Haryanvi Bible
1 राजाओं 11
सुलैमान का हृदय परमेसवर की और तै हट जाणा
पर राजा सुलैमान फिरौन की बेट्टी, अर भोत सी गैर जात की बिरबानियाँ तै, जो मोआबी, अम्मोनी, एदोमी, सीदोनी, अर हित्ती थी, प्यार करण लाग्या। वे उन जात्तां की थी, जिनकै बारै म्ह यहोवा नै इस्राएलियाँ तै कह्या था, “थम उनकै बिचाळै म्ह ना जाईयो, अर ना वे थारे बीच म्ह आण पावैं, वे थारा मन अपणे देवत्यां की और जरुर मोड़ैगी;” उनकै प्यार म्ह सुलैमान डूब ग्या। उसकै सात सौ राणी, अर तीन सौ रखैल1 होगी थी अर उसकी इन बिरबानियाँ नै उसका मन बहका दिया। आखर जिब सुलैमान बूढ़ा होया, तब उसकी बिरबानियाँ नै उसका मन पराए देवता की और बहका दिया, अर उसका मन अपणे पिता दाऊद की तरियां अपणे परमेसवर यहोवा पै पूरी तरियां तै लाग्या न्ही रह्या। सुलैमान तो सीदोनियां की अश्तोरेत2 नाम की देवी, अर अम्मोनियाँ के मिल्कोम नाम के घृणित देवत्यां कै पाच्छै चाल्या। इस तरियां सुलैमान नै वो करया जो यहोवा की नजर म्ह बुरा सै, अर यहोवा कै पाच्छै अपणे पिता दाऊद की रीति पै पूरी तरियां तै न्ही चाल्या। उन दिनां म्ह सुलैमान नै यरुशलेम कै स्याम्ही के पहाड़ पै मोआबियाँ के कमोश नाम के घृणित देवता कै खात्तर अर अम्मोनियाँ के मोलेक नाम के घृणित देवता कै खात्तर एक-एक ऊँच्चा स्थान बणाया। अर अपणी सारी गैर जात की बिरबानियाँ कै खात्तर भी जो अपणे-अपणे देवत्यां ताहीं धूप जळावै अर बलिदान करैं थी, उसनै इसाए करया।
फेर यहोवा नै सुलैमान पै छो करया, क्यूँके उसका मन इस्राएल के परमेसवर यहोवा तै मुड़ ग्या था जिसनै दो बार उस ताहीं दर्शन दिया था। अर उसनै इसे बात कै बारै म्ह हुकम दिया था, के पराए देवत्यां कै पाच्छै ना होइये, फेर भी उसनै यहोवा का हुकम न्ही मान्या। ज्यांतै यहोवा नै सुलैमान तै कह्या, “तन्नै जो इसा काम करया सै, अर मेरा करया होया करार अर दी होई विधि तन्नै पूरी न्ही करी, इस कारण मै राज्य नै जरुर तेरे तै खोसकै तेरे एक कर्मचारी ताहीं दे दियुँगा। फेर भी तेरे पिता दाऊद के कारण तेरे दिनां म्ह तो इसा न्ही करुँगा; पर तेरा बेट्टा कै हाथ तै राज्य खोस ल्यूँगा। फेर भी मै पूरा राज्य तो न्ही खोस ल्यूँगा, पर अपणे दास दाऊद कै कारण, अर अपणे चुणे होए यरुशलेम कै कारण, मै तेरे बेट्टे कै हाथ म्ह एक गोत्र छोड़ दियुँगा।” फेर यहोवा नै एदोमी हदद3 ताहीं जो एदोमी राजवंश का था, सुलैमान का दुश्मन बणा दिया। क्यूँके जिब दाऊद एदोम म्ह था, अर योआब सेनापति मारे होया ताहीं माट्टी देण गया, (योआब तो सारे इस्राएल समेत ओड़ै छः महिन्ने रह्या, जिब ताहीं के उसनै एदोम के सारे माणसां का नाश न्ही कर दिया) फेर हदद जो छोट्टा छोरा था, अपणे पिता के कई एक एदोमी सेवकां कै गैल मिस्र नै जाण की मनसा तै भाज्या। अर वे मिद्यान तै होकै पारान म्ह आए, अर पारान नाम कै बियाबान म्ह तै कई माणसां ताहीं गैल लेकै मिस्र म्ह फिरौन राजा कै धोरै गए, अर फिरौन नै उसतै घर दिया, अर उसके खाणे की व्यवस्था का हुकम दिया अर किमे जमीन भी दी। अर हदद पै फिरौन की बड़े अनुग्रह की नजर होई, अर उसनै उसतै अपणी साळी यानिके तहपनेस राणी की भाण ब्याह दी। अर तहपनेस की भाण तै गनूबत पैदा होया अर इसका दूध तहपनेस नै फिरौन के भवन म्ह छुड़ाया; फेर गनूबत फिरौन के भवन म्ह उसे के बेट्टे कै गैल रहवै था। जिब हदद नै मिस्र म्ह रहन्दे यो सुण्या, के दाऊद अपणे पुरखां कै गैल जा मिल्या, अर योआब सेनापति भी मर ग्या सै, फेर उसनै फिरौन तै कह्या, “मन्नै हुकम दे के मै अपणे देश म्ह जाऊँ!” फिरौन नै उसतै कह्या, “क्यूँ? मेरै उरै तन्नै के कमी होई के तू अपणे देश म्ह जाणा चाहवै सै?” उसनै जवाब दिया, “किमे न्ही होई, फेर भी मन्नै जरुर जाण दे।”
फेर परमेसवर नै उसका एक और दुश्मन बणा दिया, यानिके एल्यादा के बेट्टे रजोन ताहीं, वो तो अपणे स्वामी सोबा के राजा हदादेजेर कै धोरै तै भाज्या था; अर जिब दाऊद नै सोबा के माणसां ताहीं घात करया, फेर रजोन4 अपणे धोरै कई माणसां ताहीं कठ्ठे करकै, एक दल का प्रधान होग्या, अर वो दमिश्क5 म्ह जाकै ओड़ै रहण अर राज करण लाग्या। उस नुकसान कै गैल-गैल जो हदद नै करया, रजोन भी, सुलैमान के जीवन भर इस्राएल का दुश्मन बण्या रह्या; अर वो इस्राएल तै नफरत करदा होया अराम पै राज करै था। फेर नबात का अर सरूआह नाम की एक बिधवा का बेट्टा यारोबाम नाम का एक एप्रैमी सरेदावासी जो सुलैमान का कर्मचारी था, उसनै भी राजा के खिलाफ सिर ठाया। उसका राजा के खिलाफ सिर ठाण का यो कारण होया, के सुलैमान मिल्लो नै बणा रह्या था अर अपणे पिता दाऊद के नगर की दरार बन्द कर रह्या था। यारोबाम बड़ा शूरवीर था, अर जिब सुलैमान नै उस जवान ताहीं देख्या, के यो मेहनती सै; फेर उसनै उस ताहीं यूसुफ के कुण्बे के सारे काम पै मुखिया ठहराया। उन ए दिनां म्ह यारोबाम यरुशलेम तै लिकड़कै जाण लाग रह्या था, के शीलोवासी अहिय्याह नबी, नई चाद्दर ओढ़े होए रास्ता म्ह उसतै मिल्या; अर सिर्फ वेए दोन्नु मैदान म्ह थे। फेर अहिय्याह नै अपणी उस नई चाद्दर ताहीं ले लिया, अर उसनै पाड़कै बारहा टुकड़े कर दिए। फेर उसनै यारोबाम तै कह्या, “दस टुकड़े ले ले; क्यूँके, इस्राएल का परमेसवर यहोवा न्यू कहवै सै, ‘सुण, मै राज्य नै सुलैमान कै हाथ तै खोसकै दस गोत्र तेरै हाथ म्ह कर दियुँगा। पर मेरे दास दाऊद के कारण अर यरुशलेम के कारण जो मन्नै इस्राएल के सारे गोत्रां म्ह तै चुण्या सै, उसका एक गोत्र बण्या रहवैगा। इसका कारण यो सै के उननै मेरे ताहीं त्याग कै सीदोनियां की देवी अश्तोरेत अर मोआबियाँ के देवता कमोश, अर अम्मोनियाँ के देवता मिल्कोम तै दण्डवत करया, अर मेरे राह पै न्ही चाल्ले : अर जो मेरी नजर म्ह ठीक सै, वो न्ही करया, अर मेरी विधियाँ अर नियमां ताहीं न्ही मान्या जिसा के उसके पिता दाऊद नै करया। फेर भी मै उसके हाथ तै पूरा राज न्ही ल्यूँगा, पर मेरे चुणे होये दास दाऊद जो मेरे हुकमां अर विधियाँ नै मानदा रह्या, उसके कारण मै उस नै जीवन भर प्रधान ठहराए राक्खूँगा। पर उसके बेट्टे के हाथ तै मै राज्य यानिके दस गोत्र लेकै तन्नै दे दियुँगा। अर उसके बेट्टे नै मै एक गोत्र दियुँगा, ज्यांतै के यरुशलेम यानिके उस नगर म्ह जिसतै अपणा नाम राक्खण ताहीं मन्नै चुण्या सै, मेरे दास दाऊद का दीवा मेरै स्याम्ही सदा बण्या रहवै। पर तन्नै मै ठहरा ल्यूँगा, अर तू अपणी इच्छा भर इस्राएल पै राज करैगा। अर जै तू मेरे दास दाऊद की तरियां मेरे सारे हुकम मान्नै, अर मेरे राह पै चाल्ले, अर जो काम मेरी नजर म्ह ठीक सै, वोए करै, अर मेरी विधि अर हुकम मानदा रहवै, तो मै तेरै गैल रहूँगा, अर जिस तरियां मन्नै दाऊद का घरान्नां बणाए राख्या सै, उसे तरियां तेरा भी घरान्नां बणाए राक्खूँगा, अर तेरे हाथ म्ह इस्राएल ताहीं दियुँगा। इस पाप कै कारण मै दाऊद के वंश नै दुख दियुँगा, फेर भी सदा ताहीं न्ही।’” ज्यांतै सुलैमान नै यारोबाम ताहीं मार गेरणा चाह्या, पर यारोबाम मिस्र के राजा शीशक कै धोरै भाज ग्या, अर सुलैमान के मरण तक ओड़ैए रह्या। सुलैमान की और सारी बात अर उसके सारे काम अर उसकी बुद्धिमानी का बखान, के सुलैमान के इतिहास की किताब म्ह न्ही लिख्या सै? सुलैमान नै यरुशलेम म्ह सारे इस्राएल पै राज करदे होए चाळीस साल बीत्ते। अर सुलैमान मरकै अपणे पुरखां कै गैल जा मिल्या, अर उस ताहीं उसके पिता दाऊद के नगर म्ह माट्टी दी गई, अर उसका बेट्टा रहबाम उसकी जगहां पै राजा होया।
Source notes (5)
- Footnote रखैल या सारी जनान्नी युद्ध जीत लेण कै बाद गुलाम बणा के ल्याई गई थी अर अपणे माल्लिक कै गैल शारीरिक संबन्ध बणाण खात्तर वोए उनका घरआळा होवै था
- Footnote अश्तोरेत प्रेम अर युद्ध की देवी; कनानी बाल देवता की साझेदार जो की उर्वरता कर देवता सै
- Footnote हदद सुलैमान की दक्षिणी सीमा का दुश्मन
- Footnote रजोन सुलैमान की उत्तरी सीमा का दुश्मन
- Footnote दमिश्क सीरिया की राजधानी
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.