Haryanvi Bible
सभोपदेशक 5
परमेसवर का भय मानणा अर मन्नत ताहीं पूरा करणा
जिब तू परमेसवर के भवन म्ह जावै, तो सावधानी तै चालिये; सुणण कै खात्तर धोरै जाणा बेकूफां के बलिदान चढ़ाण तै आच्छा सै; क्यूँके वे न्ही जाणदे के बुरा करै सै। बात करण म्ह जल्दबाजी ना करिये, अर ना अपणे मन तै कोए बात जल्दबाजी तै परमेसवर कै स्याम्ही बोलिये, क्यूँके परमेसवर सुर्ग म्ह सै अर तू धरती पै सै; इस करकै तेरे शब्द थोड़े ए हो।
क्यूँके जिस तरियां घणे काम के कारण सपना देख्या जावै सै, उसे तरियां ए घणी बात्तां का बोलण आळा बेकूफ ठहरै सै।
जिब तू परमेसवर कै खात्तर मन्नत मान्नै, तो उसनै पूरा करण म्ह देर ना करिये; क्यूँके वो बेकूफां तै खुश न्ही होन्दा। जो मन्नत तन्नै मान्नी हो उस ताहीं पूरी करिये। मन्नत मान कै पूरी ना करण तै मन्नत का ना मानणा ए भला सै। कोए शब्द कहकै अपणे आप नै पाप म्ह ना फँसाइये, अर ना परमेसवर के दूत कै स्याम्ही कहिये के यो भूल तै होया; परमेसवर क्यूँ तेरा बोल सुणकै गुस्सा हो, अर तेरे हाथ के काम्मां नै नाश करै?
क्यूँके सपने घणे होण तै बेकार बात्तां की बढ़ोतरी होवै सै: पर तू परमेसवर का भय मानिये।
पा लेणा अर सम्मान की व्यर्थता
जै तू किसे प्रान्त म्ह गरीबां पै अंधेर अर न्याय अर धर्म नै बिगड़दा देक्खै, तो इसतै अचम्भित न्ही होणा; क्यूँके एक अधिकारी तै बड़ा दूसरा रहवै सै जिस ताहीं इन बात्तां की जानकारी रहवै सै, अर उनतै भी बड़े अधिकारी रहवै सै। धरती की पैदावार सारया की खात्तर सै, बल्के खेत्ती तै राजा का भी काम चाल्लै सै।
जो रपियाँ तै प्यार करै सै वो रपियाँ तै कोनी छिकैगा; अर ना जो घणे धन तै प्यार करै सै, मुनाफै तै, यो भी बेकार सै।
जिब धन-सम्पत्ति बढै़ सै, तो उसके खाणआळे भी बढै़ सै, फेर उसके माल्लिक नै इस ताहीं छोड़ और के फायदा होवै सै के उस धन-सम्पत्ति नै अपणी आँखां तै देक्खै?
मेहनत करण आळा चाहे थोड़ा खावै, या घणा, तोभी उसकी नींद सुखदाई होवै सै; पर धनी के धन बढ़ण के कारण उस नै नींद न्ही आन्दी।
मन्नै सूरज कै नीच्चै एक बड़ी बुरी बला देक्खी सै; यानी वो धन जिस ताहीं उसके माल्लिक नै अपणे नुकसान कै खात्तर राख्या हो, अर वो धन किसे नुकसान के काम म्ह उड़ जावै सै; अर उसके घर म्ह बेट्टा पैदा होवै सै पर उसके हाथ म्ह बेट्टे तै देण तांई कुछ न्ही रहन्दा। जिसा वो माँ के पेट तै लिकड्या उसाए लौट जावैगा; जिसा खाल्ली हाथ आया था, अर अपणे मेहनत के बदले किमे भी न्ही पावैगा जिस ताहीं वो अपणे हाथ म्ह ले जा सकै। यो भी एक बड़ी बला सै के जिसा वो आया, ठीक उसाए वो जावैगा; उस नै उस बेकार मेहनत तै और के फायदा सै क्यूँके वे हवा नै पकड़ण म्ह मेहनत करे सै? सिर्फ इसके के वो जिन्दगी भर अन्धकार म्ह जीवै सै1, अर भोत दुखी अर रोगी रहया अर गुस्सा भी करदा रहया?
सुण, जो भली बात मन्नै देक्खी सै, बल्के जो सही सै, वो या के माणस खावै-पीवै अर अपणी मेहनत तै जो वो सूरज कै नीच्चै करै सै, अपणी सारी उम्र भर जो परमेसवर नै उस ताहीं दी सै, सुखी रहवै क्यूँके उसका भाग योए सै। बल्के हर एक माणस जिस ताहीं परमेसवर नै धन-सम्पत्ति दी हो, अर उनतै आनन्द भोग्गण अर उस म्ह तै अपणा भाग लेण अर मेहनत करदे होए खुशी मनाण की शक्ति भी दी हो यो परमेसवर का वरदान सै। उसकी जिन्दगी के घणखरे दिन उसनै याद कोनी रहवैंगे, क्यूँके परमेसवर उसनै उन चिज्जां म्ह व्यस्त राक्खै सै जिन ताहीं उसनै करण म्ह खुशी मिलै सै।
Source notes (1)
- Footnote अन्धकार म्ह जीवै सै अन्धकार म्ह खाणा खावै सै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.