Haryanvi Bible
2 राजाओं 25
यहूदा का पतन अर गुलाम्मी
सिदकिय्याह नै बाबेल के राजा तै बलवा करया। उसके राज के नौवें साल के दसवें महिन्ने के दसवें दिन म्ह बाबेल के राजा नबूकदनेस्सर नै अपणी पूरी सेना लेकै यरुशलेम पै चढ़ाई करी, अर उस ताहीं घेर लिया अर उसके च्यांरु और मीनार बणाई। इस तरियां नगर सिदकिय्याह राजा के राज के ग्यारहवें साल ताहीं घिरया रहया। उसी साल के चौथे महिन्ने के नौवें दिन तै नगर म्ह अकाळ उरै तक बढ़ ग्या, के देश के माणसां कै खात्तर किमे खाण नै ना रहया। फेर नगर की शहरपनाह म्ह दरार करी गई, अर दोन्नु दीवारां कै बीच जो फाटक राजा की बारी कै धोरै था उस रास्ता तै सारे योद्धा राते-रात लिकड़ भाज्जे जब के कसदी नगर नै घेरे होए थे, राजा नै अराबा का राह लिया। फेर कसदियाँ की सेना नै राजा सिदकिय्याह का पिच्छा करया, अर उस ताहीं यरीहो कै धोरै के मैदान म्ह जा पकड्या, अर उसकी पूरी सेना उसकै धोरै तै तित्तर-बितर होगी। फेर वे राजा नै पकड़कै रिबला शहर म्ह बाबेल के राजा कै धोरै लेगे, अर उस ताहीं सजा का हुकम दिया गया। उननै सिदकिय्याह के बेट्टे ताहीं उसकै स्याम्ही घात करया अर सिदकिय्याह की आँख फोड़ दी अर उस ताहीं पीतळ की बेड़िया तै जकड़ कै बाबेल म्ह लेगे।
यरुशलेम का विनाश
बाबेल के राजा नबूकदनेस्सर के उन्नीसवें साल के पाँचवें महिन्ने के सातमै दिन म्ह अंगरक्षकां का प्रधान नबूजरदान जो बाबेल के राजा का एक कर्मचारी था, यरुशलेम म्ह आया। उसनै यहोवा के भवन अर राजभवन अर यरुशलेम के सारे घरां ताहीं यानिके हर एक बड़े घर ताहीं आग लगाकै फूँक दिया। यरुशलेम के च्यांरु और की शहरपनाह नै कसदियाँ की पूरी सेना नै जो अंगरक्षकां के प्रधान कै गैल थी गेर दिया। जो माणस नगर म्ह रहगे थे, अर जो माणस बाबेल के राजा कै धोरै भाजगे थे, अर साधारण लोग जो रहगे थे, इन सारया नै अंगरक्षकां का प्रधान नबूजरदान बन्दी बणाकै लेग्या। पर अंगरक्षकां के प्रधान नै यहूदा देश के कंगालां म्ह तै कितन्याँ ताहीं दाख की बारियां म्ह काम अर खेत्तां म्ह देख-भाळ करण नै छोड़ दिया।
यहोवा के भवन म्ह जो पीतळ के खम्भे अर कुर्सी अर पीतळ का हौद जो यहोवा के भवन म्ह था, इन ताहीं कसदी तोड़कै उनका पीतळ बाबेल म्ह लेगे। हाँड़ियाँ, फावड़ियाँ, चिमट्यां, धूपदानां अर पीतळ के सारे बरतनां नै भी जिनतै सेवा पाणी होवै थी, वे लेगे। कड़छे अर कटोरी जो सोन्ने की थी, अर जो कुछ चाँदी का था, वो सारा सोन्ना, चाँदी, अंगरक्षकां का प्रधान लेग्या। दोन्नु खम्भे, एक हौद अर कुर्सी जिस ताहीं सुलैमान नै यहोवा के भवन कै खात्तर बणाया था, इन सारी चिज्जां का पीतळ तौल तै बाहर था। एक-एक खम्भे की ऊँचाई अठारह-अठारह हाथ की थी अर एक-एक खम्भे के उप्पर तीन-तीन हाथ ऊँच्ची पीतळ की एक-एक कँगणी थी, अर एक-एक कँगणी पै च्यांरु और जो जाळी अर अनार बणे थे, वे सारे पीतळ के थे। अंगरक्षकां के प्रधान नै सरायाह महायाजक अर उसके नीच्चै के याजक सपन्याह अर तीन्नु द्वारपालां ताहीं पकड़ लिया। यरुशलेम शहर म्ह तै उसनै एक हाकिम ताहीं पकड्या जो सारे योद्धा कै उप्पर था, अर जो माणस राजा कै स्याम्ही रहया करैं थे, उन म्ह तै पाँच जन जो नगर म्ह मिले, अर सेनापति का मुंशी जो माणसां नै सेना म्ह भरती करया करै था; अर माणसां म्ह तै साठ माणस जो नगर म्ह मिले। इन ताहीं अंगरक्षकां का प्रधान नबूजरदान पकड़कै रिबला के राजा कै धोरै लेग्या। फेर बाबेल के राजा नै उन ताहीं हमात देश के रिबला म्ह इसा मारया के वे मरगे। आखर यहूदी बन्दी बणाकै अपणे देश म्ह तै लिकाड़ दिए गए।
गदल्याह की हत्या
जो माणस यहूदा देश म्ह रहगे, जिन ताहीं बाबेल के राजा नबूकदनेस्सर नै छोड़ दिया, उनपै उसनै अहीकाम के बेट्टे गदल्याह ताहीं जो शापान का पोत्ता था अधिकारी ठहराया। जिब दलां के सारे प्रधानां नै1 यानिके नतन्याह के बेट्टे इश्माएल कारेह के बेट्टे योहानान, नतोपाई, तन्हूमेत के बेट्टे सरायाह अर किसी माकाई के बेट्टे याजन्याह नै अर उनके जनां नै यो सुण्या, के बाबेल के राजा नै गदल्याह ताहीं अधिकारी ठहराया सै, फेर वे अपणे-अपणे जनां समेत मिस्पा नगर म्ह गदल्याह कै धोरै आए। गदल्याह नै उनतै अर उनके जनां नै शपथ खाकै कह्या, “कसदियाँ के सिपाहियाँ तै ना डरो, देश म्ह रहन्दे होए बाबेल के राजा कै अधीन रहो, फेर थारा भला होवैगा।” पर आखरी साल कै सातवें महिन्ने म्ह नतन्याह का बेट्टा इश्माएल, जो एलीशामा का पोत्ता अर राजवंश का था, उसनै दस जन गैल लेकै गदल्याह कै धोरै जाकै उस ताहीं इसा मारया के वो मर ग्या, अर जो यहूदी अर कसदी उसकै गैल मिस्पा म्ह रहवैं थे, उन ताहीं भी मार गेरया। फेर के छोट्टे के बड़े सारी प्रजा के माणस अर दलां के प्रधान कसदियाँ के डर के मारे उठकै मिस्र म्ह जाकै रहण लाग्गे।
यहोयाकीन की रिहाई
फेर यहूदा के राजा यहोयाकीन की गुलाम्मी के तैंतीसवें साल म्ह यानिके जिस साल बाबेल का राजा एवील्मरोदक राजगद्दी पै विराजमान होया, उसे के बारहवें महिन्ने के सताईसवें दिन नै उसनै यहूदा के राजा यहोयाकीन ताहीं जेळ तै लिकाड़कै बड़ा पद दिया। उसतै मीठे-मीठे वचन कहकै जो राजा उसकै गैल बाबेल म्ह कैदी थे उनके सिंहासनां तै उसके सिंहासन ताहीं घणा ऊँच्चा करया, यहोयाकीन नै जेळ के कपड़े बदल लिए अर उसनै जीवन भर रोज राजा कै स्याम्ही भोजन करया। अर रोज के खर्च कै खात्तर राजा कै उरै तै रोज का खर्च ठहराया गया जो उसके जीवन भर लगातार उसनै मिलदा रहया।
Source notes (1)
- Footnote दलां के सारे प्रधानां नै वे सेना प्रधान जो सिदकिय्याह के साथ यरुशलेम तै भाग गए थे अर तित्तर-बितर होकै लुह्क गए थे। (2 राजा. 25:4, 2 राजा. 25:5)
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.