार सौ शेकेल2 चाँदी सै; पर मेरै अर तेरे बिचाळै म्ह या के सै? अपणे मुर्दे नै कब्र म्ह दफना।” अब्राहम नै एप्रोन की मानकै उस ताहीं उतणी चाँदी तौल दी, जितना उसनै हित्तियाँ कै सुणदे होए कह्या था, यानिके च्यार सौ इसे शेकेल जो व्यापारियाँ म्ह चाल्या करदे।
इस तरियां एप्रोन की जगहां, जो मम्रे कै स्याम्ही की मकपेला म्ह थी, वो गुफा सुधा, अर उन सारया दरखतां सुधा भी जो उस म्ह अर उसकै चौगरदे नै हद पै थे, जितने हित्ती उसकै नगर के फाटक तै होकै भित्तर जावै थे, उनकै स्याम्ही अब्राहम के अधिकार म्ह पूरी तरियां तै आगी। इसकै बाद अब्राहम नै अपणी घरआळी सारा ताहीं उस मकपेला आळी जगहां की गुफा म्ह जो मम्रे कै यानिके हेब्रोन कै स्याम्ही कनान देश म्ह सै, माट्टी दी। इस तरियां वा जगहां गुफा सुधा, जो उस म्ह थी, हित्तियाँ की ओड़ तै कब्रिस्तान कै खात्तर अब्राहम कै अधिकार म्ह पूरी तरियां तै आगी।
Source notes (2)
- Footnote उनकै सारे हित्तियाँ कै
- Footnote च्यार सौ शेकेल च्यार किलो छः सौ ग्राम चाँदी
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.