Haryanvi Bible
उत्पत्ति 13
अब्राम का कनान बोहड़ना
फेर अब्राम अपणी घरआळी, अर अपणी सारी सम्पत्ति लेकै, लूत नै भी गैल लिए होए, मिस्र देश नै छोड़कै कनान के दक्षिण देश म्ह आया। अब्राम भेड़-बकरी, गां-बळध, अर सोन्ने-चाँदी का घणा धनी था। फेर वो दक्षिण देश तै चालकै, बेतेल कै धोरै उस्से जगहां पै पोहच्या, जड़ै पैहल्या उसनै अपणा तम्बू खड्या करया था, जो बेतेल अर आई नगर कै बीच म्ह सै। या वाए जगहां सै जड़ै उसनै पैहल्या वेदी बणाई थी, अर ओड़ै अब्राम नै फेर यहोवा तै प्रार्थना करी।
अब्राम अर लूत का न्यारा होणा
लूत कै धोरै भी, जो अब्राम कै गैल चाल्या करदा, भेड़-बकरी, गां-बळध, अर तम्बू थे। इस करकै उस देश म्ह उन दोनुआं खात्तर जगहां थोड़ी पड़गी थी ज्यांतै वे कठ्ठे न्ही रह सके क्यूँके उनकै धोरै घणी सम्पत्ति थी ज्यांतै वे कठ्ठे न्ही रह सके। इस करकै अब्राम, अर लूत के पाळीयाँ म्ह झगड़ा होग्या। उस बखत कनानी, अर परिज्जी माणस, उस देश म्ह रहवैं थे।
फेर अब्राम लूत तै कहण लाग्या, “मेरै अर तेरै बीच, अर मेरे अर तेरे पाळीयाँ कै बीच म्ह झगड़ा ना होण पावै; क्यूँके हम भाई-बन्धु सां। के यो सारा देश तेरै स्याम्ही न्ही सै? इस करकै मेरै तै न्यारा हो ज्या, जै तू ओळी ओड़ जावै तो मै सोळी ओड़ जाऊँगा; अर जै तू सोळी ओड़ जावै तो मै ओळी ओड़ जाऊँगा।” फेर लूत नै निगांह ठाकै, यरदन नदी कै धोरै आळी सारी तराई ताहीं देख्या के वा सारी सिंची होई सै। जिब तक यहोवा नै सदोम अर गमोरा ताहीं नाश न्ही करया था, जिब तक सोअर के राह तक वा तराई यहोवा की वाटिका, अर मिस्र देश की ढाळ उपजाऊ थी। इस करकै लूत अपणे खात्तर यरदन नदी की सारी तराई नै चुण कै पूरब कान्ही चाल्या, अर वे एक दुसरे तै न्यारे होगे। अब्राम तो कनान देश म्ह रह्या, पर लूत उस तराई के नगरां म्ह रहण लाग्या; अर अपणा तम्बू सदोम नगर कै धोरै खड्या करया। सदोम नगर के माणस यहोवा की निगांह म्ह बड़े दुष्ट अर पापी थे।
अब्राम का हेब्रोन म्ह जाणा
जिब लूत अब्राम तै न्यारा होग्या फेर उसकै बाद यहोवा नै अब्राम तै कह्या, “आँख उठा जिस जगहां पै तू सै ओड़ै तै उत्तर-दक्षिण, पूर्व-पश्चिम, च्यांरु ओड़ निगांह कर। क्यूँके जितनी धरती तन्नै दिखाई देवै सै, उस सारी धरती नै मै तेरै तै अर तेरी पीढ़ी नै युग-युग कै खात्तर दियुँगा। अर मै तेरी पीढ़ी नै धरती की धूळ के कणा की ढाळ घणे करुँगा, उरै तक के जो कोए धरती की धूळ के कणा नै गिण सकैगा वोए तेरी पीढ़ी नै भी गिण सकैगा। उठ, इस देश की लम्बाई अर चौड़ाई म्ह घुम-फिर; क्यूँके मै वा तेरे तै देऊँगा।” इसकै बाद अब्राम अपणा तम्बू ठाकै, मम्रे के बांज दरखतां कै बिचाळै जो हेब्रोन म्ह थे, जाकै रहण लाग्या, अर ओड़ै भी उसनै यहोवा की एक वेदी बणाई।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.