Haryanvi Bible
आमोस 2
मोआब
यहोवा न्यू कहवै सै: “मोआब के तीन के, बलके च्यार अपराध्धां कै कारण, मै उसकी सजा नै ना छोड़ूँगा; क्यूँके उसनै एदोम के राजा की हाड्डियाँ ताहीं जळाकै चूना कर दिया। इस करकै मै मोआब देश म्ह आग लगाऊँगा, अर उसतै करिय्योत नगर के भवन भस्म हो जावैंगे1; अर मोआब सोर सराबा अर ललकार, और नरसिंगे के शब्द होन्दे-होन्दे मर जावैगा। मै उसके बीच म्ह तै न्यायी का नाश करुँगा, अर उसकै गैल उसके सारे हाकिमां नै भी घात करुँगा,” यहोवा का योए वचन सै।
यहूदा
यहोवा न्यू कहवै सै: “यहूदा के तीन के, बलके च्यार अपराध्धां कै कारण, मै उसकी सजा नै ना छोड़ूँगा; क्यूँके उननै यहोवा के नियम-कायदे ताहीं निकम्मा जाण्या अर मेरी विधियाँ ताहीं न्ही मान्या; अर अपणे झूठ्ठे देवत्यां कै कारण जिनकै पाच्छै उनके पूर्वज चाल्लै थे, वे भी भटकगे सैं। इस करकै मै यहूदा म्ह आग लगाऊँगा, अर उसतै यरुशलेम के भवन भस्म हो जावैंगे।”
इस्राएल का न्याय
यहोवा न्यू कहवै सै: “इस्राएल के तीन के, बलके च्यार अपराध्धां कै कारण, मै उसकी सजा नै ना छोड़ूँगा; क्यूँके उननै निर्दोष ताहीं रपियाँ कै खात्तर अर गरीब ताहीं एक जोड़ी जूतियाँ कै खात्तर बेच दिया सै। वे कंगालां के सिर पै की धूळ का भी लालच करै, अर नम्र माणसां नै राह तै हटा देवै सैं; अर बाप-बेट्टा दोन्नु एके गुलाम छोरी कै धोरै जावैं सैं, जिसतै मेरे पवित्र नाम ताहीं अपवित्र ठहरावै। वे हर एक वेदी कै धोरै गुलाम के कपड़े पै सोवैं सैं, अर जुर्माने के रपियाँ तै मोल लिया होया दाखमधु अपणे देवता के घर म्ह पी लेवैं सैं।”
“मन्नै उनके स्याम्ही तै एमोरियां ताहीं नाश करया था, जिनकी लम्बाई देवदारां की जिसी, अर जिनका जोर बांज दरखतां का जिसा था; तोभी मन्नै उप्पर तै उसके फळ, अर नीच्चै तै उसकी जड़ नाश करी। अर मै थारे ताहीं मिस्र देश तै लिकाड़ ल्याया, अर जंगळ म्ह चाळीस साल ताहीं लिए फिरदा रह्या, के थम एमोरियां के देश के अधिकारी हो जाओ। अर मन्नै थारे बेट्टयाँ म्ह तै नबी होण कै खात्तर अर थारे कुछ जवान्नां म्ह तै नाज़ीर2 होण कै खात्तर ठहराया। हे इस्राएलियों, के यो सब सच न्ही सै?” यहोवा की याए वाणी सै।
लेकिन थमनै नाज़ीरां ताहीं दाखमधु प्याया, अर नबियाँ ताहीं हुकम दिया के भविष्यवाणी ना करैं।
“देक्खो, मै थारे ताहीं इसा दबाऊँगा, जिस तरियां पूळयाँ तै भरी होई गाड्डी नीच्चै ताहीं दबाई जावै सै। इस करकै तेज दौड़ण आळे ताहीं भाज्जण की जगहां ना मिलैगी, अर ताकतवर की ताकत कुछ काम न्ही देवैगी; अर ना पराक्रमी अपणी जान बचा सकैगा; धनुर्धारी खड्या न्ही रह सकैगा, अर फुर्ती तै दौड़ण आळा ना बचैगा; घुड़सवार भी अपणी जान बचाकै न्ही भाग्गैगें; अर शूरवीरां म्ह जो घणा वीर हो, वो भी उस दिन नंगा होकै भाज जावैगा,” यहोवा की याए वाणी सै।
Source notes (2)
- Footnote करिय्योत नगर के भवन भस्म हो जावैंगे अनेक नगर, यानिके नगरां का समूह सम्भवतः
- Footnote नाज़ीर नाज़ीर वो माणस जिस ताहीं परमेसवर की सेवा खात्तर अलग राख्या जाया करै था। उस ताहीं अपणे बाल कटवाण या शराब पीण की अनुमति न्ही थी। उस ताहीं कई प्रतिज्ञाएँ लेणी पड़ै थी जिनका वर्णन नाज़ीर के नियम म्ह करया गया सै: गिन. 6:1-21
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.