दानिय्येल

दानिय्येल नबी की किताब

लेखक

किताब का नाम उसके लेखक दानिय्येल पै सै। या किताब बाबेल म्ह लिखी गई सै जिब वो दुसरे इस्राएलियाँ के गैल बन्धुआई म्ह था। दानिय्येल का मतलब सै, “परमेसवर मेरा न्यायी सै।” इस किताब के अनेक भाग दानिय्येल के लेखक होण का इशारा करैं सैं 9:2; 10:2 आदि। दानिय्येल अपणे अनुभव नै अर अपणी भविष्यद्वाणियाँ नै बाबेल की राजधानी म्ह रहन्दे बखत, यहूदी गुलाम्मां कै खात्तर लिखै सै। ओड़ै राजा कै धोरै उसकी सेवा उसनै खास समाज के सम्बन्धां म्ह रहण का सौभाग्य देवै थी। पराए देश अर पराई संस्कृति म्ह परमेसवर की निष्ठावान सेवा कै कारण वो धर्मशास्त्र के सब नायकां म्ह बेजोड़ जगहां राक्खै सै।

लिखण का बखत अर जगहां

लगभग 605-530 ई. पू.

प्रापक

बाबेल के लिकाड़े होए यहूदी अर सारे उत्तरकालीन बाइबल पाठक।

मकसद

दानिय्येल की किताब म्ह भविष्यवक्ता दानिय्येल के काम, भविष्यद्वाणियाँ अर दर्शन लिपिबद्ध सैं। इस किताब की शिक्षा सै के परमेसवर अपणे बिश्वासियाँ कै गैल बिश्वासयोग्य ठहरै सै। परीक्षा अर दमन की हालत कै बाद भी बिश्वासियाँ नै अपणे सांसारिक जिम्मेदारियांँ नै निभान्दे होए परमेसवर के प्रति निष्ठावान रहणा सै।

खास बातें

परमेसवर की ना खतम होण आळी प्रभुता

रूपरेखा

1. महान प्रतिज्ञा के सपना का दानिय्येल जरिये मतलब बताणा

2. शद्रक, मेशक, अबेदनगो का आग के भट्ठे म्ह उद्धार

3. नबूकदनेस्सर का सपना

4. आँगळियाँ जरिये लिख्या जाणा अर दानिय्येल जरिये विनाश की भविष्यवाणी

5. शेर की गुफा म्ह दानिय्येल

6. च्यार पशुओं का दर्शन

7. मिंढे, बकरे अर छोट्टे सींग का दर्शन

8. दानिय्येल की प्रार्थना का 70 साल बाद जवाब

9. आखरी महायुद्ध का दर्शन