Skip to content
BibleKenya

Gwandara

Joni 14:27

Verse 27 is marked below, with the whole chapter around it. Read from the start

Yesu Nama Turiki Ni Te Anya Adaa

Yesu nkye,<<Kede dishiya ku e basi. Ku beigaskye nja Mirikisi; ku kwa beigaskye nja Ni. A siki gizi Adaa na laki ma nyowa; nde e ma yomu aba, da Ni gye ku. Na te de ni gyala anya sobon ku. A beyi de ni te gyala ku anya, Na zo de ni la ku te anya na, de kuma anya ni nja ni du. Ku shina turiki anya de Na te.>>

Tomasi gye Yesu nkye, <<Obagizi, mu shina anya de ka te ba, kona mua shina turiki?>>

Yesu keleba nkye, <<E ni na ni ma turiki nja gaskye nja leyi. Ba nsude yaa te anya ni Adaa sede e biya anya na. Kuzukam de ku shina Ni, <<Ku kwa shina Adaa na du. Dege kuzukam te a geba ku shina yi ku kwa geni yi.>>

Se Pilibu pala nkye, <<Obagizi, Ki nana mu Adaa mbode mua bila naka kede.>>

Yesu keleba nkye, <<Ni la kwanki nyowa ni ma nja ku, Pilibu ari yawu ki shina ni bo? Du nsude geni e geni Adaa. Mina sa ki ma pala nkye, nana mu Adaa>? Ki beigaskye nkye ni ma a siki ni Adaa, nja Adaa ma a siki na bo? Beta de Ni ma gye ku mu e ma ni kiya na aba. Sede Adaa de zunwa a siki na, E shiya meyi ankiyi. Ku beigaskye nja ni de ni gye ku nkye ni ma a siki ni Adaa nja Adaa ma a siki na; ko ku beigaskye nja mbo mamanki de ni yi. Na gye ku gaskye, du nsude beigaskye nja ni yaa yi mbode mma yi. Ari yaa yi mbode e pi worosu mu, sobon mma te anya ni Adaa. Guru mbode ku minya a siki seni na na yi, de Adaa e samu girima te anya Yaa yi. Nde ku minya guru mbo a siki seni na, Na yi ku nshi.

Anikowori Ni Aworo Nsuseki

<<Nde ku so ni, kwa biya doka na. Na pata Adaa na, yaa ba ku nsu sua ku nto de yaa ma nja ku ari gbogbo Nsu sua nto ni e shiya ma Aworo ni gaskye. De durinya su yeda nshi ba, sobon su geni yi ba su kuma shina yi ba. Sede oku ku shina yi, sobon e ma nja ku yaa kwa zunwa a siki ku. Nde Ni te, na taba bila ku de ku ma kankye yaya male yi ba; Na zo anya aku. E rigye kwanki piri, durinya sua geni ni gagaba, sede oku kwa geni ni; Sobon Ni man leyi, oku du kwa mani leyi. A nana ni kwa shina nkye Ni ma a siki Adaa na, nja oku kuma a siki na, E ni ma ni ma a siki ku Du nsude shina doka na de kwa biya e yi, e shiya ma nsude yaa so ni. Nsude ma so ni Adaa na yaa so yi, nja Eni ma na so yi ari na nana yi kiya na.>>

Se Yawuda <<De ma Yawuda Isikariyoti ba>> e gye Yesu nkye, <<Obagizi, mina sa de ka nana kiya ke ba mu ba te nja ntani durinya ba?>>

Yesu keleba nkye, <<Du nsude yaa so ni, yaa biya mbode ni kokoyi. Adaa na yaa so yi nja mua zo anya e yi mua zunwa nja nshi. Du nsude yaa so ni ba yaa biya mbode ni kokoyi ba. Beta mu de ku zi e ma nna na ba; su ma ni Adaa na nsude saka ni la.

<<Mma gye ku mbo mu tun Ni tuku ma nja ku. Sede nsude yaa sua ku nto, Aworo Nsuseki, nsude Adaa yaa saka yi a siki seni na, yaa kokoyi ku guru mbo nja yaa turunwa ku guru mbode ni gye ku. Selema na ni bila ku nshi; selema na na ni ba ku. Ba yiride durinya sua beyi na ba. Kede dishiya ku e basi nja e dege; kede ku zi womba.

Ku zi ni nkye, <Na te, sede Na kwa kuma mbayi zo.> Nde kua so ni, kua yi peri siki nkye mma te anya ni Adaa, sobon Adaa pi Ni girima. Ni gye ku kuzukam kapi de e zo paru, kwanki de e paru, kwa beigaskye. Na sakye yi beta nja ku nyowa kuma ba, sobon nsu solota ni durinya mu yaa zo. Ba e ma ni mbodaa anya na ba, sede e ma dole na de durinya e shina nkye Ni ma so Adaa; sobon yomu na Ni meyi guru doka de e ba ni.

<<Ku dege, de mu bila anyam.

Gwandara. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.