ગી.શા. 47

સર્વોપરી શાસક

મુખ્ય ગવૈયાને માટે; કોરાના દીકરાઓનું ગીત.

1હે સર્વ લોકો, તાળી પાડો;

આનંદથી મોટા અવાજે ઈશ્વરની સ્તુતિ કરો.

2કારણ કે પરાત્પર યહોવાહ ભયાવહ છે;

તે આખી પૃથ્વીના રાજાધિરાજ છે.

3તે આપણા તાબામાં લોકોને તથા આપણા પગ નીચે

વિદેશીઓને હરાવીને મૂકશે.

4તેમણે આપણા માટે આપણો વારસો પસંદ કર્યો છે,

એટલે તેમણે, પોતાના વહાલા યાકૂબની ઉત્તમતા પસંદ કરી છે. સેલાહ

5ઈશ્વર વિજયના પોકારસહિત,

યહોવાહ રણશિંગડાના અવાજસહિત ચઢી ગયા છે.

6ઈશ્વરનાં સ્તોત્રો ગાઓ, સ્તોત્રો ગાઓ;

આપણા રાજાનાં સ્તોત્રો ગાઓ, સ્તોત્રો ગાઓ.

7કેમ કે ઈશ્વર આખી પૃથ્વીના રાજા છે;

સમજદારીથી તેમની પ્રશંસાનાં ગીતો ગાઓ.

8ઈશ્વર વિદેશીઓ પર રાજ કરે છે;

ઈશ્વર પોતાના પવિત્ર સિંહાસન પર બિરાજમાન છે.

9લોકોના રાજકુમારો એકત્ર થયા છે

ઇબ્રાહિમના ઈશ્વરના લોકોની સાથે બધા ભેગા થયા છે;

કેમ કે પૃથ્વીની સર્વ ઢાલો ઈશ્વરની છે;

તે સર્વોચ્ય છે.