Haryanvi Bible
2 शमूएल 2
दाऊद के हेब्रोन म्ह राज्य करण का वृत्तान्त
इसकै बाद दाऊद नै यहोवा तै पूच्छया, “के मै यहूदा के किसे नगर म्ह जाऊँ?” यहोवा नै उसतै जवाब दिया, “हाँ, जा।” दाऊद नै फेर पूच्छया, “किस नगर म्ह जाऊँ?” उसनै कह्या, “हेब्रोन1 म्ह।” फेर दाऊद यिज्रेली नगर अहीनोअम, अर कर्मेली नगर के नाबाल की बिधवा अबीगैल नाम की, अपणी दोन्नु घर आळियाँ समेत ओड़ै गया। दाऊद अपणे साथियाँ नै भी एक-एक कै घराने समेत ओड़ै लेग्या; अर वे हेब्रोन आसै-पासै के गाम्मां म्ह रहण लाग्गे। अर यहूदी लोग गए, अर ओड़ै दाऊद का अभिषेक करया के वो यहूदा के घराने का राजा हो। जिब दाऊद नै यो समाचार मिल्या, के जिननै शाऊल ताहीं माट्टी दी वे गिलाद नगर के याबेश नगर के माणस सैं। फेर दाऊद नै दूत्तां के जरिये गिलाद के याबेश के माणसां कै धोरै यो कुह्वा भेज्या, “यहोवा की आशीष थारे पै हो, क्यूँके थमनै अपणे राजा शाऊल पै या दया करकै उस ताहीं माट्टी दी।”
इस खात्तर इब यहोवा थारे तै दया अर सच्चाई का बरताव करै; अर मै भी थारी इस भलाई का बदला थारे ताहीं दियुँगा, क्यूँके थमनै यो काम करया सै। इब हिम्मत राक्खो, अर शूरवीर बणो; क्यूँके थारा राजा शाऊल मर ग्या, अर यहूदा के घराने नै अपणे उप्पर राजा होण खात्तर मेरा अभिषेक करया सै।
ईशबोशेत इस्राएल का राजा
पर नेर का बेट्टा अब्नेर जो शाऊल का प्रधान सेनापति था, उसनै शाऊल के बेट्टे ईशबोशेत ताहीं गैल ले पार जाकै महनैम2 म्ह पोहचाया; अर उसनै ईशबोशेत ताहीं गिलाद अशूरियाँ के देश, यिज्रेल, एप्रैम, बिन्यामीन, बल्के सारे इस्राएल परदेस पै राजा ठैहराया। शाऊल का बेट्टा ईशबोशेत चाळीस साल का था जिब वो इस्राएल पै राज करण लाग्या, अर दो साल ताहीं राज्य करदा रह्या। पर यहूदा का घराना दाऊद कै पक्ष म्ह रह्या। अर दाऊद का हेब्रोन म्ह यहूदा के घराने पै राज्य करण का समय साढ़े सात साल था।
यहूदा अर इस्राएल के बीच युद्ध
एक दिन नेर का बेट्टा अब्नेर, अर शाऊल के बेट्टे ईशबोशेत के माणस, महनैम यरदन नदी के पार गिबोन नगर तक आए। फेर सरूयाह3 का बेट्टा योआब, अर दाऊद के आदमी, हेब्रोन तै लिकड़कै उनतै गिबोन के जलकुण्ड कै धोरै मिले; अर दोन्नु दल उस जलकुण्ड के एक-एक ओड़ बैठगे। फेर अब्नेर नै योआब तै कह्या, “जवान माणस उठकै म्हारे स्याम्ही कुश्ती करै।” योआब नै कह्या, “वे उठैं।” फेर वे उठे, अर बिन्यामीन गोत्र के, यानिके शाऊल के बेट्टे ईशबोशेत के पक्ष खात्तर बारहा आदमी गिणकै लिकड़े, अर दाऊद के माणस भी बारहा लिकड़े। अर उननै एक दुसरे का सिर पकड़कै अपणी-अपणी तलवार एक दुसरे के पाँजर म्ह घोप दी; अर वे एक्के साथ मरे। इसतै उस जगहां का नाम हेल्कथस्सूरीम4 पड़या, वा गिबोन म्ह सै।
असाहेल की मौत
उस दिन बड़ा घोर युद्ध होया; अर अब्नेर अर इस्राएल के माणस दाऊद के सिपाहियाँ तै हारगे। ओड़ै योआब, अबीशै, अर असाहेल नाम के सरूयाह जनान्नी के तीन्नु बेट्टे थे। असाहेल जंगळी हिरण के जिसा तेज भाजण आळा था। फेर असाहेल अब्नेर का पिच्छा करण लाग्या, अर उसका पिच्छा करदे होए ना तो सोळी ओड़ मुड़या ना ओळी ओड़। अब्नेर नै पाच्छै मुड़कै पूच्छया, “के तू असाहेल सै?” उसनै कह्या, “हाँ मै वोए सूं।” अब्नेर नै उसतै कह्या, “चाहे सोळी, चाहे ओळी ओड़ मुड़, किसे जवान ताहीं पकड़कै उसका कवच ले ले।” पर असाहेल नै उसका पिच्छा न्ही छोड्या। अब्नेर नै असाहेल तै फेर कह्या, “मेरा पिच्छा छोड़ दे; मन्नै क्यूँ तेरे ताहीं मारकै माट्टी म्ह मिला देणा पड़ै? इसा करकै मै तेरे भाई योआब नै अपणा मुँह किस तरियां दिखाऊँगा5?” तोभी उसनै हट जाण तै मना करया; फेर अब्नेर नै अपणे भाले की पिछाड़ी उसके पेट म्ह इसी मारी, के भाला आर-पार होकै पाच्छै लिकड़या; अर वो ओड़ैए गिरकै मर ग्या। जितने माणस उस जगहां पै आए जित्त असाहेल गिरकै मर ग्या, ओड़ै वो सारे चुपचाप खड़े रहे।
अब्नेर अर योआब
पर योआब अर अबीशै अब्नेर का पिच्छा करदे रहे; अर सूरज डूबदे-डूबदे वे अम्माह नाम के उस पहाड़ी तक पोहचे, जो गिबोन के जंगळ की राह म्ह गीह कै स्याम्ही सै। अर बिन्यामीनी सिपाही अब्नेर कै पाच्छै होकै एक दल होगे, अर एक पहाड़ी की चोट्टी पै खड़े होए। फेर अब्नेर योआब नै पुकारकै कहण लाग्या, “के तलवार सदा चाल्दी रहवै? के तू न्ही जाणदा के इसका फळ दुखदाई होवैगा? तू कद ताहीं अपणे माणसां नै हुकम न्ही देवैगा, के वे अपणे भाईयाँ का पिच्छा छोड़कै बोहड़ जावै?” योआब नै उत्तर दिया, “परमेसवर के जीवन की कसम, के जै तू इसा न्ही बोल्या होन्दा, तो मेरे सिपाहियाँ नै सबेरै तक अपणे भाईयाँ ताहीं भगा दिया होन्दा।” फेर योआब नै नरसिंगा फूँक्या; अर सारे माणस ठहरगे, अर फेर इस्राएलियाँ का पिच्छा न्ही करया, अर फेर लड़ाई न्ही करी।
अब्नेर अपणे माणसां समेत उस्से दिन रातों-रात अराबा तै होकै गया; अर यरदन पार हो सारे बित्रोन देश म्ह होकै महनैम म्ह पोहच्या। योआब अब्नेर का पिच्छा छोड़कै बोहड़या; अर जिब उसनै सारे माणसां ताहीं कठ्ठा करया, फेर के देख्या, के दाऊद के सिपाहियाँ म्ह तै उन्नीस सिपाही अर असाहेल भी न्ही सैं। पर दाऊद के माणसां नै बिन्यामीनियाँ अर अब्नेर के माणसां ताहीं इसा मारया के उन म्ह तै तीन सौ साठ माणस मरगे। अर योआब अर उसके सिपाहियाँ नै असाहेल ताहीं ठाकै उसके पिता के कब्रिस्तान म्ह, जो बैतलहम म्ह था, माट्टी दी। फेर योआब अपणे माणसां समेत रात भर चालकै सबेरै ताहीं हेब्रोन म्ह पोहच्या।
Source notes (5)
- Footnote हेब्रोन हेब्रोन। यहूदा के दक्षिणी पहाड़ी देश म्ह यो महत्वपूर्ण नगर (यरुशलेम के दक्षिण-पश्चिमी म्ह तकरीबन 30 किलोमीटर [19 मील] अर समुन्दर तल तै 915 मीटर [2,975 फुट] उप्पर) का पैहला उल्लेख उत्पत्ति 13:18 म्ह करया गया सै अर इसके बाद अक्सर पुराणे नियम म्ह दिखाई देवै सै। इसे किर्यतअर्बा (उत्पत्ति 23:2) और मम्रे (उत्पत्ति 35:27) भी कह्या जावै सै। इस प्रसंग म्ह इसका राजनैतिक महत्व स्पष्ट हो जावै सै।
- Footnote महनैम यरदन नदी के पार महनैम नगर तक
- Footnote सरूयाह दाऊद की भाण वास्तव म्ह योआब बाद म्ह बदला लेण खात्तर अब्नेर को मार डालैगा। 3:27
- Footnote हेल्कथस्सूरीम तलवार की जगहां
- Footnote इसा करकै मै तेरे भाई योआब नै अपणा मुँह किस तरियां दिखाऊँगा वास्तव म्ह योआब बाद म्ह बदला लेण खात्तर अब्नेर नै मार देगा। (2 शमूएल 3:27)
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.