ದೆವಾಚಿ ಖರಿ ಕಬರ್
ರೋಮಾಪುರಾತ್‌ಲ್ಯಾನಾ 15:13
Verse 13 is marked below, with the whole chapter around it. Read from the start
ದುಸ್‍ರ‍್ಯಾನಾ ಆವಾಡತ್ಯಾಲಿ ವ್ಹವುನ್ ರಾವ್ಹಾ ತುಮಾನಾಸ್ ತುಮಿ ನವ್ಹ
ಮನ್ಹುನ್ ಬಳ್ ಆಸ್‌ಲ್ಯಾಲ ಆಮಿ ಇಸ್ವಾಸಾತ್ ಬಳ್ ನಸ್‌ಲ್ಯಾಲ ಆಮಿ ಸುಸ್ವುನ್ ಗಿಹ್ಯಾ ವ್ಹಯಿ. ಆಮಾನಾಸ್ ವವ್ಯಾಳುನ್ ಗಿಹುನಾಹಿ. ಹ್ಯಚೆ ಬದ್ಲಿಸ್ ಆಮ್ಚಾತ್ ಪರತೇಕ್ ಯೋಕ್ ಆಪ್‍ಲ್ಯಾ ಇಸ್ವಾಸಾಚಾ ಭನ್ಹಿ ಭಾವ್ಹಾಂಚೆ ಗುಶ್ಟಿತ್ ಯವಜು಼ನ್ ತ್ಯಂಚಾ ಚಾಂಗಲ್ಯಾಸಾಟಿ ಆನಿ ತ್ಯಂಚಾ ಇಸ್ವಾಸಾತ್ ಘಟ್ ರಾಹ್ಯಾ ವ್ಹಯಿತ ಮನ್ಹುನ್ ಬಗಾಯಾ ವ್ಹಯಿ. ಕಾ ಮಂಜೆ ಕ್ರಿಸ್ತಾನಿ ಆಪ್‍ಲ್ಯಾ ಸುಕಾಚಿ ಚಿಂತಾ ಕಿಲಿನಾಹಿ. ದೇವಾನಿಸ್, “ತುಲಾ ಸರಪಲ್ಯಾಲಾ ಸರಾಪ್ ಮಾಜಿವ ಆಲ್ಯಾ.” 1 ಮನ್ಹುನ್ ಲಿವಲ್ಯಾ ಪವಿತ್ರ ಗ್ರಂಥಾತ್ ಲಿವ್‌ಲ್ಯಾಲ ಸಗ್ಳ ಆಮಾನಾ ಸಿಕ್ವಾಯಾಸಾಟಿ ಲಿವ್ಲ್ಯಾ. ಆಮಿ ಭರವಸಾ ಆಸ್ಲ್ಯಾಲಿ ರಾಹ್ಯಾ ವ್ಹಯಿ ಮನ್ಹುನ್ ಹ್ಯಾ ಖನ್ಕತಿ ಲಿವ್‍ಲ್ಯಾತಾ. ಫನ್ ಆಮಾನಾ ದೆತ್ಯಾಲ್ಯಾ ಥಂಡ್ಫನಾನಿ ಉಮೇದಿನಿ ಭರವಸಾ ರಾಹ್ಯಾಸಾಟಿ ಹ್ಯಾ ಗುಶ್ಟಿ ಲಿವ್‍ಲ್ಯಾತಾ. ಥಂಡ್ಫನ್ ಆನಿ ಉಮೇದ್ ಹ್ಯಚಾ಼ ಮೂಳ್ ಜಾ಼ಲ್ಯಾಲಾ ದೇವ್ ತುಮಾನಾ ಕ್ರಿಸ್ತ ಯೇಸುಲಾ ಮಿಳುನ್ ಯಾಕುಸ್ ಮನ್ ಆಸ್ಲ್ಯಾಲಿ ರಾಹುಂತ ಮನ್ಹುನ್ ಕರುನಿ. ಆಸಸ್ ತುಮಿ ಸಗ್ಳಿ ಯಕಾಸ್ ಸಬ್ದಾನಿ ಆಮಚಾ಼ ಪ್ರಭುಜಾ಼ಲ್ಯಾಲ್ಯಾ ಯೇಸುಕ್ರಿಸ್ತಾಚಾ಼ ಬಾ ಜಾ಼ಲ್ಯಾಲ್ಯಾ ದೇವಾಲಾ ಸ್ತುತಿ ಕರಾ.
ಯೆಹುದಿ ನಸ್ಲ್ಯಾಲ್ಯಾನಾ ಬರಿ ಖಬರ್
ದೇವಾಚೆ ಮೈಮೆಸಾಟಿ ಕ್ರಿಸ್ತಾನಿ ಕಸಿ ತುಮಾನಾ ಗೇತಲ್ಯಾತ ತಸಸ್ ಯಕಾಮಕಾಲಾ ಗೆವ್ಹಾ. ಮೀ ತುಮಾನಾ ಸಾಂಗ್ತೊ. ದೇವಾನಿ ಖರ ದಾವಾಯಾಸಾಟಿ ಕ್ರಿಸ್ತ್ ಯೆಹುದ್ಯಾಂಚಾ಼ ಸೆವಕ್ ಜಾ಼ಲ್ಯಾ ಆಸ ವಡ್ಲಾನಾ ದಿಲ್ಯಾಲ ಸಬ್ದ ಖರ ಕರಾಯಾ ಆನಿ ದೇವಾನಿ ದ್ಯಾವ್‍ತ್ಯಾಲೆ ಕರುಣೆಸಾಟಿ ಯೆಹುದ್ಯ ನಸ್‌ಲ್ಯಾಲ ತ್ಯಲಾ ಸ್ತುತಿ ಕರಾಯಾ. ಪವಿತ್ರ ಪುತಿಕಾತ್ ಆಸ ಲಿವ್ಲ್ಯಾ:
“ಮನ್ಹುನ್ ಯೆಹುದಿ ನಸ್‌ಲ್ಯಾಲ್ಯಾ ಲೋಕಾಂಚೆ ಮದ್ದಿ ಮೀ ತುಲಾ ಸ್ತುತಿಕರ್ತೊ. ಮೀ ತುಜಾ ನಾವಾಚ಼ ಸ್ತುತಿ ಗಿತ್ ಗ್ಯಾವ್ತೊ. ” ಯವ್ಡಸ್ ನ್ವಹ ಪವಿತ್ರ ಗ್ರಂಥ ಆಸ ಸಾಂಗ್ತ.
ಯೆಹುದಿ ನಸ್ಲ್ಯಾಲಿ ತುಮಿ ದೇವಾಚಾ ಸ್ವತಾಚಾ ಲೋಕಾ ಸಂಗ ಸಂತೋಶ್ ವ್ಹವಾ!. ಆನಿ ಯಕಿಕ್ಡ ಪವಿತ್ರ ಗ್ರಂಥ ಆಸ ಸಾಂಗ್ತ:
“ಯೆಹುದಿ ನಸ್ಲ್ಯಾಲಿ ತುಮಿ ಸಗ್ಳಿ ಪ್ರಭುಲಾ ಸ್ತುತಿ ಕರ್ತಾಸಾ, ಸಗ್ಳಿ ಲೋಕ ಪ್ರಭುಲಾ ಸ್ತೊತ್ರ ಕರುಂತ. ” ಆನಿ ಯೇಶಾಯನಿ ಆಸ ಸಾಂಗ್ಲ:
ಇಶಾಯಚಾ ಕುಟ್ಮಾತ್ನಿ ಯೋಕ್ ಮಾನುಸ್ ದಿಸ್ನಾರ್. ತ್ಯೊ ಯೆಹುದಿ ನಸ್ಲ್ಯಾಲ್ಯಾನಾ ಚಾ಼ಲ್ವಾಯಾ ಯನಾರ್. ಯೆಹುದಿ ನಸ್ಲ್ಯಾಲಿ ಲೋಕ ತ್ಯಚಿವ ಆಶಾ ಥೆವ್ನಾರ್. ”
ಆಶಾಚಾ಼ ಮುಳ್ ಜಾ಼ಲ್ಯಾಲಾ ದೇವ್ ಇಸ್ವಾಸಾನಿ ಯತ್ಯಾಲಾ ಆನಂದ್ ಥಂಡ್ಪನ್ ತುಮಾನಾ ಸಗ್ಳಾ ಗಾಹುನಿ. ತವಾ ಪವಿತ್ರತ್ಮಾಚಾ ಬಳಾನಿ ಆಶಾ ತುಮ್ಚಾತ್ ಬರ‍್ಹುನ್ ಬಾಹಿರ್ ವ್ಹಾವ್ನಾರ್.
ಆಪ್ಲೆ ಸೇವೆಚೆ ಗುಶ್ಟಿತ್ ಪೌಲ್ ಸಗ್ಳ ಸಾಂಗಾಲಾ ಕಾರನ್
ಮಾಜಾ ಭನ್ಹಿ ಭಾವ್ಹಾನು, ತುಮಚಾತ್ ಬರ ಫನ್ ಬರ್‌ಲ್ಯಾ ಆನಿ ಸಗ್ಳ ಗಿನ್ಯಾನ್ ತುಮಾನಾ ಹಾ ಮನ್ಹುನ್ ಆನಿ ಯಕಾಮಕಾಲಾ ಸಿಕ್ವಾಯಾ ಸಾಮರ್ಥ ತುಮಾನಾ ಹಾ ಮನ್ಹುನ್ ಮನಾ ಠಾವ ಹಾ. ಫನ್ ಹ್ಯಾ ಪತರ‍್ಯಾತ್ ತುಮಾನಾ ಯಾದ್ ಕಾರಾಚೆ ಗುಶ್ಟಿತ್ ಥೊಡ ವಿವರನ್ ಕರುನ್ ಲಿವ್ಲ್ಯಾ. ಕಾ ಮಂಜೆ ದೇವಾನಿ ಮನಾ ಹ್ಯೊ ಯೋಕ್ ಅವ್ಕಾಶ್ ದಿಲಾ ಯೆಹುದಿ ನಸ್‌ಲ್ಯಾಲ್ಯಾ ಲೋಕಾಂಚೆಸಾಟಿ ಕಾಮ್ ಕರಾಯಾ ಕ್ರಿಸ್ತ ಯೇಸುಚಾ಼ ಸೇವಕ್ ಮನ್ಹುನ್ ರಾಹ್ಯಾಲಾ ಕೇಲ್ಯಾ. ಮೀ ಯಕಾ ಯಾಜಕಾಚೇಗತ್ ದೇವಾಚಿ ಬರಿ ಖಬರ್ ಸಿಕಿವ್‍ಲ್ಯಾ ಆಸ ಯೆಹುದಿ ನಸ್ಲ್ಯಾಲ್ಯಾನಾ ಪವಿತ್ರಾತ್ಮಾನಿ ತ್ಯಲಾ ಅರ್ಪನ್ ಕೆಲ್ಯಾಲ ಯಾಕ್ ಸ್ವಿಕಾರ್ ಕೇಲ್ಯಾಲಿ ದಿನ್ಗಿ ವ್ಹಯಾ ವ್ಹಯಿ.
ಮನ್ಹುನ್ ಕ್ರಿಸ್ತ ಯೇಸುಚೆ ಯಕಿತ್ ಮೀ ದೇವಾಸಾಟಿ ಕರ್ತ್ಯಾಲ್ಯಾ ಕಾಮಾಚೆ ಗುಶ್ಟಿತ್ ಹೆಮ್ಮೆನಿ ಹಾ. ಮಿ ಮಾಜಿ ಸ್ವತಾಚಿ ಕಾಮ ಕರೀತ್ ನಾಹಿ. ಯೆಹುದಿ ನಸ್‌ಲ್ಯಾಲ್ಯಾ ಲೋಕಾನಾ ಆಪ್ನಿ ಸಾಂಗಲ್ಯಾ ಶಾರಕ ಚಾ಼ಲತ್ಯಾಲಿ ಕರುನ್ ಗಿಹ್ಯಾ ಕ್ರಿಸ್ತ ಮಾಜಾ ಬೊಲ್‍ನ್ಯಾನಿ ಕರ್ತುಕಿನಿ ಕೇಲ್ಯಾಲಿ ಕಾಮ ಉಗ್ಡುನ್ ಸಾಂಗ್ತೊ. ಚಮತ್ಕಾರಾಚಾ ಕಾಮಾಚ಼ ಬಳ್ ಆನಿ ದೇವಾಚಾ ಆತ್ಮಾಚಾ ಬಳಾಚಾ ನಿಮಿತಾನಿ ಮಾಜಿಪ್ನಿ ಪೂರ್ನ ಕೇಲ. ಮನ್ಹುನ್ ಯೆರುಸಲಮೇತ್ನಿ ಇಲ್ಲುರಿಕಾಚೆ ಸರ್ಬೌರ್ ಕ್ರಿಸ್ತಾಚಿ ಬರಿ ಖಬರ್ ಸಾಂಗಾಚ಼ ಕಾಮ್ ಪೂರ್ನ ಕೇಲ. ಕ್ರಿಸ್ತಾಚೆ ಗುಶ್ಟಿತ್ ಲೋಕಾಂಚಾನಿ ಕಂದಿಸ್ ಐಕ್‍ಲ್ಯಾ ನಸ್‍ಲ್ಯಾ ಖನ್ಕತಿತ್ನಿ ಬರಿ ಖಬರ್ ಸಿಕ್ವಾಯಾ ಮೀ ಖಾಯಿಮ್ ತಯಾರ್ ಹಾ. ಮನ್ಹುನ್ ದುಸರ‍್ಯಾನಿ ಗ್ಯಾತ್‌ಲ್ಯಾಲ್ಯಾ ಪಾಯಾವ ಬಾಂದಾಯಾ ಮಿ ಮನ್ ಕರಿತ್ ನಾಹಿ. ಫನ್ ಹ್ಯ ಸಾಹಿತ್ ಪವಿತ್ರ ಗ್ರಂಥಾತ್ ಲಿವ್ಲ್ಯಾ:
“ತ್ಯಚೆ ಗುಶ್ಟಿತ್ ಐಕತ್‍ ನಸ್ಲ್ಯಾಲಿ ಲೋಕ ತ್ಯಲಾ ಬಗ್ನಾರ್.
ತ್ಯಚೆ ಗುಶ್ಟಿತ್ ಐಕ್‌ಲ್ಯಾನಸ್‌ಲ್ಯಾಲಿ ಲೋಕ ತ್ಯಲಾ ಸಮಜು಼ನ್ ಗೆನಾರ್.”
ರೋಮಾತ್ ಜಾ಼ಯಾ ಪೌಲಾಚಿ ಯವಜ್ನಾ಼
ಹ್ಯಾ ಕಾರ್ನಾನಿಸ್ ತುಮ್ಚಿಪ ಯವುನಾಹಿ ಆಸ ಮನಾ ಖುಬ್ ಪಾವ್ಟಿ ಅಡಚ಼ನ್ ಆಲಿ.
ಫನ್ ಆತಾ ಹ್ಯಾ ಪ್ರಾಂಥ್ಯಾತ್ ಮೀ ಕರ್ತ್ಯಾಲಿ ಸೇವಾ ಕರುನ್ ಸುಪಿವ್ಲೆ ಆನಿ ಖುಬ್ ವರ್ಸಾದರ‍್ನಿ ಮನಾ ತುಮ್ಚಿಪ ಯಯಾ ಹಾವುಸ್ ಹುತಿ ಮನ್ಹುನ್. ಮೀ ಸ್ಪೆನಿತ್ ಜಾ಼ತಾನಾ ತುಮಾನಾ ಬೆಠೊ. ವ್ಹಯ್ ಮೀ ಸ್ಪೆನ್ ದೆಶೆತ್ ಜಾ಼ತಾನಾ ತುಮಾನಾ ಗೆಥೊ. ಥೊಡ ದಿಸ್ ತುಮ್ಚಿ ಸಂಗ ಸಂತೊಶಾನಿ ರಾಥೊ ಮನ್ಹುನ್ ಆಶಾ ಮನಾ ಹಾ. ನಂತರ್ ತುಮಿ ಮಾಜಾ ಜಾ಼ನ್ಯಾಲಾ ಮಜ಼ತ್ ಕರ್ಶಿಲಾ ಮನ್ಹುನ್ ಮನಾ ಆಶಾ ಹಾ.
ಆತಾ ಮೀ ದೇವಾಚಾ ಲೋಕಾಂಚಿ ಸೇವಾ ಕರಾಯಾ ಯೇರುಸಲೇಮಿತ್ ಜಾ಼ತ್ಯೊ. ಮಕೆದೊನ್ಯಾತ್ಲಿ ಆನಿ ಅಖಾಯಾಚೆ ಸಭೆತ್ಲಿ ಇಸ್ವಾಸಿ ಲೋಕಾಂಚಾನಿ ಯೆರುಸಲೆಮ್ ಸಭೆಚಾ ಗರೀಬ್ ಲೋಕಾನಾ ಮಜ಼ತ್ ಕರಾಯಾ ವ್ಹಯಿ ಮನ್ಹುನ್ ನಿರ್ದಾರ್ ಕೆಲ್ಯಾ. ಮಕೆದೊನಿಯಾ ಆನಿ ಅಖಾಯಾತ್ಲಿ ಇಸ್ವಾಸಿ ಸ್ವತಾಚಾ ಮನಾನಿ ಹೀ ಕಾಮ ಕರ್ತ್ಯಾತ. ಕಾ ಮಂಜೆ ಯೆಹುದಿ ಯೆಹುದಿ ನಸ್‌ಲ್ಯಾಲ್ಯಾಂಚೆ ಸಂಗ ಆತ್ಮಿಕ್ ಆಶಿರ್ವಾದ್ ಗೆತಲ್ಯಾ, ಯೆಹುದಿನಾ ಮಜ಼ತ್ ವ್ಹಯಾ ಯೆಹುದಿ ನಸ್ಲ್ಯಾಲಿ ಸಾಮ್ನಾಚಾ ರುಪಾತ್ ಆಪ್ಲ ಆಶಿರ್ವಾದ್ ಯೆಹುದಿ ಸಂಗ ವಾಟುನ್ ಗಿಹ್ಯಾ ಹಾತ್ತ. ಯೇರುಸಲೇಮಿತ್ ಗರೀಬ್ ಲೋಕಾಂಚೆ ಸಾಟಿ ದಿಲ್ಯಾಲ ಹೇ ಪೈಸ ಸಗ್ಳ ಜ಼ಪುನ್ ತ್ಯನಾ ಪುಚಿವ್‍ಲ್ಯಾವ ಮೀ ಸ್ಪೆನಿತ್ ಜಾ಼ನಾರ್.
ಮೀ ಸ್ಪೆನಿತ್ ಜಾ಼ತಾನಾ ತುಮಾನಾ ಬೆಠೊ. ಮಿ ತುಮ್ಚಿಪ ಯತಾನಾ ಕ್ರಿಸ್ತಾಚಾ಼ ಖುಬ್ ಆಶಿರ್ವಾದ್ ಗಿಹುನ್ ತುಮಚಿಪ ಯತೊ.
ಭನ್ಹಿ ಭಾವ್ಹಾನು, ತುಮಿ ಮಾಜಿಸಾಟಿ ದೇವಾಪ ಮಾಗ್ನ ಕರ್ತಾನಾ ಆಪ್ಲೆ ಸೇವೆಲಾ ಮಜ಼ತ್ ಕರಾಯಾ ವ್ಹಯಿ ಮನ್ಹುನ್ ಮೀ ತುಮಚಿಪ ಇನಂತಿ ಕರ್ತೊ. ಮಾಜಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸುಚಾ ನಿಮ್ಸಾನಿ ಪವಿತ್ರಾತ್ಮಾನಿ ಮನಾ ದೇತ್ಯಾಲೆ ಮಾಯೆಚಾ ನಿಮ್ಸಾನಿ ತುಮಿ ಮಾಗ್ನ ಕರಾ. ದೆವಾನಿ ಮನಾ ಯುದಾಯಾತಲ್ಯಾ ಇಸ್ವಾಸ್‍ ನಸ್‌ಲ್ಯಾಲ್ಯಾಂಚಾ ಹಾತಾತ್ನಿ ಮನಾ ಪಾರ್ ಕರಾಯಾ. ಮೀ ಯೇರುಸಲೇಮಿತ್ ಗಿಹುನ್ ಜಾ಼ತ್ಯಾಲಿ ಹೇ ಮಜ಼ತಿಚ಼ ಪೈಸ ತಿಥ ಆಸ್‌ಲ್ಯಾಲ್ಯಾ ದೇವಾಚಿ ಲೊಕ ಗಿಹುಂತ ಮನ್ಹುನ್ ಮಾಗ್ನ ಕರಾ. ಆಸಾ ಮಿ ದೇವಾಚಾ ಮನಾಚೆಗತ್ ಆನಂದಾನಿ ಯವುನ್ ತುಮ್ಚಿ ಸಂಗ ಯವುನ್ ಇಸ್ರಾಂತಿ ಗೆನ್ಹಾರ್. ಸಮಾದಾನಾಚಾ಼ ಜಾ಼ಲ್ಯಾಲಾ ದೇವ್ ತುಮ್ಚೆ ಸಗ್‍ಳ್ಯಾಂಚೆ ಸಂಗ ರಾಹುನಿ. ಆಮೆನ್.
Source notes (1)
- Footnote ಕೀರ್ತನ್ 69:9
ದೆವಾಚಿ ಖರಿ ಕಬರ್. Copyright © 2023 The Word for the World International and Gowly Marathi Translation Samti, Karnataka. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.