Haryanvi Bible
एज्रा 7
एज्रा का यरुशलेम म्ह भेज्या जाणा
कई साल कै बाद यानिके फारस के राजा अर्तक्षत्र के दिनां म्ह, एज्रा बाबेल तै यरुशलेम म्ह गया। वो सरायाह का बेट्टा था। सरायाह अजर्याह का बेट्टा था, अजर्याह हिल्किय्याह का, हिल्किय्याह शल्लूम का, शल्लूम सादोक का, सादोक अहीतूब का, अहीतूब अमर्याह का, अमर्याह अजर्याह का, अजर्याह मरायोत का, मरायोत जरहयाह का, जरहयाह उज्जी का, उज्जी बुक्की का, बुक्की अबीशू का, अबीशू पीनहास का, पीनहास एलीआजर का अर एलीआजर हारुन महायाजक का बेट्टा था। योए एज्रा मूसा की व्यवस्था कै बारै म्ह जिस ताहीं इस्राएल के परमेसवर यहोवा नै दी थी, माहिर शास्त्री था। उसपै उसके परमेसवर यहोवा की कृपादृष्टि रही, इस कारण राजा नै उस ताहीं मुँह मांग्या वर दे दिया।
कुछ इस्राएली, अर याजक लेवीय, गवैयां, अर द्वारपाल अर मन्दर के सेवकां म्ह तै कुछ माणस अर्तक्षत्र राजा के सातवें साल म्ह यरुशलेम गए। एज्रा राजा राज्यकाल के सातवें साल के पाँचवें महिन्ने म्ह यरुशलेम पोहच्या। पैहले महिन्ने के पैहले दिन नै वो बाबेल तै चाल पड़या, अर उसके परमेसवर की कृपादृष्टि उसपै रही, इस कारण पाँचवें महिन्ने के पैहले दिन वो यरुशलेम म्ह पोहच्या। क्यूँके एज्रा नै यहोवा की व्यवस्था का अर्थ जाण लेण, अर उसकै मुताबिक चालण, अर इस्राएल म्ह विधि अर नियम सिखाण खात्तर अपणा मन लगाया था। जो चिट्ठी राजा अर्तक्षत्र नै एज्रा याजक अर शास्त्री तै दी थी जो यहोवा के हुकमां के वचनां का, अर उसकी इस्राएलियाँ म्ह चलाई होई विधियाँ का शास्त्री था, उसकी नकल या सै; एज्रा याजक कै नाम जो सुर्ग के परमेसवर की व्यवस्था का पूर्ण शास्त्री सै, उसनै अर्तक्षत्र महाराजाधिराज की और तै। मै यो हुकम दियुँ सूं, के मेरे राज्य म्ह जितने इस्राएली अर उनके याजक अर लेवीय अपणी इच्छा तै यरुशलेम जाणा चाहवै, वे तेरै गैल जा सकै सै।
“तू तो राजा अर उसके सात मंत्रियाँ की और तै ज्यांतै भेज्या जावै सै, के अपणे परमेसवर की व्यवस्था कै बारै म्ह जो तेरै धोरै सै, यहूदा अर यरुशलेम की हालत जाण लेवै, अर जो चाँदी-सोन्ना, राजा अर उसके मंत्रियाँ नै इस्राएल के परमेसवर ताहीं जिसका निवास यरुशलेम म्ह सै, अपणी इच्छा तै दिया सै, अर जितना चाँदी-सोन्ना सारे बाबेल प्रान्त म्ह तन्नै मिलैगा, अर जो कुछ माणस अर याजक अपणी इच्छा तै अपणे परमेसवर के भवन कै खात्तर जो यरुशलेम म्ह सै देवैंगे, उसनै ले जावै। इस कारण तू उस रपिये तै फुर्ती कै गैल बळध, मिंढे अर मेम्ने उनके लायक अन्नबलि अर अर्घ की चिज्जां समेत मोल लिये अर उस वेदी पै चढ़ाईये, जो थारे परमेसवर के यरुशलेम आळे भवन म्ह सै। अर जो चाँदी-सोन्ना बच्या रहवै, उसतै जो कुछ तन्नै अर तेरे भाईयाँ नै ठीक लाग्गै, वोए अपणे परमेसवर की इच्छा कै मुताबिक करिये। तेरे परमेसवर के भवन की उपासना खात्तर जो बरतन तन्नै सौंपे जावैं सैं, उननै यरुशलेम के परमेसवर कै स्याम्ही दे दिये। इनतै घणा जो कुछ तन्नै अपणे परमेसवर के भवन कै खात्तर जरूरी जाणकै देणा पड़ै, वो राज खजान्ने म्ह तै दे दिए।”
“मै अर्तक्षत्र राजा यो हुकम दियुँ सूं, के थम महानद के पार के सारे खजांचियां तै जो कुछ एज्रा याजक, जो सुर्ग के परमेसवर की व्यवस्था का शास्त्री सै, थारे तै चाहवै, वो फुर्ती कै गैल करया जावै। यानिके सौ किक्कार तक चाँदी, सौ कोर तक गेहूँ, सौ बत तक दाखमधु, सौ बत तक तेल अर नूण जितना चाहिये उतणा दिया जावै। जो-जो हुकम सुर्ग के परमेसवर की और तै मिलै, ठीक उस्से कै मुताबिक सुर्ग के परमेसवर के भवन कै खात्तर करया जावै, राजा अर राजकुमारां के राज्य पै परमेसवर का छो क्यूँ भड़कण पावै। फेर हम थमनै चिता देवां सां, के परमेसवर के उस भवन के किसे याजक, लेवीय, गवैयां, द्वारपाल, नतीन या और किसे सेवक तै कर, चुंगी, या राहदारी लेण का हुकम न्ही सै।”
“फेर हे एज्रा! तेरे परमेसवर तै मिली होई बुद्धि कै मुताबिक जो तेरे म्ह सै, न्यायियाँ अर विचार करण आळयां नै ठहराया जो महानद के पार रहण आळे उन सारे माणसां म्ह जो तेरे परमेसवर की व्यवस्था जाणदे हों न्याय करया करैं; अर जो-जो उननै ना जाणदे हों, उननै थम सिखाया करो। जो कोए तेरे परमेसवर की व्यवस्था अर राजा की व्यवस्था नै ना मान्नै, उसनै फुर्ती तै सजा दी जावै, चाहे प्राणदण्ड, चाहे देश लिकाड़ा, चाहे माल जप्त करया जाणा, चाहे कैद करियो।” धन्य सै म्हारे पितरां का परमेसवर यहोवा, जिसनै इसी मनसा राजा के मन म्ह पैदा करी सै, के यरुशलेम म्ह यहोवा के भवन नै सँवारै, अर मेरे पै राजा अर उसके मंत्रियाँ अर राजा के सारे बड़े हाकिमां ताहीं दयालु करया। मेरे परमेसवर यहोवा की कृपादृष्टि जो मेरै पै होई, इसकै मुताबिक मन्नै हियाव बाँध्या, अर इस्राएल म्ह तै खास माणसां ताहीं कठ्ठा करया, ताके वे मेरै गैल चाल्लै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.