Haryanvi Bible
2 राजाओं 3
यहोराम के राज की शरुआत
यहूदा के राजा यहोशापात के राज के अठारहवें साल म्ह अहाब का बेट्टा यहोराम सामरिया म्ह राज करण लाग्या, अर बारहा साल ताहीं राज करदा रहया। उसनै वो करया जो यहोवा की नजर म्ह बुरा था फेर भी उसनै अपणे पिता अहाब अर माता ईजेबेल की तरियां न्ही करया बलके अपणे पिता के बणवाए होए बाल देवता के खम्बयाँ ताहीं तोड़ करया। फेर भी वो नबात के बेट्टे यारोबाम के इसे पापां म्ह जिसे उसनै इस्राएल तै भी कराए लिपट्या रहया अर उनतै ना मुड़या।
मोआब देश का राजा मेशा भोत सी भेड़-बकरी राख्या करै था, अर इस्राएल के राजा ताहीं कर कै रूप म्ह एक लाख भेड़ के बच्चे अर एक लाख मिंढयाँ की ऊन दिया करै था। जिब अहाब मर ग्या, फेर मोआब के मेशा राजा नै इस्राएल के अहाब राजा तै बलवा करया। एक दिन उस बखत राजा यहोराम नै सामरिया तै लिकड़कै सारे इस्राएल की गिणती ली। अर उसनै जाकै यहूदा के राजा यहोशापात कै धोरै यो सन्देसा भेज्या, “मोआब के राजा नै मेरे तै बलवा करया सै, के तू मेरै गैल मोआब तै लड़ण नै चाल्लैगा?” उसनै कह्या, “हाँ मै चाल्लूँगा, जिसा तू उसाए मै, जिसी तेरी प्रजा उसीए मेरी प्रजा, अर जिसे तेरे घोड़े उसे मेरे भी घोड़े सैं।” फेर उसनै पूच्छया, “हम किस रास्ता तै जावां?” उसनै जवाब दिया, “एदोम के बियाबान तै होकै।”
फेर इस्राएल का राजा, अर यहूदा का राजा, अर एदोम का राजा चाल्ले अर जिब सात दिन ताहीं घूमकै चाल लिए, फेर सेना अर उसकै पाच्छै-पाच्छै चालण आळे पशुआं कै खात्तर थोड़ा-सा भी पाणी ना मिल्या। अर इस्राएल के राजा यहोराम नै कह्या, “हाय! यहोवा नै इन तीन राजयां ताहीं ज्यांतै कठ्ठा करया, के उननै मोआब के हाथ म्ह कर दे।” पर यहूदा का राजा यहोशापात नै कह्या, “के उरै यहोवा का कोए नबी न्ही सै1, जिसकै जरिये हम यहोवा तै पूछै?” इस्राएल के राजा के किसे कर्मचारी नै जवाब देकै कह्या, “हाँ, शापात का बेट्टा एलीशा जो एलिय्याह के हाथां नै धुवाया करै था वो तो उरै सै।” फेर यहोशापात नै कह्या, “उसकै धोरै यहोवा का वचन पोहच्या करै सै।” फेर इस्राएल का राजा अर यहोशापात अर एदोम का राजा उसकै धोरै गए। फेर एलीशा नै इस्राएल के राजा तै कह्या, “मेरा तेरे तै के काम सै? अपणे पिता के नबियाँ अर अपणी माँ के नबियाँ कै धोरै जा।” इस्राएल के राजा नै उसतै उत्तर दिया, “इसा ना कहवै, क्यूँके यहोवा नै इन तीन्नु राजयां ताहीं ज्यांतै कठ्ठा करया, के इननै मोआब कै हाथ म्ह कर दे।” एलीशा नै कह्या, “सेनाओं का यहोवा जिसकै स्याम्ही मै हाजिर रहया करुँ सूं, उसके जीवन की कसम जै मै यहूदा के राजा यहोशापात का आदर मान ना करदा, तो मै ना तो तेरी और मुँह करदा अर ना तेरे पै ध्यान देन्दा। इब कोए बजाण आळा मेरै धोरै ले आओ।” जिब बजाण आळा बजाण लाग्या, फेर यहोवा की शक्ति एलीशा पै होई अर एलीशा नै फेर कह्या, “परमेसवर यो कवै सै इस नाळे नै थम माणस इतणा खोद्दो, के इस म्ह खड्डे ए खड्डे हो जावैं। क्यूँके यहोवा न्यू कहवै सै, ‘थारै स्याम्ही ना तो हवा चाल्लैगी, अर ना बारिस होवैगी; फेर भी या नदी पाणी तै भर ज्यागी; अर अपणे गां बळदा अर डांगरां समेत थम पीण पाओगे। अर यो यहोवा की नजर म्ह छोट्टी सी बात सै; यहोवा मोआब नै भी थारै हाथ म्ह कर देगा। फेर थम सारे गढ़ आळे अर उत्तम नगरां नै नाश करणा, अर सारे आच्छे दरखतां नै काट गेरणा, अर पाणी के सारे चोयां नै भर देणा, अर सारे आच्छे खेत्तां म्ह पत्थर फेंक कै उननै बिगाड़ देणा।’” सुबेरै ताहीं अन्नबलि चढ़ाण कै बखत एदोम की और तै पाणी बह आया, अर देश पाणी तै भरग्या।
जिब यो सारै मोआबियाँ सुण्या के राजयां नै म्हारे तै युद्ध करण कै खात्तर चढ़ाई करी सै, जितने मोआबियाँ की हालत हथियार बाँधण लायक थी, वे सब बुलाकै कठ्ठे करे गए, अर हद पै खड़े होए। सुबेरै ताहीं जिब वे उठे उस बखत सूरज की किरण उस पाणी पै इसी पड़ी के वो मोआबियाँ कै स्याम्ही की और तै लहू जिसा लाल दिखाई पड़या। तो वे एक-दुसरे नै कहण लाग्गे, “वो तो लहू होवैगा, बेशक वे राजा एक दुसरे नै मारकै नाश होगे सैं, इस करकै इब हे मोआबिओ लूटण नै जाओ।” अर जिब वे इस्राएल की छावणी कै धोरै आए ए थे, के इस्राएली उठकै मोआबियाँ नै मारण लाग्गे अर वे उनकै स्याम्ही तै भाजगे; अर वे मोआब ताहीं मारदे-मारदे उनके देश म्ह पोहचगे। अर उननै नगरां ताहीं गेर दिया, अर सारे आच्छे खेत्तां म्ह एक-एक आदमी नै अपणा-अपणा पत्थर गेर कै उन ताहीं भर दिया; अर पाणी के सारे चोयां ताहीं भर दिया; अर सारे आच्छे-आच्छे दरखतां ताहीं काट गेरया, उरै तक के कीरहरासत की राजधानी के पत्थर तो रहगे, पर उस ताहीं भी च्यांरु और गोपिया चलाण आळयां नै जाकै मारया। यो देखकै के हम युद्ध म्ह हार चाल्ले, मोआब के राजा नै सात सौ तलवार राक्खण आळे माणस गैल लेकै एदोम के राजा तक पाँति चीर कै पोंहचण की कोशिश करी पर पोहच ना सक्या। फेर उसनै अपणे जेठ्ठे बेट्टे ताहीं जो उसकी जगहां पै राज करण आळा था पकड़कै शहरपनाह पै होमबलि चढ़ाया। इस कारण इस्राएल पै बड़ा ए छो होया, ज्यांतै वे उसनै छोड़कै अपणे देश नै बोहड़गे। 2
Source notes (2)
- Footnote के उरै यहोवा का कोए नबी न्ही सै यो जाणणा जरूरी था क्यूँके ओड़ै बाल के अनेक नबी थे।
- Footnote पुराणे नियम म्ह एक कथन सै “म्हारे उप्पर घणा छो आया” जिसका मतलब सै के सारे इस्राएली क्रोधित परमेसवर तै डरै सै क्यूँके परमेसवर उननै उनकै इस काम कै खात्तर सजा देवैगा
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.