Haryanvi Bible
2 शमूएल 16
सीबा की चतुराई
दाऊद चोट्टी पै तै थोड़ी दूर बढ़ ग्या था, के मपीबोशेत का कर्मचारी सीबा एक जोड़ी, जीन बाँधे होए गध्यां पै दो सौ रोट्टी, किशमिश की सौ टिकियाँ, धूपकाल के फळ की सौ टिकियाँ, अर कुप्पी भर दाखमधु, लादे होए अचानक उसतै आ मिल्या। राजा नै सीबा तै पूच्छया, “इनतै तेरा के मतलब सै?” सीबा नै जवाब दिया, “गधे तो राजा के घराने की सवारी खात्तर सैं, अर रोट्टी अर धूपकाल के फळ जवानां के खाण कै खात्तर सैं, अर दाखमधु ज्यांतै सै के जो कोए जंगळ म्ह थक जावै वो उस ताहीं पीवै।” राजा नै पूच्छया, “फेर तेरे स्वामी का पोत्ता मपीबोशेत कित्त सै?” सीबा नै राजा तै धोक्खा देते होए जवाब दिया, “वो तो या कहकै यरुशलेम म्ह रहग्या, के इब इस्राएल का घराना मन्नै मेरे बाप-दादाओं का राज्य फेर देवैगा।” राजा नै सीबा तै कह्या, “जो कुछ मपीबोशेत का था वो सारा तेरे ताहीं मिलग्या।” सीबा नै कह्या, “प्रणाम; हे मेरे प्रभु, हे राजा, मेरे पै तेरे अनुग्रह की नजर बणी रहवै।”
शिमी का श्राप
जिब दाऊद राजा बहूरीम नगर तक पोहच्या, फेर शाऊल का एक कुटुम्बी ओड़ै तै लिकड़या, वो गेरा का बेट्टा शिमी था; अर वो कोसदा होया चल्या आया। वो दाऊद पै, अर दाऊद राजा के सारे कर्मचारियाँ पै पत्थर फेकण लाग्या; अर शूरवीरां समेत सारे माणस उसकी दाई बाई दोन्नु और थे। शिमी कोसदा होया या बकदा गया, “दूर हो खून्नी, दूर हो ओच्छे, लिकड़ज्या, लिकड़ज्या! यहोवा नै तेरे तै शाऊल के घराने के खून का पूरा बदला लिया सै, जिसकी जगहां पै तू राजा बण्या सै; यहोवा नै राज्य ताहीं तेरे बेट्टे अबशालोम कै हाथ कर दिया सै। अर ज्यांतै के तू खून्नी सै, तू अपणी बुराई म्ह आप फँस ग्या।”
फेर सरूयाह के बेट्टे अबीशै नै राजा तै कह्या, “यो मरया होया कुत्ता मेरे स्वामी राजा नै क्यूँ श्राप देण पावै? मन्नै ओड़ै जाकै उसका सिर काटण दे।” राजा नै कह्या, “सरूयाह के बेट्यो, यो मेरा या थारा काम कोनी? वो जो कोसै सै, अर यहोवा नै जो उसतै कह्या सै, के दाऊद नै श्राप दे, तो उसतै कौण पूछ सकै सै, के तन्नै इसा क्यूँ करया?” फेर दाऊद नै अबीशै अर अपणे सारे कर्मचारियाँ तै कह्या, “जिब मेरा अपणा बेट्टा ए मेरी जान का दुश्मन सै, तो यो बिन्यामीनी इब इसा क्यूँ ना करै? उसनै रहण द्यो, अर श्राप देण द्यो; क्यूँके यहोवा नै उसतै कह्या होवैगा। कदे भी यहोवा इस उपद्रव पै, जो मेरे पै हो रह्या सै, नजर करकै आज के श्राप के बदलै मेरे ताहीं भला बदला दे।” फेर दाऊद अपणे माणसां समेत अपणे रास्ता चल्या गया, अर शिमी उसकै स्याम्ही के पहाड़ के किनारे पै तै श्राप देन्दा, अर उसपै पत्थर अर धूळ फेंकदा होया चल्या गया। राजा अपणे गैल के सारे माणसां समेत यरदन नदी पै थक्या होया पोहच्या; अर ओड़ै विश्राम करया।
यरुशलेम म्ह अबशालोम का प्रवेश
अबशालोम सारे इस्राएली माणसां समेत यरुशलेम म्ह आया, अर उसकै गैल अहीतोपेल भी आया। जिब दाऊद का मित्तर एरेकी हूशै अबशालोम कै धोरै पोहच्या, फेर हूशै नै अबशालोम तै रुक्का मारकै कह्या, “राजा चिरंजीव रहवै! राजा चिरंजीव रहवै!” अबशालोम नै उसतै कह्या, “के यो तेरा प्यार सै जो तू अपणे मित्तर तै राक्खै सै? तू अपणे मित्तर के गैल क्यूँ न्ही गया?” हूशै नै अबशालोम तै जवाब दिया, “इसा न्ही; जिसनै यहोवा अर वे माणस, के बल्के सारे इस्राएली माणस चाहवैं, उस्से का मै सूं, अर उस्से कै गैल मै रहूँगा। अर फेर मै किसकी सेवा करुँ? के उसके बेट्टे के स्याम्ही रहकै सेवा ना करुँ? जिसा मै तेरे पिता कै स्याम्ही रहकै सेवा करया करदा, उस्से तरियां ए तेरे स्याम्ही रहकै सेवा करुँगा।”
फेर अबशालोम नै अहीतोपेल तै कह्या, “थम अपणी सलाह द्यो, के, के करणा चाहिये?” अहीतोपेल नै अबशालोम तै कह्या, “जिन रखैल्लां ताहीं तेरा बाप भवन की चौक्सी करण कै खात्तर छोड़ ग्या, उनकै धोरै तू जा; अर जिब सारे इस्राएली या सुणैगें, के अबशालोम का बाप उसतै नफरत करै सै, फेर तेरे सारे साथी हिम्मत बाँधैगें।” आखर उसकै खात्तर भवन की छात के उप्पर एक तम्बू खड़या करया गया, अर अबशालोम सारे इस्राएल कै देखदे अपणे बाप की रखैल्लां कै धोरै गया। उन दिनां जो सलाह अहीतोपेल दिया करदा, वो इसी होया करदी के मानो कोए परमेसवर का वचन पूछ लेन्दा हो; अहीतोपेल चाहे दाऊद नै चाहे अबशालोम नै, जो-जो सलाह देन्दा वा इसीए होया करदी।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.