Haryanvi Bible
1 शमूएल 23
दाऊद कै जरिये कीला नगर की रक्षा
दाऊद ताहीं यो समाचार मिल्या के पलिश्ती माणस कीला नगर तै युद्ध करण लागरे सैं, अर खलिहाणा ताहीं लूटण लागरे सैं। फेर दाऊद नै यहोवा तै पूच्छया, “के मै जाकै पलिश्तियाँ ताहीं मारूँ?” यहोवा नै दाऊद तै कह्या, “जा, अर पलिश्तियाँ ताहीं मार के कीला नै बचा।” पर दाऊद के जनां नै उसतै कह्या, “हम तो इस यहूदा देश म्ह भी डरदे रहवां सां, जै हम कीला जाकै पलिश्तियाँ की सेना का सामना करां, तो के हमनै घणाए डर न्ही लाग्गैगा?” फेर दाऊद नै यहोवा तै फेर पूच्छया, अर यहोवा नै उस ताहीं जवाब देकै कह्या, “कमर बाँधकै कीला जा; क्यूँके मै पलिश्तियाँ नै तेरे हाथ म्ह कर दियुँगा।” ज्यांतै दाऊद अपणे माणसां नै गैल लेकै कीला गया, अर पलिश्तियाँ तै लड़कै उनके पशुआं ताहीं हाँक ल्याया, अर उन ताहीं बड़ी मार तै मारया। आखर दाऊद नै कीला के निवासियां ताहीं बचाया।
जिब अहीमेलेक का बेट्टा एब्यातार दाऊद के धोरै कीला म्ह भाज ग्या था, फेर हाथ म्ह एपोद लिए होए गया था।
फेर शाऊल ताहीं या समाचार मिल्या के दाऊद कीला गया सै। अर शाऊल नै कह्या, “परमेसवर नै उस ताहीं मेरे हाथ म्ह कर दिया सै; वो तो फाटक अर बेंड़े आळे नगर म्ह घुसकै बन्द होग्या सै।” फेर शाऊल नै अपणी सारी सेना ताहीं लड़ाई खात्तर बुलवाया, ताके कीला जाकै दाऊद अर उसके जनां ताहीं घेर ले। फेर दाऊद नै जाण लिया के शाऊल मेरे नुकसान की युक्ति करण लागरया सै; ज्यांतै उसनै एब्यातार याजक तै कह्या, “एपोद ताहीं धोरै ले आ।” फेर दाऊद नै कह्या, “हे इस्राएल के परमेसवर यहोवा, तेरे दास नै पक्का सुण्या सै के शाऊल मेरे कारण कीला नगर नाश करण ताहीं आणा चाहवै सै। के कीला के माणस मन्नै उसके वश म्ह कर देंगे? के जिस तरियां तेरे दास नै सुण्या सै, उसे तरियां शाऊल आवैगा? हे इस्राएल के परमेसवर यहोवा, अपणे दास ताहीं या बता।” यहोवा नै कह्या, “हाँ, वो आवैगा।” फेर दाऊद नै पूच्छया, “के कीला के माणस मन्नै अर मेरे आदमियाँ ताहीं शाऊल के वश म्ह कर देंगे?” यहोवा नै कह्या, “हाँ, वे कर देंगे।” फेर दाऊद अर उसके जन जो कोए छः सौ थे, कीला तै लिकड़ गए, अर आस्सै-पास्सै जित्त किते जा सके ओड़ै गए। अर जिब शाऊल ताहीं या बताया गया के दाऊद कीला तै लिकड़ भाज्या सै, फेर उसनै ओड़ै जाण का विचार छोड़ दिया।
दाऊद जंगल के गढां म्ह
फेर दाऊद जंगळ के गढां म्ह रहण लाग्या, अर पहाड़ी देश के जीप नाम के जंगळ म्ह रह्या। अर शाऊल उसनै रोज ढूँढ़दा रह्या, पर परमेसवर नै उस ताहीं उसके हाथ म्ह ना पड़ण दिया। अर दाऊद नै जाण लिया के शाऊल मेरे प्राण की खोज म्ह लिकड्या सै। अर दाऊद जीप नाम के जंगळ की होरेश नाम की जगहां म्ह था; शाऊल का बेट्टा योनातान उठकै उसके धोरै होरेश म्ह गया, अर परमेसवर की चर्चा करकै उसनै हिम्मत दिलाई। उसनै उसतै कह्या, “मत डर; क्यूँके तू मेरे पिता शाऊल के हाथ म्ह न्ही पड़ैगा; अर तू ए इस्राएल का राजा होवैगा, अर मै तेरे नीच्चै होऊँगा; अर इस बात नै मेरा पिता शाऊल भी जाणै सै।” फेर उन दोनुवां नै यहोवा की कसम खाकै आप्पस म्ह करार करया; फेर दाऊद होरेश म्ह रहग्या, अर योनातान अपणे घर चल्या गया।
फेर जीपी माणस गिबा म्ह शाऊल के धोरै जाकै कहण लाग्गे, “दाऊद तो म्हारे धोरै होरेश के गढां म्ह, यानिके उस हकीला नाम की पहाड़ी पै छिप्या रहया, जो यशीमोन1 के दक्षिण की और सै। इस खात्तर इब, हे राजा, तेरी जो इच्छा आण की सै, तो आ; अर उसनै राजा के हाथ म्ह पकड़वा देणा म्हारा काम होवैगा।” शाऊल नै कह्या, “यहोवा की आशीष थारै पै हो, क्यूँके थमनै मेरे पै दया करी सै। थम चालकै और भी पक्का कर ल्यो; अर देख-भाळ कर जाण ल्यो, अर उसके अड्डे का पता लाग्या ल्यो, अर पता लगाओ के उसनै ओड़ै किसनै देख्या सै; क्यूँके किसे नै मेरै तै कह्या सै, के वो बड़ी चतुराई तै काम करै सै। ज्यांतै जित्त किते वो छुप्या करदा उन सारे स्थानां ताहीं देख-देखकै पहचाणो, फेर पक्का करकै मेरे धोरै लौट आणा। अर मै थारै गैल चाल्लूँगा, अर जै वो उस देश म्ह किते भी हो, तो मै उसनै यहूदा के हजारां म्ह तै ढूँढ़ लिकाडूँगा।”
फेर वे चालकै शाऊल तै पैहले जीप ताहीं गए। पर दाऊद अपणे माणसां समेत माओन नाम के जंगळ म्ह चल्या गया था, जो अराबा म्ह यशीमोन के दक्षिण की और सै। फेर शाऊल अपणे माणसां नै गैल लेकै उसकी खोज म्ह गया। इसकी खबर पाकै दाऊद पर्वत पै तै उतर के माओन जंगळ म्ह रहण लाग्या। यो सुण शाऊल नै माओन जंगळ म्ह दाऊद का पिच्छा करया। शाऊल तो पहाड़ की एक और, अर दाऊद अपणे माणसां समेत पहाड़ की दुसरी और जा रह्या था; अर दाऊद शाऊल के डर के मारे तावळा जा रह्या था, अर शाऊल अपणे माणसां समेत दाऊद अर उसके जनां ताहीं पकड़ण कै खात्तर घेरा बणाणा चाहवै था, के एक दूत नै शाऊल के धोरै आकै कह्या, “फुर्ती तै चल्या आ; क्यूँके पलिश्तियाँ नै देश पै चढ़ाई करी सै।” यो सुण शाऊल दाऊद का पिच्छा छोड़कै पलिश्तियाँ का सामना करण नै चाल्या; इस कारण उस जगहां का नाम सेलाहम्म-हलकोत2 पड्या। ओड़ै तै दाऊद चढ़कै एनगदी3 के गढां म्ह रहण लाग्या।
Source notes (3)
- Footnote यशीमोन यशीमोन पूर्वी यहूदिया पहाड़ी देश म्ह मृत सागर के बराबर ऊबड़-खाबड़, उजाड़ धरती ताहीं जाण्या जावै सै। इसनै यहूदी बियाबान के नाम तै भी जाण्या जावै सै।
- Footnote सेलाहम्म-हलकोत बचाव की चट्टान
- Footnote एनगदी : एनगदी ताजे पाणी अर गरम झरणा आळा एक नखलिस्तान था। एनगदी नाम का मतलब बकरी के बच्चे का फव्वारा सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.