Haryanvi Bible
1 शमूएल 20
योनातान का दाऊद के प्रति वफादारी
फेर दाऊद रामाह के नबायोत तै भाज्या, अर योनातान के धोरै जाकै कहण लाग्या, “मन्नै के करया सै? मेरे तै के पाप होया? मन्नै तेरे पिता की नजर म्ह इसा कौण सा अपराध करया सै, के वो मेरे प्राण की खोज म्ह रहवै सै?” उसनै उसतै कह्या, “या बात कोनी; तू मारया न्ही जावैगा। सुण, मेरा पिता मेरे ताहीं बिना बताए ना तो कोए बड़ा काम करै सै अर ना कोए छोट्टा; फेर वो या बात मेरे तै क्यूँ छुपावैगा? इसी कोए बात कोनी।” फेर दाऊद नै कसम खाकै कह्या, “तेरा पिता पक्का जाणै सै के तेरे अनुग्रह की नजर मेरे पै सै; अर वो सोचदा होवैगा, के योनातान या बात ना जाणण पावै, इसा ना हो के वो दुखी हो जावै। पर यहोवा के जीवन की कसम अर तेरे जीवन की कसम, पक्का, मेरे अर मौत के बीच डंग भर का ए फासला सै।” योनातान नै दाऊद तै कह्या, “जो किमे तेरा जी चावै वोए मै तेरे खात्तर करुँगा।” दाऊद नै योनातान तै कह्या, “सुण कल नया चाँद1 होवैगा, अर मेरा ओड़ै होणा जरूरी सै ताके राजा के गैल बैठकै भोजन करुँ; पर तू मन्नै बिदा कर, अर मै परसों साँझ ताहीं मैदान म्ह छुप्या रहूँगा। जै तेरा पिता मेरी किमे चिन्ता करै, तो कहिए, ‘दाऊद नै अपणे नगर बैतलहम म्ह तावळी जाण खात्तर मेरे तै बिनती करकै छुट्टी माँगी सै; क्यूँके ओड़ै उसका सारे कुल खात्तर सालाना यज्ञ सै।’ जै वो यो कहवै, ‘आच्छा!’ फेर तो तेरे दास के खात्तर ठीक-ठाक होवैगा; पर जै उसका गुस्सा घणा भड़क उठे, तो जाण लिये के उसनै बुराई सोच राक्खी सै। अर तू अपणे दास तै दया का बरताव करिये, क्यूँके तन्नै यहोवा की कसम खाकै अपणे दास कै साथ करार करवाया सै। पर जै मेरे तै कुछ अपराध होया हो, तो तू आप मन्नै मार दिए; तू मन्नै अपणे पिता के धोरै क्यूँ पोहचावै?” योनातान नै कह्या, “या बात कदे भी ना हो! जै मै पक्का जाणदा के मेरे पिता नै तेरे तै बुराई करण की सोच राक्खी सै, तो के मै तेरे ताहीं न्ही बताऊँगा?” दाऊद नै योनातान तै कह्या, “जै तेरा पिता तेरे ताहीं कठोर जवाब दे, तो कौण मन्नै बतावैगा?” योनातान नै दाऊद तै कह्या, “चल हम मैदान कान्ही लिकड़ जावां।” अर वे दोन्नु मैदान की और चले गए।
फेर योनातान दाऊद तै कहण लाग्या, “इस्राएल के परमेसवर यहोवा की कसम, जिब मै कल या परसों इसी बखत अपणे पिता का भेद पाऊँ, फेर जै दाऊद की भलाई देक्खूँ, तो के मै उसे बखत तेरे धोरै दूत भेजकै तेरे ताहीं बताऊँगा? जै मेरे पिता का मन तेरी बुराई करण का हो, अर मै तेरे पै यो प्रगट करकै तन्नै बिदा ना करुँ के तू सही-सलामत चल्या जा, तो यहोवा योनातान तै इसाए बलके इसतै भी बाध करै। यहोवा तेरे गैल उसाए रहवै जिसा वो मेरे पिता के गैल रहया। अर ना सिर्फ जिब ताहीं मै जिन्दा रहूँ, तब तक मेरे पै यहोवा की सी दया इसी करिये, के मै ना मरुँ; पर मेरे घराने पै तै भी अपणी कृपादृष्टि कदे भी ना हटाईये! बलके जिब यहोवा दाऊद के हर एक दुश्मन ताहीं धरती पै तै नाश कर देवैगा, जिब भी इसा ना करिये।” इस तरियां योनातान नै दाऊद के घराने तै यो कहकै करार करवाया, “यहोवा दाऊद के दुश्मनां तै बदला ले।” अर योनातान दाऊद तै प्रेम राक्खै था, अर उसनै उसतै फेर कसम खुआई; क्यूँके वो उसतै अपणे प्राण के बराबर प्रेम राक्खै था।
फेर योनातान नै उसतै कह्या, “कल नया चाँद होवैगा; अर तेरी बाट देक्खी जावैगी, क्यूँके तेरी कुर्सी खाल्ली रहवैगी। अर तू तीन दिन के बीतण पै तुरन्त आईये, अर उस जगहां पै जाकै जित्त तू उस काम के दिन छुप्या था, यानिके एजेल2 नाम के पत्थर के धोरै रहिये। फेर मै उसकी और, मानो अपणे किसे ठहराए होए निशान पै तीन तीर चलाऊँगा। फेर मै अपणे टहलुए छोरे ताहीं यो कहकै भेज्जूँगा, के जाकै तीरां नै ढूँढ़ ल्या। जै मै उस छोरे तै साफ-साफ कहूँ, ‘देख, तीर इन्नै तेरे इस और सैं,’ तू उसनै ले आ, तो तू आ जाणा क्यूँके यहोवा के जीवन की कसम, तेरे खात्तर कल्याण ताहीं छोड़ और किमे न्ही होवैगा। पर जै मै छोरे तै यो कहूँ, ‘सुण, तीर उधर तेरे उस और सैं,’ तो तू चल्या जाईये, क्यूँके यहोवा नै तेरे ताहीं बिदा करया सै। अर उस बात के बारै म्ह जिसकी चर्चा मन्नै अर तन्नै आप्पस म्ह करी सै, यहोवा मेरे अर तेरे बीच म्ह सदा रहवै।”
ज्यांतै दाऊद मैदान म्ह जा छुप्या; अर जिब नया चाँद होया, फेर राजा भोजन करण ताहीं बैठ्या। राजा तो पैहले की तरियां अपणे उस आसन उप्पर बैठ्या जो दीवार के धोरै था; अर योनातान खड्या होया, अर अब्नेर शाऊल के धोरै बैठ्या, पर दाऊद की जगहां खाल्ली रही।
उस दिन तो शाऊल या सोचकै चुप रहया, के इसका कोए ना कोए ए कारण होवैगा; वो अशुद्ध होवैगा, शायद शुद्ध ना होवैगा। फेर नये चाँद के दुसरे दिन दाऊद की जगहां खाल्ली रही। आखर शाऊल नै अपणे बेट्टे योनातान तै पूच्छया, “के कारण सै के यिशै का बेट्टा ना तो कल खाणे पै आया था, अर ना आज आया?” योनातान नै शाऊल तै कह्या, “दाऊद नै बैतलहम जाण खात्तर मेरे तै बिनती करकै छुट्टी माँगी; अर कह्या, ‘मन्नै जाणे दे; क्यूँके उस नगर म्ह म्हारे कुल का यज्ञ सै, अर मेरे भाई नै मेरे ताहीं ओड़ै मौजूद होण का हुकम दिया सै। अर इब जै मेरे पै तेरे अनुग्रह की नजर हो, तो मन्नै जाण दे के मै अपणे भाईयाँ तै भेंट कर आऊँ।’ इस कारण वो राजा की मेज पै न्ही आया।”
फेर शाऊल का छो योनातान पै भड़क उठ्या, अर उसनै उसतै कह्या, “हे हठीले राजद्रोही माँ के बेट्टे, के मै न्ही जाणदा के तेरा मन तो यिशै के बेट्टे पै लागरया सै? इसतै तो तेरी आशा का टूटणा अर तेरी माँ का अनादर ए होवैगा। क्यूँके जिब ताहीं यिशै का बेट्टा धरती पै जिन्दा रहवैगा, तब ताहीं ना तो तू अर ना तेरा राज्य स्थिर रहवैगा। ज्यांतै इब्बे भेजकै उसनै मेरे धोरै ल्या, क्यूँके पक्का वो मार गेरया जावैगा।” योनातान नै अपणे पिता शाऊल ताहीं जवाब देकै उसतै कह्या, “वो क्यूँ मारया जावैगा? उसनै के करया सै?” फेर शाऊल नै उस ताहीं मारण कै खात्तर उसपै भाला चलाया; इसतै योनातान नै जाण लिया, के मेरे पिता नै दाऊद ताहीं मार देण नै ठान लिया सै। फेर योनातान गुस्सा तै जळदा होया मेज पै तै उठ ग्या, अर महिन्ने के दुसरे दिन ताहीं भोजन ना करया, क्यूँके वो घणाए दुखी था, ज्यांतै के उसके पिता नै दाऊद का अनादर करया था।
सुबेरै योनातान एक छोट्टा बाळक नै गैल लिए होए मैदान म्ह दाऊद के गैल ठहराए होए जगहां पै गया। फेर उसनै उस छोरे तै कह्या, “दौड़कै जो-जो तीर मै चलाऊँ उननै ढूँढ़ ले आ।” छोरा दौड़ ए रह्या था, के उसनै एक तीर उसके परै चलाया। जिब छोरा योनातान के चलाए तीर की जगहां पै पोहच्या, फेर योनातान नै उसकै पाच्छै तै पुकारकै कह्या, “तीर तो तेरी उस और सै।” फेर योनातान नै छोरे के पाच्छै तै पुकारकै कह्या, “फुर्ती कर, ठहर मत।” अर योनातान का छोरा तीरां ताहीं बटोरकै अपणे स्वामी के धोरै ले आया। इसका भेद छोरा तो किमे न्ही जाणै था; सिर्फ योनातान अर दाऊद इस बात नै जाणै थे। योनातान नै अपणे हथियार उस छोरे ताहीं देकै कह्या, “जा, इननै नगर म्ह पोंहचा।” जिस तरियां ए छोरा गया, उसे तरियां ए दाऊद दक्षिण दिशा की और तै लिकड्या, अर धरती पै औंधे मुँह गिरकै तीन बार दण्डवत करया; फेर उननै एक दुसरे ताहीं चुम्या, अर एक दुसरे के साथ रोए, पर दाऊद का रोणा घणा था। फेर योनातान नै दाऊद तै कह्या, “बेफिकर होकै चल्या जा; क्यूँके हम दोनुआं नै एक दुसरे तै यो कहकै यहोवा के नाम की कसम खाई सै, के यहोवा मेरे अर तेरे बीच, अर मेरे अर तेरे वंश कै बीच म्ह सदा रहे।” फेर वो उठकै चला ग्या; अर योनातान नगर म्ह गया।
Source notes (2)
- Footnote चाँद अमावस्या। इस्राएलियों नै हरेक अमावस्या की रात नै एक धार्मिक समारोह आयोजित करया, यानी वा रात जिसपै आध्धा चाँद पैहली बार फेर तै दिखाई दिया। इस उत्सव के गिनती 28:11-15 म्ह पाए जावै सै। त्यौहार आगले चौबीस घंटा के दौरान जारी रहया
- Footnote एजेल पत्थरां का ढेर
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.