Gwandara
Matiyu 3
Yaaya Nsu Tunkwasa Gyala Turiki
Mk 1.1-8; Lk 3.1-18; Jn 1.19-28
A kwanki ni Yaaya nsu tunkwasa zo, yaa beyi manki Mirikisi a denka ni Yawudiya. E pala nkye, <<Ku juyi bila lepi,>> <<Sobon solota bisi e ma nani.>> Yaaya e shiya ma nsu de Anebi Ishaya yi beta a kiya e yi nkye,
<<Murinya nseda yaa sukwa a siki denka,
<Ku gyala turiki pekye Obagizi,
Ku sa turiki yi de ma tiriri
Yaaya e sa keyi pata nakurimi, shompa a goto yi. Mbosi yi ma ngirinya nja riki zunwa. Ntani butu dege Wurishelima zo anya e yi nja guru kesa Yawudiya ni kowoni totolo riki Yoda, su butu te adenka de su zi manki de Yaaya keyi su. De su ma pala lepi asu, Yaaya yi su tunkwasa a siki totolo riki ni Yoda.
De Yaaya geni ntani nyowa de su shina doka Musa de sua sukwa su nkye Parisiyawa nja nsu pala doka Sadokiyawa su zo de yi su tunkwasa, e minya su nkye <<Oku yaya ogbozi waa gila ku de ku gudu dege anwashi Mirikisi de yaa te zo? Ku yi mbode nana nkye ku juyi bila mbo mumungu, sobon ntasi kyakyawu yaa yi yaya kyakyawu. Kede ku dege dolo nkye, <Ku mani Abireyi ma adaa ku.> Na gye ku Mirikisi yaa juyi dunsi mu de su ma yaya Abireyi. Ko kuzukam gapiya Mirikisi e ma kisi ririnya ntasi, yaa pekye de e geni du ntasi de yaa yapu yaya kyakyawu ba, sua sala yi kutiri a siki wuta.
<<Yaaya nkye eni ni yi ku tunkwasa ni riki de ku bila lepi. Sede a beyi na nseda de pi ni yaa zo, Ni deta de na kunshe takalami yi ba. Yaa yi ku tunkwasa ni Aworo Mirikisi nja wuta. E keyi tengeri a nani yi de dukwa guru saba a pita asheke nyanye butu a siki saba yi, Anya ni yaa tala saba nya arigogo yi, akweyi nyanye si wuta a wuta de yaa muntu ba.>>
Su yi Yesu Tunkwasa
Mk 1.9-11; Lk 3.21,22
Se Yesu zo a Galili ni kesa Yoda de Yaaya e yi tunkwasa. Sede Yaaya yaa bila de e yi Yesu tunkwasa ba. E pala nkye, <<Na bila de e ke na ki yi ni tunkwasa, mina sa ki zo anyana?>>
Yesu pala gye yi nkye, <<E ma kyakya la de ki yi ni tunkwasa de e shika guru mbo gangasi.>> Se Yaaya yeda de yi Yesu tunkwasa.
De Yesu yi tunkwasa, e butu a siki riki. Se bisi bure ba yi, e geni Aworo Mirikisi sonka a kiya yi kankye tatambiri nja asikye. Se murinya butu A bisi pala nkye, <<Da mu ema Yaa naa, de mma so; Nja shi Naa yi perisiki soseyi.>>
Gwandara. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.