Haryanvi Bible
एज्रा 10
यहूदियाँ का गैरजात की जनानियाँ ताहीं दूर करणा
जिब एज्रा परमेसवर के भवन कै स्याम्ही पड़या, रोन्दा होया प्रार्थना अर पाप का अंगीकार करण लागरया था, फेर इस्राएल म्ह तै आदमी, जनान्नी अर बच्चयां की एक भोत बड़ी मण्डळी उसकै धोरै कठ्ठी होई; अर माणस बिलख-बिलख कै रोण लागरे थे। फेर यहीएल का बेट्टा शकन्याह जो एलाम के वंश का था, एज्रा तै कहण लाग्या, “हमनै इस देश के माणसां म्ह तै गैरजात की जनानियाँ तै ब्याह करकै अपणे परमेसवर तै बिश्वासघात तो करया ए सै, पर इस हालत म्ह भी इस्राएल कै खात्तर आस सै। इब हम अपणे परमेसवर तै यो करार करां, के हम अपणे प्रभु की सलाह अर अपणे परमेसवर के हुकम सुणकै भय मान्नण आळयां की सलाह कै मुताबिक इसी सारी जनानियाँ नै अर उनके बच्चयां नै दूर करां; अर नियम-कायदा कै मुताबिक काम करया जावै। तू उठ, क्यूँके यो काम तेराए सै, अर हम तेरै गैल सां; ज्यांतै होसला करकै इस काम म्ह लाग ज्या।” फेर एज्रा उठ्या, अर याजकां नै, लेवियाँ अर सारे इस्राएलियाँ के प्रधानां तै या कसम खुआई के हम इस्से वचन कै मुताबिक करागें; अर उननै उसीए कसम खाई।
फेर एज्रा परमेसवर के भवन कै स्याम्ही तै उठ्या, अर एल्याशीब के बेट्टे यहोहानान की कोठड़ी म्ह गया, अर ओड़ै पोहचकै ना तो रोट्टी खाई, ना पाणी पिया, क्यूँके वो गुलाम्मी म्ह तै लिकड़े होयां के बिश्वासघात कै कारण शोक करदा रह्या। फेर उननै यहूदा अर यरुशलेम म्ह रहणआळे गुलाम्मी म्ह तै आए होए सारे माणसां म्ह यो प्रचार कराया, के थम यरुशलेम म्ह कठ्ठे हो; अर जो कोए हाकिमां अर पुरनियां की सलाह ना मान्नैगा अर तीन दिन कै भित्तर ना आवै तो उसकी सारी धन-सम्पत्ति नाश करी जावैगी अर वो आप गुलाम्मी तै आए होयां की सभा तै लिकाड़ दिया जावैगा।
फेर यहूदा अर बिन्यामीन के सारे माणस तीन दिन कै भित्तर यरुशलेम म्ह कठ्ठे होए; यो नौवें महिन्ने1 के बीसवें दिन म्ह होया; अर सारे माणस परमेसवर के भवन के चौक म्ह उस बारै म्ह अर भारी बरसात के मारे काँम्बदे होए बैठ्ठे रहे। फेर एज्रा याजक खड़या होकै, उनतै कहण लाग्या, “थमनै बिश्वासघात करकै गैरजात की जनान्नी ब्याह ली, अर इसतै इस्राएल का दोष बढ़ ग्या सै। सो इब अपणे पितरां के परमेसवर यहोवा कै स्याम्ही अपणा पाप मान ल्यो, अर उसकी इच्छा पूरी करो, अर इस देश के माणसां तै अर गैरजात की जनानियाँ तै न्यारे हो जाओ2।” फेर पूरी मण्डळी के माणसां नै ऊँच्चे शब्द तै कह्या, “जिसा तन्नै कह्या सै, उसाए हम करागें सै। पर हम घणे माणस सां, अर बरसात का बखत सै, अर हम बाहर खड़े न्ही रह सकदे, अर यो एक-दो दिन का काम कोनी, क्यूँके हमनै इस बात म्ह बड़ा पाप करया सै। सारी मण्डळी की और तै म्हारे हाकिम ठहराए जावैं; अर जिब ताहीं म्हारे परमेसवर का भड़क्या होया छो म्हारे तै दूर ना हो, अर यो काम पूरा ना हो जावै, तब ताहीं म्हारे नगरां के जितने निवासियां नै गैरजात की जनान्नी ब्याह ली हों, वे तय करे होए बखतां पै आया करैं, अर उनके गैल एक नगर के पुरनिये अर न्यायी आवैं।” इसके खिलाफ सिर्फ असाहेल के बेट्टे योनातान अर तिकवा के बेट्टे यहजयाह खड़े होए, अर मशुल्लाम अर शब्बतै लेवियाँ नै उनकी मदद करी।
पर गुलाम्मी तै आए होए माणसां नै उसाए करया। फेर एज्रा याजक अर पितरां के घरान्यां के कितणे खास आदमी अपणे-अपणे पितरां के घरान्ने कै मुताबिक अपणे सारे नाम लिखवा कै अलग करे गए, अर दसवें महिन्ने के पैहले दिन तै इस बात की तहकीकात कै खात्तर बैठ्ठे3। अर पैहले महिन्ने के पैहले दिन तक उननै उन सारे माणसां की जाँच पूरी कर ली, जिननै गैर जात की जनानियाँ ताहीं ब्याह लिया था। याजकां की सन्तानां म्ह तै; ये जन पाए गए जिननै गैरजात की जनानियाँ तै ब्याह कर लिया था: येशुअ के बेट्टे, योसादाक के बेट्टे, अर उसके भाई मासेयाह, एलीएजेर, यारीब अर गदल्याह। इन्हानै हाथ मारकै वचन दिया, के हम अपणी गैर की जात जनानियाँ नै लिकाड़ देवांगे, अर उननै दोषी ठहरकै, अपणे-अपणे दोष कै कारण एक-एक मिंढा बलि करया। इम्मेर की सन्तान म्ह तै हनानी अर जबद्याह। हारीम की सन्तान म्ह तै मासेयाह, एलिय्याह, शमायाह, यहीएल अर उज्जियाह। पशहूर की सन्तान म्ह तै एल्योएनै, मासेयाह, इश्माएल, नतनेल, योजाबाद अर एलासा।
फेर लेवियाँ म्ह तै योजाबाद, शिमी, केलायाह जो कलीता कुह्वावै सै, पतह्याह, यहूदा अर एलीएजेर। गवैयां म्ह तै एल्याशीब; अर द्वारपालां म्ह तै शल्लूम, तेलेम अर ऊरी।
इस्राएल कै बिचाळै म्ह तै परोश की सन्तान म्ह रम्याह, यिज्जियाह, मल्किय्याह, मिय्यामीन, एलीआजर, मल्किय्याह अर बनायाह। एलाम की सन्तान म्ह तै मत्तन्याह, जकर्याह, यहीएल अब्दी, यरेमोत अर एलिय्याह। अर जत्तू की सन्तान म्ह तै एल्योएनै, एल्याशीब, मत्तन्याह, यरेमोत, जाबाद अर अज़ीज़ा। बेबै की सन्तान म्ह तै यहोहानान, हनन्याह, जब्बै अर अतलै। बानी की सन्तान म्ह तै मशुल्लाम, मल्लूक, अदायाह, याशूब, शाल अर यरामोत। पहत्मोआब की सन्तान म्ह तै अदना, कलाल, बनायाह, मासेयाह, मत्तन्याह, बसलेल, बिन्नूई अर मनश्शे। हारीम की सन्तान म्ह तै एलीएजेर, यिश्शियाह, मल्किय्याह, शमायाह, शिमोन; बिन्यामीन, मल्लूक अर शेमर्याह। हाशूम की सन्तान म्ह तै; मत्तनै, मत्तत्ता, जाबाद, एलीपेलेत, यरेमै, मनश्शे अर शिमी। अर बानी की सन्तान म्ह तै; मादै, अम्राम, ऊएल; बनायाह, बेदयाह, कलूही; वन्याह, मरेमोत, एल्याशीब; मत्तन्याह, मत्तनै, यासू; बानी, बिन्नूई, शिमी; शेलेम्याह, नातान, अदायाह; मक्नदबै, शाशै, शारै; अजरेल, शेलेम्याह, शेमर्याह; शल्लूम, अमर्याह अर यूसुफ। नबो की सन्तान म्ह तै; यीएल, मत्तित्याह, जाबाद, जबीना, यद्दई, योएल अर बनायाह। इन सारे माणसां नै गैरजात की जनान्नी ब्याह ली थी, अर घण्या की जनानियाँ तै छोरे भी पैदा होए थे।
Source notes (3)
- Footnote इस महिन्ने ताहीं किसलेव के नाम तै भी जाण्या जावै सै। यो दिसम्बर के तीसरे सप्ताह म्ह सर्दियांँ कै बिचाळै बारिस के मौसम म्ह था
- Footnote लेवी 20:22-26
- Footnote सभा कै दस दिन बाद, दसवें महिन्ने के पैहले दिन तै काम शरु होया। यो तेबेत का महिन्ना था, शायद 29 दिसम्बर 458 ई. पू.
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.