Haryanvi Bible
निर्गमन 19
सीनै पहाड़ पै यहोवा का दर्शन
इस्राएलियाँ नै मिस्र देश तै लिकड़े होए जिस दिन तीन महिन्ने बीतगे, उस्से दिन वे सीनै के जंगळ-बियाबान म्ह आए। अर जिब वे रपीदीम तै चाल कै सीनै के जंगळ-बियाबान म्ह आए, फेर उननै जंगळ-बियाबान म्ह डेरे खड़े करे; अर ओड़ैए पहाड़ कै आग्गै इस्राएलियाँ नै छावणी गेरी। फेर मूसा पहाड़ पै परमेसवर कै धोरै चढ़ ग्या, अर यहोवा नै पहाड़ पै तै उस ताहीं रुक्का मारकै कह्या, “याकूब कै खानदान तै इसा कह, अर इस्राएलियाँ नै मेरा यो वचन सुणा, ‘थमनै देख्या सै के मन्नै मिस्रियाँ तै के-के करया; थारे ताहीं मान्नो उकाब पंछी कै पंखां पै चढ़ाकै अपणे धोरै ले आया सूं। इस करकै इब जै थम जरुर मेरी मान्नोगे, अर मेरे करार का पालन करोगे, तो सारे माणसां म्ह तै थम ए मेरा निज धन ठहरोगे; सारी धरती तो मेरी सै। अर थम मेरी निगांह म्ह याजकां का राज्य अर पवित्र जात ठहरोगे।’ जो बात तन्नै इस्राएल के माणसां तै कहणी सैं वे येए सैं।”
फेर मूसा नै आकै माणसां म्ह तै बुजुर्गां ताहीं बुलवाया, अर ये सारी बात, जिनकै कहण का हुकम यहोवा नै उसतै दिया था, उनतै समझा दी। अर सारे माणस मिलकै बोल्लण लाग्ये, “जो कुछ यहोवा नै कह्या सै वो सारा हम रोज करागें।” माणसां की या बात मूसा नै यहोवा तै सुणाई। फेर यहोवा नै मूसा तै कह्या, “सुण, मै बाद्दळ कै अंधियारे म्ह होकै तेरे धोरै आऊँ सूं, इस करकै के जिब मै तेरे तै बात करुँ फेर वे माणस सुणै, अर सदा तेरा बिश्वास करै।” अर मूसा नै यहोवा तै माणसां की बात्तां का जिक्र करया। फेर यहोवा नै मूसा तै कह्या, “माणसां कै धोरै जा अर उननै आज अर काल पवित्र करिये अर वे अपणे कपड़े धो ले, अर वे तीसरे दिन ताहीं त्यार हो ज्यां; क्यूँके तीसरे दिन यहोवा सारे माणसां कै देखदे सीनै पहाड़ पै उतर आवैगा। अर तू माणसां कै खात्तर चौगरदे नै बाड़ा बाँध दिये, अर उनतै कहिये, ‘थम होश म्ह रहो के पहाड़ पै ना चढ़ो अर उसकी हद नै भी ना छूओ; अर जो कोए पहाड़ नै छुवै वो जरुर मार दिया जावै। उसनै कोए हाथ तै ना छुवै, जो छुवै उसपै पत्थर बरसाए जावै, या उस ताहीं तीर तै छेद्या जावै; चाहे पशु हो चाहे माणस, वो जिन्दा न्ही बचै।’ जिब महाशब्द आळे नरसिंगे का शब्द देर ताहीं सुणाई दे, फेर माणस पहाड़ कै धोरै आवै।”
फेर मूसा नै पहाड़ पै तै उतरकै माणसां कै धोरै आकै उन ताहीं पवित्र कराया; अर उननै अपणे कपड़े धो लिए। अर उसनै माणसां तै कह्या, “तीसरे दिन तक त्यार हो जाओ; जनान्नी कै धोरै ना जाईयो।”
जिब तीसरा दिन आया फेर सबेरै होन्दे बाद्दळ गरजण अर बिजळी चमकण लाग्गी, अर पहाड़ पै काळी घटा छागी, फेर नरसिंगे का शब्द बड़ा भारी होया, अर छावणी म्ह जितने माणस थे सारे काँम्बण लाग्गे। फेर मूसा माणसां नै परमेसवर तै मुलाकात कराण कै खात्तर छावणी तै लिकाड़ लेग्या; अर वे पहाड़ कै तळै खड़े होए। अर यहोवा जो आग म्ह होकै सीनै पहाड़ पै उतरया था, इस कारण पूरा पहाड़ धुम्मा तै भरग्या; अर उसका धुम्मा भट्ठे के जिसा उठ रह्या था, अर पूरा पहाड़ घणा काँम्बण लाग रह्या था। फेर जिब नरसिंगे का शब्द बढ़दा अर घणा भारी होन्दा गया, तो मूसा बोल्या, अर परमेसवर नै आवाज सुणाकै उस ताहीं जवाब दिया। अर यहोवा सीनै पहाड़ की चोट्टी पै उतरया; अर मूसा ताहीं पहाड़ की चोट्टी पै बुलाया अर मूसा उप्पर चढ़ ग्या। फेर यहोवा नै मूसा तै कह्या, “नीच्चै उतरकै माणसां नै चेतावनी दे, कदे इसा ना हो के वे बाड़ा तोड़कै यहोवा कै धोरै देखण नै घुसैं, अर उन म्ह तै घणे नाश हो ज्यां। अर याजक जो यहोवा कै धोरै आया करै सैं वे भी अपणे-आपनै पवित्र करै, कदे इसा ना हो के यहोवा उनपै टूट पड़ै।” मूसा नै यहोवा तै कह्या, “वे माणस सीनै पहाड़ पै न्ही चढ़ सकदे; तन्नै तो खुद म्हारै ताहीं या कहकै चेतावनी दी के पहाड़ कै च्यांरु ओड़ बाड़ा बाँधकै उस ताहीं पवित्र राक्खो।” यहोवा नै उसतै कह्या, “इब तू उतर के, हारुन समेत उप्पर आ; पर याजक अर दुसरे माणस कदे यहोवा कै धोरै बाड़ा तोड़कै न्ही चढ़ आवैं, कदे इसा ना हो के वो उनपै टूट पड़ै।” आखर ये बात मूसा नै माणसां कै धोरै उतरकै उन ताहीं सुणाई।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.