Haryanvi Bible
2 शमूएल 10
अम्मोनियाँ अर अरामियां की हार
इसकै बाद अम्मोनियाँ का राजा नाहाश मर ग्या, अर उसका हानून नाम का बेट्टा उसकी जगहां पै राजा होया। फेर दाऊद नै यो सोच्या, “जिस तरियां हानून के पिता नाहाश नै मेरे ताहीं प्यार दिखाया था, उस्से तरियां मै भी हानून नै प्यार दिखाऊँगा।” फेर दाऊद नै अपणे कई कर्मचारियाँ ताहीं उसकै धोरै उसके पिता की मौत कै बारै म्ह शान्ति देण खात्तर भेज दिया। अर दाऊद के कर्मचारी अम्मोनियाँ कै देश म्ह आए। पर अम्मोनियाँ के हाकिम अपणे स्वामी हानून तै कहण लाग्गे, “दाऊद नै जो तेरे धोरै शान्ति देण आळे भेज्जे सैं, वो के तेरी समझ म्ह तेरे पिता का आदर करण कै विचार तै भेज्जे गए सैं? वो के दाऊद नै अपणे कर्मचारियाँ ताहीं तेरे धोरै इसे विचार तै न्ही भेज्या के इस नगर म्ह ढूँढ़-ढाँढ़ करकै अर इसका भेद लेकै इसनै उलट दे?” ज्यांतै हानून नै दाऊद के कर्मचारियाँ ताहीं पकड्या, अर उनकी आधी-आधी दाढ़ी मुँण्डवाकै अर आध्धे कपड़े, यानिके नितम्ब ताहीं कटवाकै, उन ताहीं जाण दिया। इस घटना की खबर पाकै दाऊद नै कुछ माणसां ताहीं उनतै मिलण कै खात्तर भेज्या, क्यूँके वे राजा कै स्याम्ही आण तै घणा शरमावै थे। अर राजा नै या कह्या, “जिब तक थारी दाढ़ियाँ बढ़ ना जावै जिब ताहीं यरीहो म्ह ठैहरे रहो, फेर बोहड़ आईयो।”
अम्मोन अर सीरिया की हार
जिब अम्मोनियाँ नै देख्या के म्हारे तै दाऊद नाराज सै, फेर अम्मोनियाँ नै बेत्रहोब अर सोबा के बीस हजार अरामी प्याद्यां ताहीं, अर एक हजार माणसां समेत माका के राजा ताहीं, अर बारहा हजार तोबी माणसां ताहीं, वेतन पै बुलवाया।
या सुणकै दाऊद नै योआब अर शूरवीरां की सारी सेना ताहीं भेज्या। फेर अम्मोनी लिकड़े अर फाटक ए कै धोरै पाँति बाँधी; अर सोबा अर रहोब के अरामी अर तोब अर माका के माणस उनतै न्यारे मैदान म्ह थे।
या देखकै के आग्गै-पाच्छै दोन्नु म्हारे बिरुध्द पाँति बंधी सै, योआब नै सारे बड़े-बड़े इस्राएली वीरां म्ह तै घणाए ताहीं छाँटकै अरामियां के स्याम्ही उनकी पाँति बँधाई, अर और माणसां नै अपणे भाई अबीशै कै हाथ सौंप दिया, अर उसनै अम्मोनियाँ कै स्याम्ही उनकी पाँति बँधाई। फेर उसनै कह्या, “जै अरामी मेरे पै हावी होण लाग्गै, तो तू मेरी मदद करिये; अर जै अम्मोनी तेरे पै हावी होण लागैंगे, तो मै आकै तेरी मदद करुँगा। तू हिम्मत बाँध, अर हम अपणे माणसां अर अपणे परमेसवर के नगरां के निमित्त पुरुषार्थ करें; अर यहोवा जिसा उसनै आच्छा लाग्गै उसाए करै।” फेर योआब अर जो माणस उसकै गैल थे अरामियां तै युद्ध करण नै धोरै गए; अर अरामी उसके स्याम्ही तै भाज्जे। यो देखकै अरामी भाजगे सैं अम्मोनी भी अबीशै कै स्याम्ही तै भाजकै नगर कै भित्तर घुसे। फेर योआब अम्मोनियाँ कै धोरै तै बोहड़कै यरुशलेम म्ह आया।
फेर यो देखकै के हम इस्राएलियाँ तै हारगे सां सारे अरामी कठ्ठे होए। अर हदादेजेर नै दूत भेजकै फरात नदी कै पार उत्तरी दिशा के अरामियां ताहीं बुलवाया; अर वे हदादेजेर के सेनापति शोबक नै अपणा प्रधान बणाकै हेलाम कै नगर म्ह आए। इसकी खबर पाकै दाऊद नै सारे इस्राएलियाँ ताहीं कठ्ठा करया, अर यरदन पार होकै हेलाम म्ह पोहच्या। फेर अराम दाऊद कै खिलाफ पाँति बाँधकै उसतै लड़या। पर अरामी इस्राएलियाँ तै भाजगे, अर दाऊद नै अरामियां म्ह तै सात सौ सारथी1 अर चाळीस हजार घुड़सवारां2 ताहीं मार गेरया, अर उनके सेनापति शोबक ताहीं इसा घायल करया के वो ओड़ैए मर ग्या। या देखकै कै हम इस्राएल तै हारगे सां, जितने राजा हदादेजेर कै अधीन थे उन सारया नै इस्राएल कै गैल संधि करी, अर उसके अधीन होगे। ज्यांतै अरामी अम्मोनियाँ की और मदद करण तै डरगे।
Source notes (2)
- Footnote रथ चलाण आळे
- Footnote या 40,000 पैदल चालण आळे सिपाही
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.