Haryanvi Bible
2 शमूएल 4
ईशबोशेत की हत्या
जिब शाऊल के बेट्टे नै सुण्या, के अब्नेर हेब्रोन म्ह मारया गया, फेर उसके हाथ ढील्ले पड़गे, अर सारे इस्राएली भी घबरागे। शाऊल के बेट्टे कै दो माणस थे जो दलां के प्रधान थे; एक का नाम बानाह, अर दुसरे का नाम रेकाब था, ये दोन्नु बेरोतवासी बिन्यामीनी रिम्मोन के बेट्टे थे, (क्यूँके बेरोत भी बिन्यामीन के भाग म्ह गिण्या जावै सै; अर बेरोती नगर माणस गित्तैम नगर कान्ही भाजगे, अर आज कै दिन ताहीं ओड़ैए परदेशी होकै रहवै सैं।)
शाऊल के बेट्टे योनातान का दोन्नु टांगाँ तै लंगड़ा एक बेट्टा था। जिब यिज्रेल तै शाऊल अर योनातान की खबर आई1 जिब वो पाँच साल का था; उस बखत उसकी दाई उसनै ठाकै भागी; अर उसके तगाजै तै भागण कै कारण वो गिरकै लंगड़ा होग्या। उसका नाम मपीबोशेत था।
उस बेरोती रिम्मोन के बेट्टे रेकाब अर बानाह कड़ी धूप कै बखत जिब ईशबोशेत के घर म्ह आए तो वो दोपहर म्ह आराम करण लागरया था। अर गेहूँ ले जाणकै बहानै घर म्ह घुसगे; अर उसके पेट म्ह मारया; फेर रेकाब अर उसका भाई बानाह भाज लिकड़े। जिब वे घर म्ह घुसे, अर वो सोण की कोठड़ी म्ह चारपाई पै सोण लागरया था, तो उननै उस ताहीं मार गेरया, अर उसका सिर काट लिया, अर उसका सिर लेकै रातों-रात अराबा कै रास्ता तै चाल्ले। वे ईशबोशेत का सिर हेब्रोन म्ह दाऊद कै धोरै ले जाकै राजा तै कहण लाग्गे, “देख, शाऊल जो तेरा दुश्मन अर तेरी जान का गाहक था, उसके बेट्टे ईशबोशेत का यो सिर सै; तो आज कै दिन यहोवा नै शाऊल अर उसके कुण्बे तै मेरे प्रभु राजा का बदला लिया सै।” दाऊद नै बेरोती रिम्मोन के बेट्टे रेकाब अर उसके भाई बानाह ताहीं जवाब देकै उनतै कह्या, “यहोवा जो मेरी जान नै सारी विपत्तियाँ तै छुड़ान्दा आया सै, उसके जीवन की कसम, जिब किसे नै या जाणकै, के मै शुभ समाचार देऊँ सूं, सिकलग म्ह मेरे ताहीं शाऊल के मरण का समाचार दिया, तो मन्नै उस ताहीं पकड़कै घात कराया; यानिके उसनै समाचार का योए बदला मिल्या। फेर जिब बुरे माणसां नै एक बेकसूर माणस ताहीं उसे कै घर म्ह, बल्के उसकी चारपाई पैए मार गेरया, तो इब जरूरी सै के मै उसके खून का बदला थारे तै लेऊँगा, अर थमनै धरती पै तै नाश कर दियुँगा।” फेर दाऊद नै सिपाहियाँ ताहीं हुकम दिया, अर उननै उन ताहीं मारकै उनके हाथ-पाँ काट दिए, अर उनकी लाश नै हेब्रोन के जलकुण्ड कै धोरै टाँग दिया। फेर ईशबोशेत के सिर नै ठाकै हेब्रोन म्ह अब्नेर की कब्र म्ह गाड़ दिया।
Source notes (1)
- Footnote यिज्रेल तै शाऊल अर योनातान की खबर आई शाऊल और योनातान के बारे म्ह खबर उनकी मृत्यु के बारे म्ह थी के वे युद्ध म्ह मारे गए थे (1 शमूएल 29:1, 11; 31:6)।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.