Haryanvi Bible
व्यवस्थाविवरण 30
इस्राएलियाँ की वापसी का वचन
“फेर जिब आशीष अर श्राप की ये सारी बात जो मन्नै थारै तै कह सुणाई सै तेरै पै घटै, अर तू उन सारी जात्तां के बीच म्ह रहकै, जड़ै तेरा परमेसवर यहोवा तन्नै मजबूर करकै पोहचावैगा इन बात्तां नै याद करै, अर अपणी सन्तान समेत अपणे सारे मन अर सारे प्राण तै अपणे परमेसवर यहोवा की ओड़ बोहड़कै उसकै धोरै बोहड़ आवै, अर इन सारे हुकमां कै मुताबिक जो मै आज तन्नै सुणाऊँ सूं उसकी बात मान्नै; फेर तेरा परमेसवर यहोवा तन्नै बँधुआई तै बोहड़ा ले आवैगा, अर तेरै पै दया करकै उन सारे देशां के माणसां म्ह तै जिनकै बीच म्ह वो तन्नै तित्तर-भित्तर कर देवैगा फेर कठ्ठा करैगा। चाहे धरती के सिरे ताहीं तेरा मजबूरण पोहचाया जाणा हो, फेर भी तेरा परमेसवर यहोवा तन्नै ओड़ै तै ले आकै कठ्ठा करैगा। अर तेरा परमेसवर यहोवा तन्नै उस्से देश म्ह पोहचावैगा जिसके तेरे पुरखाँ हकदार होए थे, अर तू फेर उसका अधिकारी होवैगा; अर वो तेरी भलाई करैगा, अर तन्नै तेरै पुरखाँ तै भी गिणती म्ह घणा बढ़ावैगा। अर तेरा परमेसवर यहोवा तेरे अर तेरै वंश कै मन का खतना करैगा, के तू अपणे परमेसवर यहोवा तै अपणे सारे मन अर सारे प्राण कै गेल्या प्यार करै, जिसतै तू जिन्दा रहवै। अर तेरा परमेसवर यहोवा ये सारे श्राप की बात तेरै बैरी पै जो तेरै तै बैर करकै तेरै पाच्छै पड़ैंगें भेज्जैगा। अर तू मुड़ैगा अर यहोवा की सुणैगा, अर इन सारे हुकमां नै मान्नैगा जो मै आज तन्नै सुणाऊँ सूं। अर यहोवा तेरी भलाई कै खात्तर तेरे सारे काम्मां म्ह, अर तेरी सन्तान, अर पशुआं कै बच्यां, अर धरती की पैदावार म्ह तेरी बढ़दी करैगा; क्यूँके यहोवा फेर तेरै उप्पर भलाई कै खात्तर उसाए आनन्द करैगा, जिसा उसनै तेरै पूर्वजां कै उप्पर करया था; क्यूँके तू अपणे परमेसवर यहोवा की बात सुणकै उसके हुकमां अर विधियाँ नै जो इस नियम-कायदे की किताब म्ह लिक्खे सै मान्या करैगा, अर अपणे परमेसवर यहोवा की ओड़ तै अपणे सारे मन अर सारे प्राण तै मन फिरावैगा।”
जीवन या मरण
“देक्खो, यो जो हुकम मै आज तेरै ताहीं सुणाऊँ सूं, वो ना तो तेरै खात्तर ओक्खे, अर ना दूर सै। अर ना तो यो अकास म्ह सै, के तू कहवै, ‘म्हारै खात्तर अकास म्ह चढ़कै उस ताहीं म्हारै धोरै ले आवै, अर म्हारै तै सुणावै के हम उसनै मान्ना?’ अर ना यो समुन्दर पार सै, के तू कहवै, ‘कौण म्हारै खात्तर समुन्दर पार जावै, अर उस ताहीं म्हारै धोरै ले आवै, अर म्हारै तै सुणावै के हम उसनै मान्ना?’ पर यो वचन तेरै घणे धोरै, बल्के तेरै मुँह अर मन म्ह ए सै ताके तू इसपै चाल्लै।”
“सुण, आज मन्नै तेरे ताहीं जीवन अर मरण, नुकसान अर फायदा दिखाया सै। क्यूँके मै आज तन्नै हुकम दियुँ सूं, के अपणे परमेसवर यहोवा तै प्यार करिये, अर उसकै रास्तयां पै चालिये, अर उसके हुकमां, विधियाँ, अर नियमां ताहीं मानिये, जिसतै तू जिन्दा रहवै, अर बढ़दा जावै, अर तेरा परमेसवर यहोवा उस देश म्ह जिसका हकदार होण ताहीं तू जाण लागरया सै, तन्नै आशीष देवै। पर जै तेरा मन भटक ज्या, अर तू ना सुणै, अर भटक कै पराए देवत्यां ताहीं दण्डवत करै अर उनकी आराधना करण लाग्गै, तो मै थमनै आज यो समझाऊँ सूं, के थम जरुर नाश हो जाओगे; अर जिस देश का हकदार होण कै खात्तर तू यरदन नदी के पार जाण लागरया सै, उस देश म्ह थम घणे दिनां कै खात्तर रहण ना पाओगे। मै आज अकास अर धरती दोनुआ ताहीं थारै स्याम्ही इस बात की गवाही बणाऊँ सूं, के मन्नै जीवन अर मरण, आशीष अर श्राप ताहीं थारै आग्गै धरया सै; इस करकै तू जीवन नै ए अपणाले, के तू अर तेरी पीढ़ी दोन्नु जिन्दा रहवै; इस करकै अपणे परमेसवर यहोवा तै प्यार करो, अर उसकी बात मान्नो, अर उसतै लिपटे रहो; क्यूँके तेरा जीवन अर लाम्बी उम्र योए सै, अर इसा करण तै जिस देश ताहीं यहोवा नै अब्राहम, इसहाक, अर याकूब, यानिके तेरै पूर्वजां तै देण की कसम खाई थी उस देश म्ह तू बस्या रहवैगा।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.