Haryanvi Bible
1 शमूएल 18
दाऊद अर योनातान की दोस्ती
जिब वो शाऊल तै बात कर चुक्या, फेर योनातान का मन दाऊद पै इसा आ ग्या, के योनातान उसतै अपणी जान तै भी ज्यादा प्यार करण लाग्या। अर उस दिन शाऊल नै उस ताहीं अपणे धोरै राख्या, अर पिता के घर बोहड़ण ना दिया। फेर योनातान नै दाऊद तै करार करया, क्यूँके वो उसनै अपणी जान तै भी ज्यादा प्यार करया करै था। योनातान नै अपणा बागा जो वो खुद पहरे था उतारकै अपणे कपड़े समेत दाऊद ताहीं दे दिया, बल्के अपणी तलवार अर धनुष अर कमर का पट्टा भी उस ताहीं दे दिया। अर जित्त किते शाऊल दाऊद नै भेजदा ओड़ै वो जाकै बुद्धिमानी कै गैल काम करै था; आखर शाऊल नै उस ताहीं योद्धाओं का प्रधान नियुक्त करया। अर सारी प्रजा के माणस अर शाऊल के कर्मचारी उसतै खुश थे।
शाऊल की दाऊद के प्रति दुशमनी
जिब दाऊद उस पलिश्ती नै मारकै बोहड़ण लागरया था, अर वे सारे माणस भी आण लागरे थे, तब सारे इस्राएली नगरां तै बिरबानियाँ नै लिकड़कै डफ अर तिकोणे बाजे लिए होए, आनन्द कै गैल गान्दी अर नाचदी होई, शाऊल राजा के स्वागत म्ह लिकड़ी। अर वे बिरबान्नी नाचदी होई एक दुसरे के गैल या गान्दी गई,
“शाऊल नै तो हजारां ताहीं, पर दाऊद नै लाक्खां ताहीं मारया सै।”
फेर शाऊल घणाए छो म्ह होया, अर या बात उसनै बुरी लाग्गी; अर वो कहण लाग्या, “उननै दाऊद खात्तर तो लाक्खां अर मेरे खात्तर हजार ए ठैहराया; इस खात्तर इब राज्य ताहीं छोड़ उसनै इब के मिलणा बाकी सै?” उस दिन तै शाऊल दाऊद की ताक म्ह लाग्या रहया।
दुसरे दिन परमेसवर की और तै एक दुष्ट आत्मा शाऊल पै बल तै उतरया, अर वो अपणे घर के भित्तर नबूवत करण लाग्या; दाऊद रोज की तरियां अपणे हाथ तै बजा रह्या था अर शाऊल अपणे हाथ म्ह अपणा भाला लिए होए था; फेर शाऊल नै या सोचकै के “मै इसा मारूँगा के भाला दाऊद ताहीं बेधकै दीवार म्ह धस जावै,” उसनै भाला मारया, पर दाऊद उसके स्याम्ही तै दोन्नु बार हट ग्या।
शाऊल दाऊद तै डरया करै था, क्यूँके यहोवा दाऊद के गैल था अर शाऊल कै धोरै तै न्यारा होग्या था। शाऊल नै उस ताहीं अपणे तै अलग करकै सहस्त्रपति करया, अर वो प्रजा के स्याम्ही आया-जाया करै था। अर दाऊद अपणी पूरी चाल म्ह बुद्धिमानी दिखाया करै था; अर यहोवा उसके गैल-गैल था। जिब शाऊल नै देख्या के वो घणाए बुद्धिमान सै, तब वो उसतै डर ग्या। पर इस्राएल अर यहूदा के सारे माणस दाऊद तै प्रेम राक्खै थे; क्यूँके वो उनकै आगै-आगै युद्ध म्ह आया-जाया करै था अर जीत कै अपणे माणसां म्ह बोहड़ आवै था।
दाऊद अर मीकल का ब्याह
शाऊल नै यो सोचकै के “मेरा हाथ न्ही, बल्के पलिश्तियाँ का ए हाथ दाऊद पै पड़ै,” उसतै कह्या, “सुण, मै अपणी बड्डी बेट्टी मेरब तै तेरा ब्याह कर दियुँगा; इतणा कर, के तू मेरे लिये वीरता के साथ यहोवा की और तै युद्ध कर।” दाऊद नै शाऊल तै कह्या, “मै के सूं, अर मेरा जीवन के सै, अर इस्राएल म्ह मेरे पिता का कुल के सै, के मै राजा का दामाद हो जाऊँ?” जिब बखत आ ग्या के शाऊल की बेट्टी मेरब का दाऊद तै ब्याह करया जावै, फेर वो महोलाई नगर के अद्रीएल तै ब्याह दी गई।
अर शाऊल की बेट्टी मीकल दाऊद तै प्यार करण लाग्गी; अर जिब इस बात की खबर शाऊल नै मिली, फेर वो खुश होया शाऊल तो सोच्चै था, के वो उसकै खात्तर फंदा हो, अर पलिश्तियाँ का हाथ उसपै पड़ै। अर शाऊल नै दाऊद तै कह्या, “इब की बार तो तू पक्का ए मेरा दामाद हो जावैगा।” फेर शाऊल नै अपणे कर्मचारियाँ ताहीं हुकम दिया, “दाऊद तै छुपकै इसी बात करो, ‘सुण, राजा तेरे तै खुश सै, अर उसके सारे कर्मचारी भी तेरे तै प्रेम राक्खै सैं; इस खात्तर इब तू राजा का दामाद हो जा।’” फेर शाऊल के कर्मचारियाँ नै दाऊद तै इसीए बात कही। पर दाऊद नै कह्या, “मै तो निर्धन अर तुच्छ माणस सूं, फेर के तेरी नजर म्ह राजा का दामाद होणा छोट्टी बात सै?” जिब शाऊल के कर्मचारियाँ नै उस ताहीं बताया, के दाऊद नै इसी-इसी बात कही। फेर शाऊल नै कह्या, “थम दाऊद तै या कहो, ‘राजा कन्या का मोल तो किमे कोनी चाहवै, सिर्फ पलिश्तियाँ की एक सौ खलड़ियाँ चाहवै सै, के वो अपणे बैरियाँ तै बदला ले।’” शाऊल की योजना या थी, के पलिश्तियाँ के हाथ दाऊद नै मरवा दे। जिब उसके कर्मचारियाँ नै दाऊद ताहीं ये बात बताई, फेर वो राजा का दामाद होण खात्तर खुश होया। जिब ब्याह के कुछ दिन रहगे, फेर दाऊद अपणे माणसां नै गैल लेकै चाल्या, अर पलिश्तियाँ के दो सौ माणसां ताहीं मारया; तब दाऊद उनकी खलड़ियाँ ले आया, अर वे राजा नै गिण-गिणकै दी, ज्यांतै के वो राजा का दामाद हो जावै। आखर शाऊल नै अपणी बेट्टी मीकल का उसतै ब्याह कर दिया। जिब शाऊल नै देख्या, अर पक्का करया के यहोवा दाऊद के गैल सै, अर मेरी बेट्टी मीकल उसतै प्यार करै सै, फेर शाऊल दाऊद तै और भी डर ग्या। ज्यांतै शाऊल सदा खात्तर दाऊद का दुश्मन बणग्या।
फेर पलिश्तियाँ के प्रधान लिकड़ आए, अर जिब-जिब वे लिकड़ आए तब-तब दाऊद नै शाऊल के सारे कर्मचारियाँ तै घणीए बुद्धिमानी दिखाई; इसतै उसका नाम घणा बड़ा होग्या।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.