Haryanvi Bible
आमोस 4
“हे बाशान की गायों1, यो वचन सुणो, थम जो सामरिया पहाड़ पै हो, जो कंगालां पै अंधेर करो, अर गरीबां ताहीं कुचल देओ सो, अर अपणे-अपणे घरआळे तै कहो सो, ‘ल्या, दे हम पीवां!’ परमेसवर यहोवा अपणी पवित्रता की कसम खाकै कहवै सै, देक्खो, थारे पै इसे दिन आण आळे सैं, के थम काण्डयाँ तै, अर थारी औलाद मछली की बंसियां तै खींच ली जावैंगी। अर थम बाड़े के नाकां तै होकै सीध्धी लिकड़ जाओगी अर हेर्मोन म्ह डाली जाओगी,” यहोवा की याए वाणी सै।
इस्राएल सुधरण म्ह असफल
“बेतेल नगर म्ह आकै अपराध करो, अर गिलगाल नगर म्ह आकै भोत सा अपराध करो; अपणे चढ़ावे सबेर ताहीं, अर अपणे दशमांश हर तीसरे दिन ले आया करो; धन्यवाद-बलि खमीर परमेसवर नै चढ़ाओ, अर अपणे स्वेच्छाबलियां का जिक्र चलाकै उनका प्रचार करो; क्यूँके हे इस्राएलियों, इसा करणा थमनै भावै सै,” परमेसवर यहोवा की याए वाणी सै।
“मन्नै थारे सारे नगरां म्ह दाँन्द की सफाई करा दी, अर थारी सारी जगहां म्ह रोट्टी की घटी करी सै, फेर भी थम मेरी ओड़ मुड़कै ना आए,” यहोवा की याए वाणी सै।
“अर जिब कटणी के तीन महिन्ने रहगे, फेर मन्नै थारे खात्तर बारिस ना करी; मन्नै एक नगर म्ह पाणी बरसा कै दुसरे म्ह ना बरसाया; एक खेत म्ह पाणी बरस्या, अर दूसरा खेत जिस म्ह ना बरस्या; वो सूख ग्या। इस करकै दो तीन नगरां के माणस पाणी पीण नै मारे-मारे फिरदे होए एके नगर म्ह आए, लेकिन छिके कोनी; फेर भी थम मेरी और ना फिरे,” यहोवा की याए वाणी सै।
“मन्नै थारे ताहीं लूह अर गेरूई तै मारया सै; अर जिब थारी वाटिका अर दाख की बारियाँ, अर अंजीर अर जैतून के पेड़ घणे होगे, फेर टिड्डियाँ उननै खागी; फेर भी थम मेरी ओड़ मुड़कै ना आए,” यहोवा की याए वाणी सै।
“मन्नै थारे बीच म्ह मिस्र देश की जिसी मरी फैलाई2; मन्नै थारे घोड़यां ताहीं खुसवा कै थारे जवान्नां ताहीं तलवार तै घात करा दिया; अर थारी छावणी की दुर्गन्ध थारै धोरै पोहचाई; फेर भी थम मेरी ओड़ मुड़कै ना आए,” यहोवा की याए वाणी सै।
“मन्नै थारे म्ह तै कईयाँ ताहीं इसा उलट दिया, जिस तरियां परमेसवर नै सदोम अर गमोरा नगर ताहीं उलट दिया था, अर थम आग तै लिकाड़ी होई लाकड़ी के जिसे ठहरे; फेर भी थम मेरी ओड़ मुड़कै ना आए,” यहोवा की याए वाणी सै।3
“इस कारण, हे इस्राएल, मै तन्नै दण्ड देण पै सूं।, अर इस करकै के मै तेरै म्ह यो काम करण पै सूं, हे इस्राएल, अपणे परमेसवर कै स्याम्ही आण कै खात्तर त्यार हो जा!4”
देख, पहाड़ां का बणाण आळा अर हवा का सिरजण आळा, अर माणस ताहीं उसके मन का विचार बताण आळा अर भोर ताहीं अन्धकार करण आळा, अर जो धरती की ऊँच्ची जगहां पै चाल्लण आळा सै, उसे का नाम सेनाओं का परमेसवर यहोवा सै!5
Source notes (5)
- Footnote बाशान की गायों इस आयत म्ह सामरिया की प्रमुख जनानियाँ की तुलना बाशान की गांयां तै करी गई सै।
- Footnote मन्नै थारे बीच म्ह मिस्र देश की जिसी मरी फैलाई परमेसवर नै मिस्र कै गैल कठोर बरताव करया था, उसके पाच्छै उननै पैहले तै ए चेतावनी दे दी थी के जै उननै हुकम न्ही मान्या तो परमेसवर उनपै वे सब महामारियाँ ले आवैगा जो मिस्र-वासियाँ पै ल्याया था अर उनतै वे डरै थे।
- Footnote उत्प. 19:24-25
- Footnote परमेसवर कै स्याम्ही आण कै खात्तर त्यार हो जा! न्याय कै खात्तर आम्ही-स्याम्ही, आखरी मौक्का सै।
- Footnote 2 कुरि. 6:18
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.