Haryanvi Bible
निर्गमन 16
मन्ना अर बटेर
फेर एलीम प्रान्त तै चाल कै इस्राएलियाँ की सारी मण्डळी, मिस्र देश तै लिकड़ण कै बाद दुसरे महिन्ने कै पंद्रहवे दिन नै, सीन नाम के जंगळ-बियाबान म्ह, जो एलीम अर सीनै पहाड़ कै बिचाळै सै, आ पोहची। जंगळ-बियाबान म्ह इस्राएलियाँ की सारी मण्डळी मूसा अर हारुन कै खिलाफ बड़बड़ाण लाग्गी। अर इस्राएली उनतै कहण लाग्गे, “जिब हम मिस्र देश म्ह माँस की हांडी कै धोरै बैठकै मनमान्या खाणा खाया करदे, फेर जै हम यहोवा कै हाथ तै मार भी दिये जान्दे, तो वो घणा ठीक होन्दा; पर थम हमनै इस जंगळ म्ह इस करकै लिकाड़ ले आये सों के इस सारे समाज नै भूक्खा मार गेरो।”
फेर यहोवा नै मूसा तै कह्या, “देक्खो, मै थारै खात्तर अकास तै खाण-पीण की चीज बरसाऊँगा; अर ये माणस रोज बाहर जाकै हरेक दिन का खाणा कठ्ठा करैगें, इसतै मै उनकी परीक्षा ल्यूँगा, के ये मेरे नियम-कायदे पै चाल्लैगें के न्ही। अर इसा होवैगा के छठवें दिन वो खाणा और दिनां तै दुगणा होवैगा, इस करकै जो कुछ वे उस दिन बटोरै उसनै त्यार कर राक्खै।” फेर मूसा अर हारुन नै सारे इस्राएलियाँ तै कह्या, “साँझ नै थम जाण ल्योगे के जो थारै ताहीं मिस्र देश तै लिकाड़ ले आया सै वो यहोवा सै। अर सबेरै तक थमनै यहोवा का तेज दिखाई पड़ैगा, क्यूँके थम जो यहोवा पै बड़बड़ाओ सो उस ताहीं वो सुणै सै। अर हम कौण सां के थम म्हारै पै बड़बड़ाओ सो?” फेर मूसा नै कह्या, “यो जिब होवैगा जिब यहोवा साँझ नै थमनै खाण कै खात्तर माँस अर सबेरै नै रोट्टी मनमान्नी देवैगा; क्यूँके थम जो उसपै बड़बड़ाओ सो उस ताहीं वो सुणै सै। अर हम कौण सां? थारा बड़बड़ाणा म्हारै पै न्ही यहोवा ए पै होवै सै।”
फेर मूसा नै हारुन तै कह्या, “इस्राएलियाँ की सारी मण्डळी नै हुकम दे, के यहोवा कै स्याम्ही बल्के उसकै धोरै आवै, क्यूँके उसनै उनका बड़बड़ाणा सुण्या सै।” अर इसा होया के जिब हारुन इस्राएलियाँ की सारी मण्डळी तै इसी बात कर रह्या था, के उननै जंगळ-बियाबान कान्ही निगांह करकै देख्या, अर उन ताहीं यहोवा का तेज बाद्दळ म्ह दिखाई दिया। फेर यहोवा नै मूसा तै कह्या, “इस्राएलियाँं का बड़बड़ाणा मन्नै सुण्या सै; उनतै कह दे, के सूरज ढळे पाच्छै थम माँस खाओगे अर सबेरै नै थम रोट्टी तै छिकोगे; अर थम यो जाण ल्योगे के मै थारा परमेसवर यहोवा सूं।” फेर इसा होया के साँझ ताहीं बटेर आकै सारी छावणी पै बैठगी; अर सबेरै नै छावणी कै चौगरदेकै ओस पड़ी। अर जिब ओस सूखगी तो वे के देक्खै सैं, के जंगळ-बियाबान की धरती पै छोटे-छोटे छिलके पाळै के किणक्यां की ढाळ पड़ै सैं। न्यू देखकै इस्राएली, जो न्ही जाणै थे के या के चीज सै, वे आप्पस म्ह कहण लाग्गे यो तो मन्ना सै। फेर मूसा नै उनतै कह्या, “या तो वोए खाण-पीण की चीज सै जिस ताहीं यहोवा थारे खाण खात्तर देवै सै। जो हुकम यहोवा नै दिए सै वो न्यू सै, के थम उस म्ह तै अपणे-अपणे खाण के लायक कठ्ठा करया करियो, यानिके अपणे-अपणे प्राणियाँ की गिणती कै मुताबिक, हरेक माणस कै खात्तर एक-एक ओमेर कठ्ठा1 करियो; जिसकै डेरे म्ह जितने हों वो उन्हे खात्तर कठ्ठा करया करै।” अर इस्राएलियाँ नै उस्से तरियां ए करया; अर किसे नै घणा, अर किसे नै थोड़ा कठ्ठा कर लिया। जिब उननै उस ताहीं ओमेर तै नाप्या, फेर जिसकै धोरै घणा था उसके कुछ भी घणा न्ही रहग्या, अर जिसकै धोरै थोड़ा था उसनै कुछ कमी न्ही होई; क्यूँके एक-एक माणस नै अपणे खाण के जोग्गा ए कठ्ठा कर लिया था। फेर मूसा नै उनतै कह्या, “कोए इस म्ह तै सबेरै तक ना राक्खियो।” फेर भी उननै मूसा की बात न्ही मान्नी; इस करकै जिब कई माणसां नै उस म्ह तै कुछ सबेरै ताहीं राक्ख लिया, तो उस म्ह कीड़े पड़कै बांस मारण लाग्या; फेर मूसा उनपै छो म्ह होया। वे सबेरै-सबेरै रोज अपणे-अपणे खाण कै जोग्गा कठ्ठा कर लिया करदे, अर जिब धूप करड़ी होन्दी, फेर वो गळ ज्या करदा।
फेर इसा होया के छठवें दिन उननै दुगणा, यानिके हरेक माणस कै खात्तर दो-दो ओमेर कठ्ठा कर लिया, अर मण्डळी के सारे प्रधानां नै आकै मूसा ताहीं बता दिया। उसनै उनतै कह्या, “या तो वाए बात सै जो यहोवा नै कही, क्यूँके कल पवित्र विश्राम, यानिके यहोवा कै खात्तर पवित्र विश्राम होवैगा; इस करकै थमनै जो तंदूर म्ह पकाणा हो उस ताहीं पकाओ, अर जो उबाळणा सै उस ताहीं उबाळो, अर इस म्ह तै जितना बचे उस ताहीं सबेरै कै खात्तर राक्ख लियो।” जिब उननै उस ताहीं मूसा के इस हुकम कै मुताबिक सबेरै ताहीं राक्ख लिया, फेर ना तो उस म्ह बांस होई, अर ना उस म्ह कीड़े पड़े। फेर मूसा नै कह्या, “आज उस्से नै खाओ, क्यूँके आज यहोवा का विश्रामदिन सै; इस करकै आज थमनै मदानां म्ह न्ही मिलैगा। छः दिन2 तो थम उस ताहीं कठ्ठा करया करोगे; पर सातवाँ दिन विश्राम का दिन सै, उस म्ह वो न्ही मिलैगा।” फेर भी माणसां म्ह तै कोए-कोए सातमै दिन भी कठ्ठा करण कै खात्तर बाहर गए, पर उन ताहीं कुछ न्ही मिल्या। फेर यहोवा नै मूसा तै कह्या, “थम मेरे हुकमां अर नियम-कायदे नै कद तक न्ही मान्नोगे? देक्खो, यहोवा नै जो थारै ताहीं विश्राम का दिन दिया सै, इस्से कारण वो छठवें दिन नै दो दिन का खाणा थमनै देवै सै; इस करकै थम अपणे-अपणे डेरे म्ह बैठ्ठे रहियो, सातमै दिन कोए अपणे डेरे तै बाहर ना जाईयो।” आखर म्ह माणसां नै सातमै दिन विश्राम करया।
इस्राएल कै घरान्ने नै उस चीज का नाम मन्ना धरया; अर वो धणिये की ढाळ सफेद था, अर उसका स्वाद शहद कै बणे होए पूए के जिसा था। फेर मूसा नै कह्या, “यहोवा नै जो हुकम दिया सै वो न्यू सै, के इस म्ह तै ओमेर भर अपणे कुण्बे की पीढ़ी-पीढ़ी कै खात्तर राख लियो, जिसतै वे जाणै के यहोवा म्हारै ताहीं मिस्र देश तै लिकाड़कै जंगळ-बियाबान म्ह किसी रोट्टी खुवावै था।” फेर मूसा नै हारुन तै कह्या, “एक बरतन लेकै उस म्ह ओमेर भर लेकै उसनै यहोवा कै आग्गै धरदे, के वो थारी पीढ़ियाँ कै खात्तर धरया रहवै।” जिसा हुकम यहोवा नै मूसा तै दिया था, उस्से कै मुताबिक हारुन नै उस ताहीं गवाही कै सन्दूक कै आग्गै धर दिया, के वो ओड़ैए धरया रहवै। इस्राएली जिब ताहीं बसे होए देश म्ह ना पोहचै जिब तक, यानिके चाळीस साल तक मन्ना नै खान्दे रहे; वे जिब तक कनान देश की हद पै न्ही पोहचे जिब ताहीं मन्ना नै खान्दे रहे। एक ओमेर3 तो एपा का दसमां हिस्सा सै।
Source notes (3)
- Footnote ओमेर कठ्ठा हरेक माणस खात्तर 2.3 लीटर
- Footnote छः दिन हफ्तै कै छ: दिन
- Footnote एक ओमेर एक एपा: लगभग 23 लीटर
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.