1 कुरिन्थियों

कुरिन्थिस नगर के माणसां ताहीं प्रेरित पौलुस की पैहली चिट्ठी

जानकारी

पौलुस नै कुरिन्थुस नगर म्ह कलीसिया बणाई थी। उस म्ह मसीह जीवन अर बिश्वास तै जुड़ी भोत सी समस्या पैदा होगी थी। उन समस्याओं के समाधान के खात्तर कुरिन्थियों के नाम पौलुस प्रेरित की पैहली चिट्ठी लिखी गयी सै। उस बखत कुरिन्थुस यूनान का एक अंतराष्ट्रीय नगर था। जो रोमी साम्राज्य के अखाया प्रान्त की राजधानी था। वो अपणे भोत सारे व्यापार, शानों-शोकत, संस्कृति अर कई तरियां के धर्मा खात्तर मशहुर था। पर वो अपणी हद तै ज्यादा बुराई के कारण बदनाम था। प्रेरित की घणी चिन्ता की बात कलीसिया म्ह बटवारा, बुराई, नाजायज रिश्ते, अर अंतरआत्मा तै जुड़े सवाल, कलीसिया का प्रबन्ध, पवित्र आत्मा के दान अर दुबारा जी उठणा था। पौलुस अपणे गहरे आत्मिक ज्ञान तै यो बतावै सै, कै सुसमाचार के जरिये इन सवालां का समाधान किस तरियां हो सकै सै। पाठ 13 म्ह पौलुस बतावै सै के परमेसवर के माणसां नै मिले वरदानां म्ह तै सब तै बढ़िया वरदान प्रेम सै। यो इस किताब का सब तै खास पाठ सै।

रूप-रेखा

भूमिका 1:1-9

कलीसिया म्ह दलबन्दी 1:10-4:21

नैतिकता अर पारिवारिक जीवन 5:1-7:40

मसीह अर मूर्तिपूजा 8:1-11:1

कलीसिया के माणसां का जीवन अर आराधना 11:2-14:40

मसीह यीशु अर बिश्वासियाँ का पुनरुत्थान 15:1-58

यहूदिया परदेस के बिश्वासियाँ खात्तर दान 16:1-4

व्यक्तिगत बात अर समापन 16:5-24