Haryanvi Bible
उत्पत्ति 10
नूह की वंशावली
नूह के बेट्टे शेम, हाम अर येपेत थे; उनकै बाळक जल-प्रलय कै बाद पैदा होए: उनकी पीढ़ी इस तरियां सै।
येपेत के वंशज
येपेत कै बेट्टे1: गोमेर, मागोग, मादै, यावान, तूबल, मेशेक अर तीरास होए। अर गोमेर कै बेट्टे: अश्कनज, रीपत अर तोगर्मा होए। अर यावान के वंश म्ह एलीशा अर तर्शीश, अर कित्ती, अर दोदानी माणस होए। इनकी पीढ़ी दुसरी जात्तां कै द्वीपां के परदेसां म्ह इसे बँटगे, के वे न्यारी-न्यारी भाषा, कुलां, अर जात्तां कै मुताबिक अलग-अलग होगे।
हाम के वंशज
फेर हाम कै बेट्टे: कूश, मिस्र, पूत अर कनान होए। अर कूश के बेट्टे सबा, हवीला, सबता, रामाह, अर सब्तका होए। अर रामाह के बेट्टे शेबा अर ददान होए। कूश के वंश म्ह निम्रोद भी होया; धरती पै पैहला वीर वोए होया सै। वोए यहोवा की निगांह म्ह ताकतवर शिकार खेलण आळा ठहरया, इसतै या कहावत चाल्ली सै; “निम्रोद के समान यहोवा की निगांह म्ह ताकतवर शिकार खेलण आळा।” उसके राज्य की शरुआत शिनार देश म्ह, बाबेल, एरेख, अक्कद, अर कलने तै होई। उस देश म्ह तै वो लिकड़कै अश्शूर देश म्ह गया, अर नीनवे, रहोबोतीर अर कालह, अर नीनवे अर कालह कै बीच म्ह रेसेन नगर ताहीं भी बसाया; सबतै बड़ा नगर योए सै। मिस्र देश की पीढ़ी म्ह लूदी, अनामी, लहाबी, नप्तूही, अर पत्रूसी, कसलूही, अर कप्तोरी माणस लिकड़े, कसलूहियाँ म्ह तै तो पलिश्ती माणस लिकड़े।
कनान के वंश म्ह उसका जेठ्ठा बेट्टा सीदोन, फेर हित्त, यबूसी, एमोरी, गिर्गाशी, हिब्बी, अर्की, सीनी, अर्वदी, समारी, अर हमाती माणस भी होए; फेर कनानियाँ के कुल भी फैलगे। अर कनानियाँ की हद सीदोन तै लेकै गरार प्रान्त के राह तै होकै गाज़ा तक अर फेर सदोम अर गमोरा अर अदमा अर सबोयीम के राह तै होकै लाशा तक होया। हाम के वंश म्ह तै येए लिकड़े; अर ये न्यारे-न्यारे कुलां, भाषा, देशां, अर जात्तां कै मुताबिक न्यारे-न्यारे होगे।
शेम के वंशज
फेर शेम, जो सारे एबेरवंशियाँ का पूर्वज होया, अर जो येपेत का जेठ्ठा भाई था, उसकै भी बेट्टे पैदा होए। शेम के बेट्टे: एलाम, अश्शूर, अर्पक्षद, लूद अर अराम होए। अराम के बेट्टे: ऊस, हूल, गेतेर अर मश होए। अर अर्पक्षद नै शेलह ताहीं, अर शेलह नै एबेर ताहीं जन्म दिया। अर एबेर के दो बेट्टे पैदा होए, एक का नाम पेलेग इस करकै धरया गया के उसकै दिनां म्ह धरती बँटगी, अर उसके भाई का नाम योक्तान था। अर योक्तान नै अल्मोदाद, शेलेप, हसर्मावेत, यारह, हदोराम, ऊजाल, दिक्ला, ओबाल, अबीमाएल, शेबा, ओपीर, हवीला, अर योबाब ताहीं जन्म दिया: येए सारे योक्तान के बेट्टे होए। इनकै रहण की जगहां मेशा प्रान्त तै लेकै सपारा प्रान्त, जो पूरब दिशा म्ह एक पहाड़ सै, उसकै राह तक होया। शेम के बेट्टे येए होए; अर ये न्यारे-न्यारे कुलां, भाषा, देशां अर जात्तां के मुताबिक न्यारे-न्यारे होगे।
नूह के बेट्याँ के कुण्बे येए सैं; अर उनकी जात्तां कै मुताबिक उनकी पीढ़ी येए सैं; अर जल-प्रलय कै बाद धरती की सारी जात इन्हे म्ह तै होकै बँटगी।
Source notes (1)
- Footnote येपेत कै बेट्टे येपेत के बेट्यां कै नाम जात अर देश के झुण्ड के रूप म्ह जाणे जावैं सै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.