Haryanvi Bible
1 राजाओं 14
यारोबाम के घरान्ने का न्याय
कुछ साल्लां कै बाद राजा यारोबाम का बेट्टा अबिय्याह रोगी होया। फेर यारोबाम नै अपणी जनान्नी तै कह्या, “इसा भेष बणा के कोए तन्नै पिछाण ना सकै के या यारोबाम की जनान्नी सै, अर शीलो के शहर ताहीं चली जा, ओड़ै अहिय्याह नबी रहवै सै जिसनै मेरै तै कह्या था ‘तू इस प्रजा का राजा हो जावैगा।’ उसकै धोरै तू दस रोट्टी, अर टिकियाँ अर एक कुप्पी मधु लेकै जा, अर वो तन्नै बतावैगा के छोरे का के होवैगा।”
यारोबाम की जनान्नी नै उसाए करया, अर चालकै शीलो ताहीं पोहची अर अहिय्याह के घर पै आई: अहिय्याह ताहीं तो किमे सूझ ना पड़ै था, क्यूँके बुढ़ापे कै कारण उसकी आँख धुन्धळी पड़गी थी। अर यहोवा नै अहिय्याह तै कह्या, “सुण यारोबाम की जनान्नी तेरे ताहीं अपणे बेट्टे कै बारै म्ह जो रोगी सै किमे पूछण खात्तर आवै सै, तू उसतै ये-ये बात कहिये; वा तो आकै अपणे ताहीं दुसरी जनान्नी बतावैगी।”
जिब अहिय्याह नै द्वार म्ह आन्दे होए उसके पैरां की आहट सुणी फेर कह्या, “हे यारोबाम की जनान्नी! भित्तर आ; तू अपणे नै क्यूँ दुसरी जनान्नी बणावै सै? मन्नै तेरे खात्तर बुरा सन्देसा मिल्या सै। तू जाकै यारोबाम तै कह के इस्राएल का परमेसवर यहोवा तेरे तै न्यू कहवै सै, ‘मन्नै तो तेरे ताहीं प्रजा म्ह तै बढ़ाकै अपणी प्रजा इस्राएल पै प्रधान बणाया, अर दाऊद के घरान्ने तै राज खोसकै तेरे तै दिया, पर तू मेरे दास दाऊद की तरियां ना होया जो मेरे हुकम नै मानदा, अर अपणे पूरे मन तै मेरै पाच्छै-पाच्छै चालदा, अर केवल वोए करै था जो मेरी नजर म्ह ठीक सै। तन्नै उन सारया तै बढ़कै जो तेरे तै पैहले थे बुराई, करी सै, अर जाकै पराए देवता की उपासना करी अर मूर्ति ढाळकै बणाई, जिसनै मेरै ताहीं छो म्ह कर दिया अर मेरै ताहीं तो पीठ कै पाच्छै फेंक दिया सै। इस करकै मै यारोबाम के घराने पै विपत्ति गेरुगां, बल्के मै यारोबाम के कुल म्ह तै हर एक छोरे नै अर के कैदी, के स्वाधीन इस्राएल कै बिचाळै हर एक रहणआळे नै भी नाश कर दियुँगा: अर जिसा कोए गोबर नै जिब ताहीं उठान्दा रहवै सै जिब तक वो सारा उठा न्ही लिया जान्दा, उसे तरियां ए मै यारोबाम के घरान्ने की सफाई कर दियुँगा। यारोबाम के घरान्ने का जो कोए नगर म्ह मर जावै, उसनै कुत्ते खावैंगे; अर जो मैदान म्ह मरै, उसनै अकास के पंछी खा जावैंगे; क्यूँके यहोवा नै यो कह्या सै।’ ज्यांतै तू उठ अर अपणे घर जा, अर नगर कै भित्तर तेरे पाँव पड़दे ए वो बाळक मर ज्यागा। उसनै तो सारे इस्राएली छात्ती पीटकै माट्टी देवैंगे; यारोबाम के सन्तानां म्ह तै केवल उसे नै कब्र मिलैगी, क्यूँके यारोबाम के घरान्ने म्ह तै उस्से म्ह किमे पाया जावै सै जो यहोवा इस्राएल के प्रभु की नजर म्ह भला सै। फेर यहोवा इस्राएल कै खात्तर एक इसा राजा खड्या करैगा जो उसे दिन यारोबाम के घरान्ने नै नाश कर देगा, पर कद? यो इब्बे होवैगा। क्यूँके यहोवा इस्राएल नै इसा मारैगा, जिसा पाणी की धारा तै नरकट हिलाया जावै सै, अर वो उननै इस आच्छी धरती म्ह तै जो उसनै उनके पुरखां तै दी थी उखाड़ कै फरात नदी कै पार तित्तर-बितर करैगा; क्यूँके उननै अशेरा नाम की मूर्ति अपणे खात्तर बणाकै यहोवा तै छो दिलाया सै। अर उन पापां के कारण जो यारोबाम नै करे अर इस्राएल तै कराए थे, यहोवा इस्राएल नै त्याग देगा।”
फेर यारोबाम की जनान्नी विदा होकै चली अर तिर्सा म्ह आई, अर वा भवन की देहळी पै जिब पोहची वो बाळक मर ग्या। फेर यहोवा के वचन कै मुताबिक जो उसनै अपणे दास अहिय्याह नबी तै कुह्वाया था, सारे इस्राएल नै उस ताहीं माट्टी देकै उसके खात्तर शोक मनाया। यारोबाम के और काम यानिके उसनै किसा-किसा युद्ध करया, अर किसा राज करया, यो सारा इस्राएल के राजयां के इतिहास की किताब म्ह लिख्या सै। यारोबाम बाईस साल ताहीं इस्राएल पै राज करकै मर ग्या अर अपणे पुरखां कै गैल जा मिल्या अर नादाब नाम का उसका बेट्टा उसकी जगहां पै राजा होया।
रहबाम का राज्य
सुलैमान का बेट्टा रहबाम यहूदा म्ह राज करण लाग्या। रहबाम इकताळीस साल का होकै राज करण लाग्या; अर यरुशलेम जिस ताहीं यहोवा नै सारे इस्राएली गोत्रां म्ह तै अपणा नाम राक्खण कै खात्तर चुण लिया था, उस नगर म्ह वो सत्रह साल ताहीं राज करदा रह्या; अर उसकी माँ का नाम नामाह था जो अम्मोनी जनान्नी थी। अर यहूदी लोग वो करण लाग्गे जो यहोवा की नजर म्ह बुरा सै, अर अपणे पुरखां तै भी घणे पाप करकै उसकी जळण भड़काई। उननै तो सारे ऊँच्चे टील्यां पै, अर सारे हरे दरखतां कै तळै, ऊँच्ची जगहां, अर लाठां, अर अशेरा नाम की मूर्ति बणा ली। अर उनके देश म्ह पुरुषगामी भी थे; वे उन जातियाँ म्ह तै सारे घिनोणे काम करैं थे जिन ताहीं यहोवा नै इस्राएलियाँ कै स्याम्ही तै लिकाड़ दिया था।
राजा रहबाम के पाँचवें साल म्ह मिस्र का राजा शीशक, यरुशलेम पै चढ़ाई करकै, यहोवा के भवन की अनमोल चीज अर राजभवन की अनमोल चिज्जें, सारी की सारी ठा लेग्या; अर सोन्ने की जितनी ढाल सुलैमान नै बणाई थी उन सारियां नै राजा शीशक लेग्या। ज्यांतै राजा रहबाम नै उनके बदलै पीतळ की ढाल बणवाई अर उननै रुखाळयां के प्रधानां कै हाथ सौंप दिया जो राजभवन के द्वार की रुखाळी करैं थे। अर जिब-जिब राजा यहोवा के भवन म्ह जावै था तब-तब रुखाळे उननै ठा ले चाल्दे, अर फेर अपणी कोठड़ी म्ह बोहड़कै धर देवैं थे।
रहबाम के और सारे काम जो उसनै करे वो के यहूदा के राजयां के इतिहास की किताब म्ह न्ही लिक्खे सैं? रहबाम अर यारोबाम म्ह तो सदा लड़ाई होन्दी रही। अर रहबाम जिसकी माँ नामाह नाम की एक अम्मोनिन थी, वो मरकै अपणे पुरखां कै गैल जा मिल्या; अर उन्हे कै धोरै दाऊदपुर म्ह उस ताहीं माट्टी दी गई: अर उसका बेट्टा अबिय्याम उसकी जगहां पै राज करण लाग्या।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.