Haryanvi Bible
1 राजाओं 16
फेर बाशा कै बारै म्ह यहोवा का यो वचन हनानी के बेट्टे येहू नबी कै धोरै पोहच्या, “मन्नै तेरे ताहीं माट्टी पै तै ठाकै अपणी प्रजा इस्राएल का प्रधान बणाया, पर तू यारोबाम की जिसी चाल चालदा अर मेरी प्रजा इस्राएल तै इस्से पाप करवान्दा आया सै जिनतै वे मन्नै छो दुवावैं सैं। इब सुण, मै बाशा अर उसके घरान्ने की पूरी तरियां तै सफाई कर दियुँगा अर तेरे घरान्ने नै नबात के बेट्टे यारोबाम की तरियां कर दियुँगा। बाशा के घर का जो कोए नगर म्ह मर जावै, उसनै कुत्ते खा लेगें, अर उसका जो कोए मैदान म्ह मर जावै, उस ताहीं अकास के पंछी खा लेगें।”
बाशा के और सारे काम जो उसनै करे, अर उसकी सारी वीरता यो इस्राएल के राजयां कै इतिहास की किताब म्ह लिक्खी सै। अन्त म्ह बाशा मरकै अपणे पुरखां कै गैल जा मिल्या अर तिर्सा शहर म्ह उसतै माट्टी दी गई, अर उसका बेट्टा एला उसकी जगहां पै राज करण लाग्या। यहोवा का जो वचन हनानी के बेट्टे येहू के जरिये बाशा अर उसके घरान्ने कै बिरुध्द आया, वो ना सिर्फ उन सारी बुराइयां कै कारण आया जो उसनै यारोबाम के घरान्ने की तरियां होकै यहोवा की नजर म्ह करी थी अर अपणे काम्मां तै भी उस ताहीं छो दुवाया, बल्के इस कारण भी आया, के उसनै उस ताहीं मार गेरया था।
एला का राज
यहूदा के राजा आसा के राज्य के छब्बीसवें साल म्ह बाशा का बेट्टा एला तिर्सा म्ह इस्राएल पै राज करण लाग्या, अर दो साल ताहीं राज करदा रह्या। जिब वो तिर्सा म्ह अर्सा नाम के भण्डारी के घर म्ह जो उसके तिर्सा आळे भवन का प्रधान था, तो वो पी कै मतवाळा होग्या था, फेर उसके जिम्री नाम के एक कर्मचारी नै जो उसके आध्धे रथां का प्रधान था, राजद्रोह की साजिस करी अर भित्तर जाकै उस ताहीं मार गेरया, अर उसकी जगहां पै राजा बणग्या। यो यहूदा के राजा आसा के राज्य के सताईसवें साल म्ह होया।
अर जिब वो राज करण लाग्या, फेर गद्दी पै बैठदे उसनै बाशा के पूरे घरान्ने ताहीं मार गेरया, बल्के उसनै ना तो उसके कुटुम्बियाँ अर ना उसके साथियाँ म्ह तै एक छोरे ताहीं भी जिन्दा न्ही छोड्या। इस तरियां यहोवा के उस वचन कै मुताबिक जो उसनै येहू नबी के जरिये बाशा कै खिलाफ कह्या था, जिम्री नै बाशा के सारे घरान्ने का नाश कर दिया। इसका कारण बाशा के सारे पाप अर उसके बेट्टे एला के भी पाप थे, जो उननै अपणे आप करकै अर इस्राएल तै भी करवा कै इस्राएल के परमेसवर यहोवा ताहीं बेकार की बात्तां तै छो दुवाया था। एला के और सारे काम जो उसनै करे, के वो इस्राएल के राजयां कै इतिहास की किताब म्ह न्ही लिक्खे सैं।
जिम्री का राज
यहूदा के राजा आसा के सताईसवें साल म्ह जिम्री तिर्सा म्ह राज करण लाग्या, अर तिर्सा म्ह सात दिन ताहीं राज्य करदा रह्या। उस बखत माणस पलिश्तियाँ के देश गिब्बतोन के शहर के खिलाफ डेरे करे होए थे। तो जिब उन डेरे लगाऐ होए माणसां नै सुण्या, के जिम्री नै राजद्रोह की साजिस करकै राजा ताहीं मार गेरया सै, तो उसे दिन पूरे इस्राएल नै ओम्री नाम के प्रधान सेनापति ताहीं छावणी म्ह इस्राएल का राजा बणाया। फेर ओम्री नै सारे इस्राएल ताहीं गैल ले गिब्बतोन नै छोड़कै तिर्सा ताहीं घेर लिया। जिब जिम्री नै देख्या, के नगर ले लिया गया सै, फेर राजभवन के गुम्मट म्ह जाकै राजभवन म्ह आग लगा दी, अर उसे म्ह खुद जळ मरया। यो उसके पापां के कारण होया क्यूँके उसनै वो करया जो यहोवा की नजर म्ह बुरा था, क्यूँके वो यारोबाम की जिसी चाल अर उसके करे होए अर इस्राएल तै कराए होए पाप की लीक पै चाल्या। जिम्री के और काम अर जो राजद्रोह की साजिस उसनै करी, यो सारा इस्राएल के राजयां कै इतिहास की किताब म्ह लिख्या सै।
ओम्री का राज
फेर इस्राएली प्रजा दो हिस्यां म्ह बँटगी, प्रजा के आध्धे माणस तो तिब्नी नाम के गीनत के बेट्टे ताहीं राजा बणाण कै खात्तर उस्से कै पाच्छै हो लिए, अर आध्धे ओम्री कै पाच्छै हो लिए। अन्त म्ह जो माणस ओम्री कै पाच्छै होए थे वे उनपै हावी होगे जो गीनत के बेट्टे तिब्नी कै पाच्छै हो लिए थे, ज्यांतै तिब्नी मारया गया अर ओम्री राजा बणग्या। यहूदा के राजा आसा के इकतीसवें साल म्ह ओम्री इस्राएल पै राज करण लाग्या, अर बारहा साल ताहीं राज करदा रह्या; उसनै छः साल तो तिर्सा म्ह राज करया। अर उसनै शेमेर तै सामरिया पहाड़ ताहीं दो किक्कार चाँदी1 म्ह मोल लेकै, उसपै एक नगर बसाया; अर अपणे बसाए होए नगर का नाम पहाड़ के माल्लिक शेमेर कै नाम पै सामरिया धरया।
ओम्री नै वो करया जो यहोवा की नजर म्ह बुरा था बल्के उन सारया तै भी जो उसतै पैहल्या थे घणी बुराई करी। वो नबात के बेट्टे यारोबाम की जिसी सारी चाल चाल्या, अर उसके सारे पापां कै मुताबिक जो उसनै इस्राएल तै करवाऐ थे जिसके कारण इस्राएल के परमेसवर यहोवा तै उननै अपणे बेकार के काम्मां तै छो दुवाया था। ओम्री के और काम जो उसनै करे, अर जो वीरता उसनै दिखाई, यो सारा के इस्राएल के राजयां कै इतिहास की किताब म्ह न्ही लिख्या सै? ओम्री मरकै अपणे पुरखां कै गैल जा मिल्या अर सामरिया म्ह उस ताहीं माट्टी दी गई, अर उसका बेट्टा अहाब उसकी जगहां पै राज करण लाग्या।
अहाब के राज की शरुआत
यहूदा के राजा आसा के राज के अड़तीसवें साल म्ह ओम्री का बेट्टा अहाब इस्राएल पै राज करण लाग्या, अर इस्राएल पै सामरिया म्ह बाईस साल ताहीं राज करदा रह्या। अर ओम्री के बेट्टे अहाब नै उन सबतै घणे जो उसतै पैहल्या थे, वो काम करे जो यहोवा की नजर म्ह बुरे थे। उसनै तो नबात के बेट्टे यारोबाम के पापां म्ह चालणा हळकी सी बात जाणकै, सीदोनियां के राजा एतबाल की बेट्टी ईजेबेल तै ब्याह करकै बाल देवता2 की उपासना करी अर उस ताहीं दण्डवत करया।3 उसनै बाल का एक भवन सामरिया म्ह बणाकै उस म्ह बाल की एक वेदी बणाई। अर अहाब नै एक अशेरा भी बणाया, बलके उसनै उन सारे इस्राएली राजयां तै बढ़कै जो उसतै पैहला थे इस्राएल के परमेसवर यहोवा ताहीं छो दुआण के काम करे। उसके दिनां म्ह बेतेलवासी हीएल नै यरीहो ताहीं फेर बसाया; जिब उसनै उसकी नींव डाली फेर उसका जेठ्ठा बेट्टा अबीराम मर ग्या, अर जिब उसनै उसके फाटक खड़े करे तब उसका छोट्टा बेट्टा सगूब मर ग्या, यो यहोवा के उस वचन कै मुताबिक होया, जो उसनै नून के बेट्टे यहोशू के जरिये कुह्वाया था4।
Source notes (4)
- Footnote लगभग 70 किलोग्राम चाँदी
- Footnote बाल देवता बाल एक कनान का तूफान आळा अर उर्वरता आळा देवता था
- Footnote प्रकाशितवाक्य 2:20
- Footnote यहोशू के जरिये कुह्वाया था यहोशू 6:26
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.