Haryanvi Bible
1 शमूएल 30
दाऊद का अमालेकियाँ कै गैल संघर्ष
तीसरे दिन जिब दाऊद अपणे माणसां समेत सिकलग पोहच्या, फेर उननै के देख्या, के अमालेकियाँ नै दक्षिण देश अर सिकलग पै चढ़ाई करी। अर सिकलग ताहीं मारकै फूँक दिया, अर उस म्ह की जनान्नी अर छोट्टे-बड़े जितने थे, सारे ताहीं बन्दी बणाकै ले गए; उननै किसे ताहीं मारया तो न्ही था, पर सारया नै लेकै अपणा राह लिया। ज्यांतै जिब दाऊद अपणे माणसां समेत उस नगर म्ह पोहच्या, फेर नगर तो जळा पड्या था, अर जनानियाँ अर बेट्टे-बेटियाँ गुलाम्मी म्ह चली गई थी। फेर दाऊद अर वे माणस जो उसके गैल थे चिल्लाकै इतणा रोए, के फेर उन म्ह रोण की शक्ति ना रही। दाऊद की दोन्नु घरआळी, यिज्रेली अहीनोअम, अर कर्मेली नाबाल की जनान्नी अबीगैल, बन्दी बणा ली गई थी। अर दाऊद बड़े संकट म्ह पड्या; क्यूँके माणस अपणे बेट्टे-बेटियाँ के कारण घणे दुखी होकै उसपै पथराव करण की चर्चा कर रहे थे। पर दाऊद नै अपणे परमेसवर यहोवा ताहीं स्मरण करकै हियाव बाँध्या।
फेर दाऊद नै अहीमेलेक के बेट्टे एब्यातार याजक तै कह्या, “एपोद नै मेरे धोरै ल्या।” फेर एब्यातार एपोद ताहीं दाऊद के धोरै ले आया। अर दाऊद नै यहोवा तै पूच्छया, “के मै इस दल का पिच्छा करुँ? के उस ताहीं जा पकड़ूँगा?” उसनै उसतै कह्या, “पिच्छा कर; क्यूँके तू पक्का उसनै पकड़ैगा, अर बे-शक सारया किमे छुड़ा ल्यावैगा;” फेर दाऊद अपणे छः सौ साथी जनां ताहीं लेकै बसोर नामकी नदी ताहीं पोहच्या; ओड़ै कुछ माणस पाच्छै ए रह गए। दाऊद तो च्यार सौ माणसां समेत पिच्छा करदा होया चला गया; पर दो सौ जो इसे थक गए थे, के बसोर नदी के पार ना जा सके औड़ै ए रहे।
उननै एक मिस्री माणस मैदान म्ह मिल्या, उननै उस ताहीं दाऊद के धोरै ले जाकै रोट्टी दी; अर उसनै उस ताहीं खाया, फेर उसनै पाणी पिलाया, फेर उन ताहीं उसनै अंजीर की टिकिया का एक टुकड़ा अर दो गुच्छे किशमिश दिए। अर जिब उसनै खाया, फेर उसके जी म्ह जी आया; उसनै तीन दिन अर तीन रात तै ना तो रोट्टी खाई थी अर ना पाणी पिया था। फेर दाऊद नै उसतै पूछ्या, “तू किसका जन सै? अर कित्त का सै?” उसनै कह्या, “मै तो मिस्री जवान अर एक अमालेकी माणस का दास सूं; अर तीन दिन होए के मै बीमार पड्या, अर मेरा स्वामी मन्नै छोड़ ग्या। हम माणसां नै करेतियां की दक्षिण दिशा म्ह, अर यहूदा के देश म्ह, अर कालेब की दक्षिण दिशा म्ह चढ़ाई करी; अर सिकलग ताहीं आग लगाकै फूँक दिया था।” दाऊद नै उसतै पूछ्या, “के तू मन्नै उस दल के धोरै पोंहचा देवैगा?” उसनै कह्या, “मेरे तै परमेसवर की या कसम खा, के तू मन्नै ना तो जान तै मारैगा, अर ना मेरे स्वामी के हाथ कर देगा, फेर मै तन्नै उस दल के धोरै पोंहचा दियुँगा।”
जिब उसनै उसे पोहचाया, फेर देखण म्ह आया के वे सारी धरती पै छिटके होए खान्दे-पीन्दे, अर उस बड़ी लूट के कारण, जो वे पलिश्तियाँ के देश अर यहूदा देश तै ल्याए थे, नाच रहे सैं। ज्यांतै दाऊद उन ताहीं रात के पैहले पहर तै लेकै दुसरे दिन की साँझ ताहीं मारदा रह्या; उरै ताहीं के च्यार सौ जवानां नै छोड़, जो ऊँटां पै चढ़कै भाज गए, उन म्ह तै एक भी माणस ना बच्या। अर जो किमे अमालेकी ले गए थे वो सारा दाऊद नै छुड़ाया; अर दाऊद नै अपणी दोन्नु जनानियाँ ताहीं भी छुड़ा लिया। बलके उनके के छोट्टे, के बडे़, के बेट्टे, के बेटियाँ, के लूट का माल, सारा किमे जो अमालेकी ले गए थे, उस म्ह तै किमे चीज ना रही जो उन ताहीं ना मिली हो; क्यूँके दाऊद सारै का सारा बोहड़ा ल्याया। अर दाऊद नै सारी भेड़-बकरियाँ, अर गां-बळध भी लूट लिए; अर इन ताहीं माणस या कहन्दे होए अपणे जानवरां के आग्गै हाँकदे गए, के या दाऊद की लूट सै।
फेर दाऊद उन दो सौ माणसां के धोरै आया, जो इसे थक गए थे के दाऊद के पाच्छै-पाच्छै ना जा सके थे, अर बसोर नदी के धोरै छोड़ दिए गए थे; अर वे दाऊद तै अर उसकै गैल के माणसां तै मिलण ताहीं चाल्ले; अर दाऊद नै उनके धोरै पोहचकै उनका हाल-चाल पूच्छया। फेर उन माणसां म्ह तै जो दाऊद के गैल गए थे सारे दुष्ट अर ओच्छे माणसां नै कह्या, “ये लोग म्हारे गैल न्ही चाल्ले थे, इस कारण हम उन ताहीं अपणे छुड़ाए होए लूट के माल म्ह तै किमे न्ही देवांगे, सिर्फ एक-एक माणस ताहीं उसकी जनान्नी अर बाळ-बच्चे देवांगे, के वे उननै लेकै चले जावैं।” पर दाऊद नै कह्या, “हे मेरे भाईयो, थम उस लूट के माल के गैल इसा ना करण पाओगे जिस ताहीं यहोवा नै म्हारे ताहीं दिया सै; अर उसनै म्हारी रक्षा करी, अर उस दल ताहीं जिसनै म्हारे उप्पर चढ़ाई करी थी म्हारे हाथ म्ह कर दिया सै। अर इस बारै म्ह थारी कौण सुणैगा? लड़ाई म्ह जाण आळे का जिसा भाग हो, सामान के धोरै बैठ्ठे होए का भी उसाए भाग होवैगा; दोन्नु एक ए बराबर भाग पावैंगें।” अर दाऊद नै इस्राएलियाँ के खात्तर इसीए विधि अर नियम ठैहराया, अर वो उस दिन तै लेकै आग्गै ताहीं बलके आज लग बण्या सै।
सिकलग म्ह पोहचकै दाऊद नै यहूदी पुरनियां के धोरै जो उसके मित्तर थे लूट के माल म्ह तै किमे-किमे भेज्या, अर या खबर भेजी, “यहोवा के दुश्मनां तै ली होई लूट म्ह तै थारे खात्तर या भेंट सै।” यानिके बेतेल के दक्षिण देश के रामोत1, यत्तीर2, अरोएर3, सिपमोत, एश्तमो4, राकाल5, यरहमेलियाँ6 के नगरां, केनियाँ के नगरां, होर्मा7, कोराशान8, अताक, हेब्रोन अर जितने स्थानां म्ह दाऊद अपणे माणसां समेत फिरया करै था, उन सारया के पुरनियां के धोरै उसनै किमे-किमे भेज्या।
Source notes (8)
- Footnote रामोत रामोत की पहचान शायद बालत-बीयर तै करी जाणी सै, जो शिमोन के गोत्र का एक नगर सै (यहोशू 19:8)।
- Footnote यत्तीर यत्तीर हेब्रोन तै तकरीबन उन्नीस किलोमीटर (या बाराह मील) दक्षिण-दक्षिण पश्चिम म्ह था ( यहो. 15:48; 21:14)
- Footnote अरोएर अरोएर यरदन नदी के पूर्व म्ह मौजूद था ( गिन. 32:34)।
- Footnote एश्तमो एश्तमो हेब्रोन तै तकरीबन बाराह किलोमीटर (या तकरीबन आठ मील) दक्षिण म्ह मौजूद था ( यहो. 15:50; 21:14)।
- Footnote राकाल कर्मेल
- Footnote यरहमेलियाँ यरहमेल के नगर। यरहमेल का कुल यहूदा के गोत्र का था ( 1 इति. 2:9; 25-27)।
- Footnote होर्मा होर्मा यहूदा के गोत्र के नगरां म्ह तै एक था ( यहो. 15:30)
- Footnote कोराशान कोराशान। यो नगर बीर-शेबा के उत्तर-पश्चिम म्ह लगभग आठ किलोमीटर (पाँच मील) की दूरी पै मौजूद सै अर पुराणे नियम म्ह कही और इस ताहीं आशान कह्या जावै सै ( यहो. 15:42; 19:7)।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.