Haryanvi Bible
1 राजाओं 19
एलिय्याह का निराश होणा
जिब अहाब नै अपणी घरआळी ईजेबेल ताहीं एलिय्याह के सारे काम विस्तार तै बताए के उसनै सारे नबियाँ ताहीं तलवार तै किस तरियां मार गेरया। फेर ईजेबेल नै एलिय्याह कै धोरै एक दूत के जरिये कुह्वा भेज्जा, “जै मै कल इस्से बखत ताहीं तेरी जान उनकी जिसी ना कर दियुँ तो देवता मेरै गैल उसाए बल्के उसतै भी घणा करैं।” यो देख एलिय्याह डरकै अपणा प्राण लेकै भाज्या, अर यहूदा के बेर्शेबा नगर ताहीं पोहचकै अपणे सेवक ताहीं ओड़ैए छोड़ दिया।
अर एलिय्याह आप बियाबान म्ह एक दिन के राह पै जाकै एक झाऊ के पेड़ कै तळै बैठ ग्या, ओड़ै उसनै न्यू बिनती करकै अपणी मौत माँगी, “हे यहोवा बस, इब मेरा प्राण ले ले, क्यूँके मै अपणे पुरखां तै आच्छा न्ही सूं।” वो झाऊ के पेड़ तळै लेट कै सो ग्या अर देक्खो एक दूत नै उसतै छू कै कह्या, “उठकै खा।” उसनै देखकै के देख्या के मेरै सिरहाणै पत्थरां पै पकी होई एक रोट्टी, अर एक सुराही पाणी धरया सै; फेर उसनै खाया अर पिया अर फेर लेट ग्या। दुसरी बार यहोवा का दूत आया अर उसनै छू कै उसतै कह्या, “उठकै खा, क्यूँके तन्नै घणी लाम्बी यात्रा करणी सै।” फेर उसनै उठकै खाया-पिया; अर उस्से खाणे तै बल पाकै चाळीस दिन-रात चाल्दे-चाल्दे परमेसवर के पर्वत होरेब पै पोहच्या।
ओड़ै वो एक गुफा म्ह जाकै टिक्या अर यहोवा का यो वचन उसकै धोरै पोहच्या, “हे एलिय्याह तेरा उरै के काम?” उसनै जवाब दिया, “सेनाओं के परमेसवर यहोवा कै बारै म्ह मन्नै बड़ी जळण होई सै, क्यूँके इस्राएलियाँ नै तेरा करार टाळ दिया, तेरी वेदियाँ ताहीं गिरा दिया, अर तेरे नबियाँ ताहीं तलवार तै घात करया सै, अर मै ए एक्ला रहग्या सूं; अर वे मेरे भी प्राणां के खोजी सैं।” उसनै कह्या, “लिकड़कै यहोवा कै धोरै पर्वत पै खड्या हो।” अर यहोवा धोरै तै होकै चाल्या, अर यहोवा कै स्याम्ही एक घणी तेज आँधी तै पहाड़ पाट्टण अर चट्टान टूटण लाग्गी, फेर भी यहोवा उस आँधी म्ह ना था; फेर आँधी कै बाद भूकम्प होया, फेर भी यहोवा उस भूकम्प म्ह ना था। फेर भूकम्प कै बाद आग दिखाई दी, फेर भी यहोवा उस आग म्ह ना था; फेर आग कै बाद एक दब्या होया धीमा शब्द सुणाई दिया। यो सुणदे एलिय्याह नै अपणा मुँह चाद्दर तै ढक लिया, अर बाहर जाकै गुफा कै द्वार पै खड्या होग्या। फेर एक शब्द उसनै सुणाई दिया, “हे एलिय्याह तेरा उरै के काम?” उसनै कह्या1, “मन्नै सेनाओं के परमेसवर यहोवा कै बारै म्ह बड़ी जळण होई, क्यूँके इस्राएलियाँ नै तेरा करार टाळ दिया, अर उननै तेरी वेदियाँ ताहीं गिरा दिया सै अर तेरे नबियाँ ताहीं तलवार तै घात करया सै; अर मै ए एक्ला रहग्या सूं; अर वे मेरी जान के भी खोजी सैं।” यहोवा नै उसतै कह्या, “लौट कै दमिश्क के बियाबान म्ह जा, अर ओड़ै पोहचकै अराम का राजा होण कै खात्तर हजाएल का अभिषेक कर, अर इस्राएल का राजा होण नै निमशी के पोत्ते येहू का, अर अपणी जगहां पै नबी होण कै खात्तर आबेल-महोला नगर के शापात के बेट्टे एलीशा का अभिषेक करिये। अर हजाएल की तलवार तै जो कोए बच जावै उसनै येहू मार देवैगा; अर जो कोए येहू की तलवार तै बच जावै उसनै एलीशा मार देवैगा। फेर भी मै सात हजार इस्राएलियाँ नै बचाए राक्खूँगा। ये सारे तो वे सैं, जिननै ना तो बाल कै आग्गै घुटने टेक्के, अर ना मुँह तै उस ताहीं चुम्या सै अर न ही आराधना करी सै।” फेर वो ओड़ै तै चाल पड्या, अर शापात का बेट्टा एलीशा उसनै मिल्या जो बारहा जोड़ी बळध अपणे आग्गै करे होए आप बारहवीं जोड़ी कै गैल होकै हळ जोत्तण लागरया था। उसकै धोरै जाकै एलिय्याह नै अपणी चाद्दर2 उसपै गेर दी। फेर वो बळधां नै छोड़कै एलिय्याह कै पाच्छै दौड्या, अर कहण लाग्या, “मन्नै अपणे माँ-बाप नै चुम्ण दे, फेर मै तेरै पाच्छै चाल्लूँगा।” उसनै कह्या, “बोहड़ ज्या, मन्नै तेरे तै के करया सै?”3 फेर उसकै पाच्छै तै बोहड़ ग्या, अर एक जोड़ी बळध लेकै बलि करे, अर बळधां का सामान जळाकै उनका माँस पका कै अपणे माणसां ताहीं दे दिया, अर उननै खाया; फेर वो कमर बाँधकै एलिय्याह कै पाच्छै चाल्या, अर उसकी सेवा पाणी करण लाग्या।
Source notes (3)
- Footnote रोमियों 11:3
- Footnote अपणी चाद्दर एलिय्याह का या काम तो निशान्नी के तौर पै था। या दिखावै सै की एलिय्याह के बाद एलीशा नबी होवैगा
- Footnote मत्ती 8:21, लूका 9:61
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.