Haryanvi Bible
2 शमूएल 20
शेबा का विद्रोह
ओड़ै संयोग तै शेबा नाम का एक बिन्यामीनी था, वो ओच्छा माणस बिक्री का बेट्टा था; वो नरसिंगा फूँक कै कहण लाग्या, “दाऊद म्ह म्हारा किमे अंश न्ही, अर ना यिशै के बेट्टे म्ह म्हारा कोए भाग सै; हे इस्राएलियों, अपणे-अपणे डेरे म्ह चले जाओ!” ज्यांतै सारे इस्राएली माणस दाऊद कै पाच्छै चालणा छोड़कै बिक्री के बेट्टे शेबा कै पाच्छै हो लिए; पर सारे यहूदी माणस यरदन तै यरुशलेम तक अपणे राजा कै गैल लाग्गे रहे।
फेर दाऊद यरुशलेम म्ह अपणे भवन म्ह आया; अर राजा नै उन दस रखैल्लां ताहीं, जिननै वो भवन की चौक्सी करण खात्तर छोड़ ग्या था, न्यारे एक घर म्ह राख्या, अर उनका पालन-पोषण करदा रह्या, पर उनतै सहवास न्ही करया। ज्यांतै वे अपणी-अपणी मौत के दिन तक विधवापन की सी दशा म्ह जिन्दा ए बन्द रहीं। फेर राजा नै अमासा तै कह्या, “यहूदी सेना नै तीन दिन के भित्तर मेरे धोरै बुला ल्या, अर तू भी उरै मौजूद रहिये।” फेर अमासा यहूदियाँ नै बुलाण गया; पर उसके ठहराए होये बखत तै ज्यादा ओड़ै रहग्या। फेर दाऊद नै अबीशै तै कह्या, “इब बिक्री का बेट्टा शेबा अबशालोम तै भी म्हारा घणा नुकसान करैगा; ज्यांतै तू अपणे माल्लिक कै सिपाहियाँ नै लेकै उसका पिच्छा कर, इसा न हो के वो गढ़आळे नगर पाकै म्हारी नजर तै छिप जावै।” फेर योआब के माणस, अर करेती अर पलेती माणस, अर सारे शूरवीर उसकै पाच्छै हो लिए; अर बिक्री के बेट्टे शेबा का पिच्छा करण नै यरुशलेम तै लिकड़े। वे गिबोन म्ह उस भारी पत्थर कै धोरै पोहचे ए थे, के अमासा उनतै आ मिल्या। योआब तो योद्धा का कपड़ा फेंटे तै कसे होए था, अर उस फेंटे म्ह एक तलवार उसकी कमर पै अपणी म्यान म्ह बंधी होई थी; अर जिब वो चल्या, फेर वा लिकड़कै गिरगी। तो योआब नै अमासा तै पूच्छया, “हे मेरे भाई, के तू सही-सलामत तो सै?” फेर योआब नै अपणा दाहिना हाथ बढ़ाकै अमासा ताहीं चुम्ण खात्तर उसकी दाढ़ी पकड़ी।
पर अमासा नै उस तलवार की किमे चिन्ता ना करी जो योआब के हाथ म्ह थी; अर उसनै उस ताहीं अमासा के पेट म्ह घोप दी, जिसतै उसकी अंतड़ियाँ लिकड़कै धरती पै गिर पड़ी, अर उसनै उस ताहीं दुसरी बार न्ही मारया; अर वो मर ग्या। फेर योआब अर उसका भाई अबीशै बिक्री के बेट्टे शेबा का पिच्छा करण नै चाल्ले। अर उसकै धोरै योआब का एक जवान खड़या होकै कहण लाग्या, “जो कोए योआब कै पक्ष अर दाऊद की और का हो वो योआब के पाच्छै हो ले।” अमासा सड़क कै बीच म्ह अपणे लहू म्ह पड़या था। जिब उस माणस नै देख्या के सारे माणस खड़े होगे सैं, फेर अमासा नै सड़क पै तै मैदान म्ह ठा लेग्या, क्यूँके देख्या के जितने उसकै धोरै आवैं सैं वे खड़े हो जावै सैं, फेर उसनै उसके उप्पर एक कपड़ा गेर दिया। उसके सड़क पै तै सरकाए जाण पै, सारे माणस बिक्री के बेट्टे शेबा का पिच्छा करण नै योआब के पाच्छै हो लिए। शेबा सारे इस्राएली गोत्रां म्ह होकै आबेल अर बेतमाका अर बैरियाँ के देश तक पोहच्या; अर वे भी कठ्ठे होकै उसकै पाच्छै हो लिए। फेर योआब के माणसां नै उसनै आबेल्वेत्माका म्ह घेर लिया; अर नगर के स्याम्ही एक टीला खड़या करया के वो शहरपनाह तै सट ग्या; अर योआब के गैल के सारे माणस शहरपनाह नै गिराण खात्तर धक्का देण लाग्गे।
दाऊद का पलिश्तियाँ पै जीत पाणा
फेर एक बुद्धिमान जनान्नी नै नगर म्ह तै रुक्का मारया, “सुणो! सुणो! योआब तै कहो, के उरै आवै, ताके मै उसतै किमे बात करुँ।” जिब योआब उसके धोरै गया, फेर जनान्नी नै पूच्छया, “के तू योआब सै?” उसनै कह्या, “हाँ, मै वोए सूं।” फेर उसनै उसतै कह्या, “अपणी दास्सी के वचन सुण।” उसनै कह्या, “मै सुणण लाग रह्या सूं।” वा इस तरियां कहन्दी रही, “पुराणे बखत म्ह माणस कह्या करदे, ‘आबेल म्ह पूच्छया जावै,’ अर इस तरियां झगड़े नै निपटा दिया करदे। मै तो मेल मिलापआळे अर बिश्वासयोग्य इस्राएलियाँ म्ह तै सूं; पर तू एक प्रधान नगर नाश करण की कोशिश करै सै; तू यहोवा के भाग नै क्यूँ निगळ जावैगा?” योआब नै जवाब देकै कह्या, “या मेरे तै दूर हो, दूर, के मै निगळ जाऊँ या नाश करुँ! बात इसी न्ही सै। शेबा नाम के एप्रैम के पहाड़ी देश का एक माणस जो बिक्री का बेट्टा सै, उसनै दाऊद राजा के खिलाफ हाथ उठाया सै; आखर थम केवल उस्से नै सौंप द्यो, फेर मै नगर नै छोड़कै चल्या जाऊँगा।” जनान्नी नै योआब तै कह्या, “उसका सिर शहरपनाह पै तै तेरे धोरै फेंक दिया जावैगा।” फेर जनान्नी अपणी बुद्धिमानी तै सारे सेना के माणसां कै धोरै गई। फेर उननै बिक्री के बेट्टे शेबा का सिर काटकै योआब कै धोरै फेंक दिया। फेर योआब नै नरसिंगा फूँका, अर सारे माणस नगर कै धोरै तै न्यारे-न्यारे होकै अपणे-अपणे डेरे म्ह गए अर योआब यरुशलेम म्ह राजा कै धोरै बोहड़ ग्या।
दाऊद के अधिकारीगण
योआब तो सारे इस्राएली सेना कै उप्पर प्रधान रह्या; अर यहोयादा का बेट्टा बनायाह करेतियां अर पलेतियां कै उप्पर था; अर अदोराम बेगारां कै उप्पर था; अर अहीलूद का बेट्टा यहोशापात इतिहास का लेखक था; अर शवा मंत्री था; अर सादोक अर एब्यातार याजक थे; अर याईरी ईरा भी दाऊद का एक मंत्री था।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.