Haryanvi Bible
निर्गमन 4
मूसा कै खात्तर अदभुत निशान
फेर मूसा नै जवाब दिया, “अर जै वे मेरै पै बिश्वास न्ही करैगें अर ना मेरी सुणैगें, बल्के कहवैगें, ‘यहोवा नै तेरे तै दर्शन कोनी दिया।’” “फेर के करुँ?,” यहोवा नै उसतै कह्या, “तेरे हाथ म्ह या के सै?” वो बोल्या, “एक लाठ्ठी सै।” फेर यहोवा नै कह्या, “उसनै धरती पै गेर दे।” जिब उसनै उस ताहीं धरती पै गेरया तो वा साँप बणगी, अर मूसा उसकै स्याम्ही तै हट ग्या। फेर यहोवा नै मूसा तै कह्या, “हाथ बढ़ाकै उसकी पूँछ पकड़ ले, ताके वे माणस बिश्वास करै के थारे पूर्वजां कै परमेसवर यानिके अब्राहम के परमेसवर, इसहाक के परमेसवर, अर याकूब के परमेसवर, यहोवा नै तेरे तै दर्शन दिया सै।” जिब उसनै हाथ बढ़ाकै उस ताहीं पकड्या फेर वा उसकै हाथ म्ह लाठ्ठी बणगी।
फेर यहोवा नै उसतै फेर कह्या, “अपणा हाथ छात्ती पै धरकै ढक।” आखर म्ह उसनै अपणा हाथ छात्ती पै धरकै ढक लिया; फेर जिब उसनै लिकाड़या तो के देख्या, के उसका हाथ कोढ़ कै कारण बर्फ की ढाळ सफेद होग्या सै। फेर यहोवा नै कह्या, “अपणा हाथ छात्ती पै फेर धरकै ढक।” अर उसनै अपणा हाथ छात्ती पै धरकै ढक लिया; अर जिब उसनै उस ताहीं छात्ती पै तै लिकाड़या फेर के देख्या के वो फेर सारी देह की तरियां ठीक होग्या। फेर यहोवा नै कह्या, “जै वे तेरी बात पै बिश्वास न्ही करैं, अर पैहले निशान नै न्ही मान्नै, तो दुसरे निशान पै बिश्वास करैगें। अर जै वे इन दोन्नु निशान्नां पै बिश्वास ना करै, अर तेरी बात नै न्ही मान्नै, तो तू नील नदी म्ह तै कुछ पाणी लेकै सूक्खी धरती पै गेरिये; अर जो पाणी तू नदी तै लिकाड़ैगा वो सूक्खी धरती पै लहू म्ह बदल जावैगा।”
मूसा नै यहोवा तै कह्या, “हे मेरे प्रभु, मै बोल्लण म्ह माहिर कोनी, ना तो पैहल्या था, अर ना जिब तै तू अपणे दास तै बात करण लाग्या; मै तो मुँह अर जीभ का भद्दा सूं।” यहोवा नै उसतै कह्या, “माणस का मुँह किसनै बणाया सै? अर माणस ताहीं गूँगा, या बैहरा, या देखणआळा, या आन्धा, मुझ यहोवा नै छोड़ और कौण बणावै सै? इब जा, मै तेरे ताहीं जो कहणा होवैगा वो तन्नै सिखान्दा जाऊँगा।” उसनै कह्या, “हे मेरे प्रभु, तू किसे और माणस नै भेज।” फेर यहोवा का छो मूसा पै भड़क्या अर उसनै कह्या, “के तेरा भाई लेवीय हारुन कोनी सै? मन्नै बेरा सै के वो बोलण म्ह माहिर सै, अर वो तेरे तै मुलाकात करण खात्तर लिकड़ भी गया सै अर तेरे ताहीं देखकै मन म्ह घणा खुश होवैगा। इस करकै तू उसनै ये बात सिखाईये; अर मै उसकै मुँह की गैल अर तेरे मुँह की गैल होकै जो कुछ थमनै करणा होवैगा वो थारै ताहीं सिखान्दा जाऊँगा। वो तेरी ओड़ तै माणसां तै बात करया करैगा; वो तेरे खात्तर मुँह अर तू उसकै खात्तर परमेसवर ठहरैगा। अर तू इस लाठ्ठी नै हाथ म्ह लिये जा, अर इस्से तै इन चमत्कारी निशान्ना नै दिखाईये।”
मूसा का मिस्र देश म्ह आणा
फेर मूसा अपणे ससुर यित्रो कै धोरै आया अर उसतै कह्या, “मन्नै बिदा कर, के मै मिस्र देश म्ह रहण आळे अपणे भाईयाँ कै धोरै जाकै देक्खूँ के वे इब ताहीं जिन्दे सैं या न्ही।” यित्रो नै कह्या, “राज्जी-खुशी तै जा।” अर इसा होया जिब मूसा मिद्यान देश म्ह था तो यहोवा नै मूसा तै कह्या, “मिस्र म्ह जा; क्यूँके जो माणस तेरे जान कै दुश्मन थे वे सारे मरगे सैं।” फेर मूसा परमेसवर की लाठ्ठी नै हाथ म्ह लिये अर अपणी घरआळी अर बेट्याँ नै गधे पै चढ़ाकै मिस्र देश की ओड़ वापस आया।
अर यहोवा नै मूसा तै कह्या, “जिब तू मिस्र देश म्ह पोहचै तो चौक्कस हो जाईये, अर जो चमत्कार मन्नै तेरे बस म्ह करे सैं उन सारया नै फिरौन तै दिखाईये; पर मै उसकै मन नै ढीठ करुँगा, अर वो मेरी प्रजा नै जाण न्ही देवैगा। अर तू फिरौन तै कहिये, ‘यहोवा न्यू कहवै सै, के इस्राएल मेरा बेट्टा बल्के मेरा जेठ्ठा बेट्टा सै, अर मन्नै जो तेरे तै कह दिया सै, के मेरे बेट्टे नै जाण दे के वो मेरी सेवा करै; अर तन्नै इब तक उस ताहीं जाण न्ही दिया, इस करकै मै इब तेरे बेट्टे बल्के तेरे जेठ्ठे बेट्टे नै घात करुँगा।’”
फेर इसा होया के राह म्ह सराय म्ह यहोवा नै मूसा तै मुलाकात करकै उस ताहीं मार देणा चाह्या। फेर मूसा की घरआळी सिप्पोरा नै एक तेज चकमक पत्थर लेकै अपणे बेट्टे की खलड़ी ताहीं काट दिया, अर मूसा कै पायां पै न्यू कहकै बगा दिया, “पक्का तू लहू बहाण आळा मेरा पति सै।” फेर यहोवा नै उस ताहीं छोड़ दिया। अर उस्से बखत खतने कै कारण वो बोल्ली, “तू लहू बहाण आळा पति सै।”
मूसा अर हारुन की मुलाकात
फेर यहोवा नै हारुन तै कह्या, “मूसा तै मुलाकात करण खात्तर जंगळ-बियाबान म्ह जा।” अर वो गया, अर परमेसवर के पहाड़ पै उसतै मिल्या, अर उस ताहीं चुम्या। फेर मूसा नै हारुन तै न्यू बताया के यहोवा नै के-के बात कहकै उसतै भेज्या सै, अर कौण-कौण सै निशान दिखाण का हुकम उस ताहीं दिया सै। फेर मूसा अर हारुन नै जाकै इस्राएलियाँ के सारे बुजुर्गां ताहीं कठ्ठा करया। अर जितनी बात यहोवा नै मूसा तै कही थी वो सारी हारुन नै उनतै सुणाई, अर माणसां कै स्याम्ही वे निशान भी दिखाए। तब जाकै माणसां नै उसपै बिश्वास करया; अर न्यू सुणकै के यहोवा नै इस्राएलियाँ की सुधि ली अर उनकै दुःखां पै निगांह करी सै, उननै सिर झुकाकै दण्डवत करया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.