Haryanvi Bible
2 राजाओं 20
हिजकिय्याह का मौत तै बचणा
उन दिनां म्ह हिजकिय्याह इसा रोगी होया के मरण पै था, अर आमोस के बेट्टे यशायाह भविष्यवक्ता नै उसकै धोरै जाकै कह्या, “यहोवा न्यू कहवै सै, के अपणे घरान्ने कै बारै म्ह जो हुकम देणा हो वो दे; क्यूँके तू न्ही बचैगा, मर ज्यागा।” फेर उसनै दीवार की और मुँह फेर1, यहोवा तै प्रार्थना करकै कह्या, “हे यहोवा! मै बिनती करुँ सूं, याद कर2, के मै सच्चाई अर खरे मन तै अपणे-आपनै तेरै सम्मुख जाणकै चालदा आया सूं; अर जो तन्नै आच्छा लाग्गै सै वोए मै करदा आया सूं।” फेर हिजकिय्याह फूट-फूटकै रोया। फेर इसा होया के यशायाह आँगण कै बीच तै जाण भी ना पाया था के यहोवा का यो वचन उसकै धोरै पोहच्या, “बोहड़कै मेरी प्रजा के प्रधान हिजकिय्याह तै कह, के तेरे मूलपुरुष दाऊद का परमेसवर यहोवा न्यू कहवै सै, के मन्नै तेरी प्रार्थना सुणी अर तेरे आँसू देक्खे सैं; देख, मै तन्नै चंगा करुँ सूं; परसों तू यहोवा के भवन म्ह जा सकैगा। मै तेरी उम्र पन्द्रह साल और बढ़ा दियुँगा। अश्शूर के राजा कै हाथ तै तन्नै अर इस यरुशलेम कै नगर नै बचाऊँगा, अर मै अपणे करकै अर अपणे दास दाऊद कै करकै इस नगर की हिफाजत करुँगा।” फेर यशायाह नै राजा कै कर्मचारी तै कह्या, “अंजीरां की एक टिकिया ले।” जिब उस ताहीं उसनै लेकै फोड़े पै बाँध्या, फेर वो चंगा होग्या।
हिजकिय्याह नै यशायाह तै कह्या, “यहोवा जो मेरै ताहीं चंगा करैगा अर मै परसों यहोवा के भवन म्ह जा सकूँगा, इसका के निशान होवैगा?” यशायाह नै कह्या, “यहोवा जो अपणे कहे होए वचन नै पूरा करैगा, इस बात का यहोवा की और तै तेरै खात्तर यो निशान होवैगा, के धूपघड़ी की छाया दस अंश आग्गै बढ़ ज्यागी, या दस अंश घट ज्यागी।” हिजकिय्याह नै कह्या, “छाया का दस अंश आग्गै बढ़णा तो सोक्खी सी बात सै, ज्यांतै इसा हो के छाया दस अंश पाच्छै घट ज्या।” फेर यशायाह भविष्यवक्ता नै यहोवा तै पुकारया, अर राजा आहाज की धूपघड़ी की छाया, जो दस अंश ढळ चुकी थी, यहोवा नै उस ताहीं पाच्छै की ओड़ घटा दिया।
हिजकिय्याह का अभिमान अर उसकी सजा
उस बखत बलदान का बेट्टा बरोदक-बलदान जो बाबेल का राजा था, उसनै हिजकिय्याह के रोगी होण की चर्चा सुणकै, उसकै धोरै चिट्ठी अर भेंट भेज्जी। उनके ल्याण आळयां की मानकै हिजकिय्याह नै उन ताहीं अपणे अनमोल पदार्थां का सारा भण्डार, अर चाँदी अर सोन्ना अर सुगन्ध-द्रव्य अर उत्तम तेल अर अपणे हथियारां का पूरा घर अर अपणे भण्डारां म्ह जो-जो चीज थी, वे सब दिखाई; हिजकिय्याह के भवन अर सारे राज म्ह कोए इसी चीज ना रही, जो उसनै उनतै ना दिखाई हो।
फेर यशायाह भविष्यवक्ता नै हिजकिय्याह राजा कै धोरै जाकै पूच्छया, “वे माणस के कहगे? अर कित्त तै तेरै धोरै आए थे?” हिजकिय्याह नै कह्या, “वे तो दूर देश तै यानिके बाबेल तै आए थे।” फेर उसनै पूच्छया, “तेरे भवन म्ह उननै के-के देख्या सै?” हिजकिय्याह नै कह्या, “जो कुछ मेरे भवन म्ह सै, वो सब उननै देख्या। मेरे भण्डारां म्ह कोए इसी चीज न्ही, जो मन्नै उनतै ना दिखाई हो।”
फेर यशायाह नै हिजकिय्याह तै कह्या, “यहोवा का वचन सुण ले। इसे दिन आणआळे सैं, जिन म्ह जो कुछ तेरे भवन म्ह सैं, अर जो कुछ तेरे पुरखां का धरया होया आज कै दिन ताहीं भण्डारां म्ह सै वो सारा बाबेल म्ह ठा ले जाया जावैगा; यहोवा न्यू कहवै सै, के किमे चीज ना बचैगी। अर जो बेट्टे तेरे वंश म्ह पैदा हों, उन म्ह तै भी कुछ नै वे बन्दी बणाकै ले जावैंगे; अर वे खोजे बण कै बाबेल के राजभवन म्ह रहवैगें।” फेर हिजकिय्याह नै यशायाह तै कह्या, “यहोवा का वचन जो तन्नै कह्या सै, वो भलाए सै;” क्यूँके उसनै सोच्या, “जै मेरे दिनां म्ह शान्ति अर सच्चाई बणी रहवैगी? तो के यो भला न्ही सै?” हिजकिय्याह के और सारे काम अर उसकी सारी वीरता अर किस तरियां उसनै एक तलाब अर नहर खुदवाकै नगर म्ह पाणी पोंहचा दिया, यो सबके यहूदा के राजयां कै इतिहास की किताब म्ह न्ही लिख्या सै? अन्त म्ह हिजकिय्याह मरकै अपणे पुरखां कै गैल जा मिल्या अर उसका बेट्टा मनश्शे उसकी जगहां पै राज करण लाग्या।
Source notes (2)
- Footnote दीवार की और मुँह फेर क्यूँके वो भगति म्ह रुकावट रहित प्रार्थना करणा चाहवै था।
- Footnote याद कर पुराणी करार म्ह धर्मी जन के लिए समृद्धि अर लम्बी उम्र की प्रतिज्ञा थी। अपणी बिश्वासयोग्यता एवं निष्ठा से अभिक्ष हिजकिय्याह सविनय प्रेरित होण की कोशिश करदा सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.