ದೆವಾಚಿ ಖರಿ ಕಬರ್
ದರ್ಶಾನ್ 3
ಸಾರ್ದಿಸಾತ್ಲೆ ಸಬೆಲಾ ಸಂದೇಶ್
ಸಾರ್ದಿಸಾತ್ಲೆ ಸಬೆಚಾ ದುತಾಲಾ ಹ್ಯ ಲಿವ್:
ಸಾತ್ ಆತ್ಮಿ ಆನಿ ಸಾತ್ ಚಾನ್ಯಾ ಆಸಲ್ಯಾಲಾ ಸಾಂಗಾಚ಼ ಕ್ಯಾ ಮಂಜೆ: ತು ಕರ್ತ್ಯಾಲ ಮನಾ ಸಮಾಜ಼ಲ್ಯಾ. ತು ಜಿವ್ ಆಸಲ್ಯಾಲಾ ಆನಿ ತುಲಾ ಮರ‍್ಯಾದ್ ಹಾ ಮನ್ಹುನ್ ಮನಾ ಠಾವ ಹಾ. ಫನ್ ತು ಖರ್ಯಾನಿಸ್ ಮೆಲ್ಯಾಸ್. ಉಟ್! ಮರಾಯಾ ಜ಼ಾಲ್ಯಾಲ್ಯಾ ಸಗಳ್ಯಾನಾ ಧಿರ್ ದೆ. ತು ಕೆಲ್ಯಾಲಿ ಕಾಮ ಮಾಜಾ ದೇವಾಚೆ ನದ್ರಲಾ ಚು಼ಕ್ ನಸಲ್ಯಾಲಿ ಮಿ ಬಗ್ಲಿ ನಾಹಿತ.
ಮನ್ಹುನ್ ತು ಹು ಮನ್‍ಲ್ಯಾಲ ಆನಿ ಐಕ್‍ಲ್ಯಾಲ ಸಿಕ್ಷೆನ್ ಇಸ್ರಾಚೆ ಆಂದಿ ತ್ಯಚಿಗತ್ ಚಾ಼ಲ್. ತುಜ಼ ಮನ್ ಆನಿ ಜಿವ್ನಾ ಬದ್ಲುನ್ಗೆ! ಹುಶಾರ್ ಹೊ! ನಾಹಿತ, ಮಿ ಚೊ಼ರಾಚೆಗತ್ ತುಜಿಪ ಯವುನ್ ತುಲಾ ಗಾಭರ್ನಾರ್. ಮಿ ಕವಾ ಯನಾರ್ ಮನ್ಹುನ್ ತುಲಾ ಠಾವಾ ರಾನಾರ್ನಾಹಿ.
“ತುಮ್ಚೆ ಸಾರ್ದಿಸ್ ಸಬೆಚಿ ಥುಡಿಜ಼ನ ಆಜು಼ನ್ ಪವಿತ್ರ ಜಾ಼ಲ್ಯಾತ. ತ್ಯಂಚಾನಿ ಆಪ್ಲ ಕಪ್ಡ ಬುರ್ಸ ಕರುನ್ ಗೆತ್ಲ ನಾಹಿತ. ತಿ ಮಾಜಿಸಂಗ ಚಾ಼ಲ್ನಾರ್. ತಿ ಚಾ಼ಂಗ್ಲಿ ಹಾತ ಮನ್ಹುನ್ ಪಾಂಡ್ರಿ ದಡೊತ ಗ್ಯಾಲತ್ಯಾತ. ಜಿತ್‌ಲ್ಯಾಲಾ ಪರತೆಕ್ ಯೊಕ್ ಹ್ಯಾ ಲೊಕಾಂಚೆಗತ್ ಪಾಂಡ್ರಿ ದಡೊತ ಗ್ಯಾಲ್ತೊ. ತ್ಯಾ ಮಾನ್ಸಾಚ಼ ನಾವ್ ಮಿ ಜಿವ್ ಬಾದ್ಯಾಚಾ ಪುಸ್ತಕಾತ್ನಿ ಕಾಡಿತ್ನಾಹಿ. ತ್ಯೊ ಮಾಜಾ಼ಸ್ಮನ್ಹುನ್ ಮಾಜಾ ಬಾಚೆ ಮೊರ್ಹ ಆನಿ ತ್ಯಚಾ ದುತಾಂಚೆ ಮೊರ್ಹ ಸಾಂಗ್ತೊ.
ಪವಿತ್ರ ಆತ್ಮ ಸಬೆನಾ ಸಾಂಗತ್ಯಾಲ್ಯಾ ಹ್ಯಾ ಖನ್ಕತಿ ಐಕ್‌ತ್ಯಾಲ್ಯಾ, ಧ್ಯಾನ್ ದಿವುನ್ ಐಕ್.
ಫಿಲಿದೆಲ್ಪಿತ್ಲೆ ಸಬೆಲಾ ಸಂದೇಶ್
ಫಿಲಿದೆಲ್ಪಿತ್ಲೆ ಸಬೆಚಾ ದುತಾಲಾ ಹ್ಯ ಲಿವ್:
ಪವಿತ್ರ ಆನಿ ಖರಾ ಜಾ಼ಲ್ಯಾಲಾ ದೆತ್ಯಾಲ ಸಿಕ್ಶೆನ್ ಹ್ಯ: ದಾವಿದಾಚಾ ಕುಲ್ಪಾಚಿ ಚಾವಿ ಮಾಜಿಪ ಹಾ. ಮಿ ಉಗಡಲ್ಯಾಲ ಕುನಾಲಾ ಜಾ಼ಖಾಯಾ ವ್ಹಯಿತ್ನಾಹಿ ಆನಿ ಜಾಕ್‌ಲ್ಯಾಲ ಕುನಾಲಾ ಉಗ್ಡಾಯಾ ವ್ಹಯಿತ್ನಾಹಿ.
ತು ಕರತ್ಯಾಲಿ ಕಾಮ ಮನಾ ಸಮಾಜ಼ಲ್ಯಾತ. ತುಜೆ ಮೊರ್ಹ ಉಗಡಲ್ಯಾಲ ದಾರ್ ಥೆವ್‌ಲ್ಯಾ. ತ್ಯ ಕುನಾಲಾ ಜಾ಼ಖಾಯಾ ವ್ಹಯಿತ್ನಾಹಿ. ತು ಬಳ್ ನಸ್‌ಲ್ಯಾಲಾ ಮನ್ಹುನ್ ಮನಾ ಸಮಾಜ಼್ಲ್ಯಾ. ಫನ್ ತು ಮಾಜಾ ಸಿಕಿವ್‌ನ್ಯಾ ಶಾರ್ಕಾ ಚಾ಼ಲ್ಲಾಸ್. ಮಾಜ಼ ನಾವ್ ಸಾಂಗಾಯಾ ಮಾಗ ಸರ್ಲಾ ನಾಹಿಸ್. ಐಕ್! ತಿಥ ಸೈತಾನಾಚಾ ಮೆಳ್ಯಾತ್ಲಿ ಹಾತ. ತಿ ಲೊಕ ಆಪ್ನು ಯೆಹುದಿ ಮನ್ಹುನ್ ಮಂತ್ಯಾತ. ಫನ್ ತ್ಯ ಲಬಾಡ್. ತಿ ಖರಿ ಯಹುದಿ ನವ್ಹತ. ತಿ ಲೊಕ ತುಜೆ ಮೊರ್ಹ ಯವುನ್ ತುಜಾ ಪಾಯಾತ್ ಪಡುನ್ ಹಾತ್ ಜು಼ಡಿಶಾರ್ಕ ಕರ್ತೊ. ಮಿ ಮಾಯಾ ಕೆಲ್ಯಾಲಿ ಲೊಕ ತುಮಿಸ್ ಮನ್ಹುನ್ ತವಾ ತಿ ಸಮಜು಼ನ್ ಗೆನಾರ್ ತು ಮಾಜಾ಼ ಸಬೊತ್ ಥಂಡ್ಪನಾನಿ ಚಾ಼ಲಿವ್ಲಾಸ್. ಮನ್ಹುನ್ ಹೆ ದುನೆಲಾ ವ್ಹತ್ಯಾಲ್ಯಾ ತರಾಸಾತ್ನಿ ಮಿ ತುಲಾ ಚು಼ಕಿವ್‍ತ್ಯೊ. ದರ್ಥಿವ್‍ಲ್ಯಾ ಸಗ್‍ಳ್ಯಾ ಲೊಕಾನಾ ಹಿ ಪರಿಕ್ಷೆ ಕರಾಯಾ ತರಾಸ್ ಯಯಿಲ್.
ಮಿ ಬಿಗಿ ಯತೊ. ತು ಆತಾ ಹಾಸ್ ತಸಾಸ್ ರ‍್ಹಾ. ತವಾ ಕೊನ್ ತುಜ಼ ಕಿರಿಟ್ ಕಾಡುನ್ ಗೆನ್ಹಾರ್ ನಾಹಿ. ಜಿತ್‍ಲ್ಯಾಲ್ಯಾ ಮಾನ್ಸಾಲಾ ಮಾಜಾ ದೆವಾಚ಼ ಮಾಗ್ನ ಕರತ್ಯೊ ಗರ‍್ಹಾಲಾ ಆದಾರಾಚಾ಼ ದಾರ್ಯೊನ್ ಕರ್ನಾರ್. ತ್ಯನಿ ಘರ್ ಆನಿ ಕಂದಿಸ್ ಸುಡುನ್ ಜಾ಼ಯಾಚಿ ಗರಜ಼ ನಾಹಿ. ಮಾಜಾ ದೇವಾಚ಼ ನಾವ್ ಆನಿ ಮಾಜಾ ದೇವಾಚೆ ಪೆಠಚ಼ ನಾವ್ ತ್ಯಚಿವ ಲಿವ್ತೊ. ನವಿ ಯೆರುಸಲೇಮುಸ್ ತಿ ಪ್ಯಾಟ್ ಮಾಜಾ ದೇವಾಪ್ನಿ ಸ್ವರ್ಗಾತ್ನಿ ಉತ್ರುನ್ ಯತಿ. ಮಾಜ಼ ನವ ನಾವ್ ತ್ಯಚಿವ ಲಿವ್ತೊ.
ಪವಿತ್ರಾತ್ಮ ಸಬೆನಾ ಸಾಂಗತ್ಯಾಲ್ಯಾ ಹ್ಯಾ ಖನ್ಕತಿ ಕಾನ್ ಆಸ್‌ಲ್ಯಾಲಾ ಐಕುನಿ.
ಲವೊದಿಕಿ ಸಬೆಲಾ ಸಂದೇಶ್
ಲವೊದಿಕಿ ಸಬೆಚಾ ದುತಾಲಾ ಹ್ಯೊ ಸಂದೇಶ್ ಲಿವ್:
ತಸಸ್ ವ್ಹವುನಿ1 ಮಂತ್ಯಾಲಾ ಮಂಜೆ ಇಸ್ವಾಸಾಚಾ಼ ಆನಿ ಖರಿ ವಳಕ್ ದೆವಾಚೆ ಉತ್ಪತಿಲಾ ದನ್ಹಿ ಜಾ಼ಲ್ಯಾಲಾ ಸಾಂಗಾಚ಼ ಕ್ಯಾ ಮಂಜೆ:
“ತು ರ್ಕತ್ಯಾಲ ಸಗ್ಳ ಮನಾ ಸಮಾಜ಼್ಲ್ಯಾ. ತು ಉನ್ಬಿ ನಾಹಿ, ಥಂಡ್ಬಿ ನಾಹಿ! ತು ಉನ್ ತರಿ ರಾಹ್ಯಾ ವ್ಹಯಿತಾಸ್ ನಾಹಿತ ಥಂಡ್ ತರಿ ರಾಹ್ಯಾ ವ್ಹಯಿತಾಸ್! ಫನ್ ತು ಉನ್ಬಿ ನಾಹಿಸ್ ಥಂಡ್ಬಿ ನಾಹಿಸ್ ಸೊಮಾಳ್ ಹಾಸ್ ಮನ್ಹುನ್ ತುಲಾ ಥುಕುನ್ ಟ್ಯಾಕ್ತೊ. ತು ಮನಾ ಸಾವ್ಕೊರ್ ಮನ್ಹುನ್ ಸಾಂಗತ್ಯೊಸ್. ತು ಸಾವ್ಕೊರ್ ಹಾಸ್ ಮನ್ಹುನ್ ತುಲಾ ಕಾಯ್ ಕಮಿ ನಾಹಿ ಮನ್ಹುನ್ ತು ಯವಜಲ್ಯಾಸ್. ಫನ್ ಖರ್ಯಾನಿಸ್ ತು ಬುರ್ಶಾತ್ ಗಾವಲ್ಯಾಲ್ಯಾಂಚೆಗತ್ ಹಾಸ್, ಗರಿಬ್ ಹಾಸ್, ಆಂದ್ಳಾ ಹಾಸ್ ಆನಿ ನಾಗ್ಡಾ ಹಾಸ್. ಫನ್ ಹ್ಯ ತುಲಾ ಸಮಾಜ಼್ಲಸ್ ನಾಹಿ. ಇಸತ್ಯಾತ್ ಗ್ಯಾತ್‍ಲ್ಯಾಲ ಚಾ಼ಂಗ್ಲ ಸೊನ ತು ಮಾಜಿಪ್ನಿ ಇಕತ್ ಗಿಹ್ಯಾ ವ್ಹಯಿಸ್ ಮನ್ಹುನ್ ಮಿ ಪಾರಕ್ ದೇತೊ. ತವಾ ತು ಖರ್ಯಾನಿಸ್ ಸಾವ್ಕೊರ್ ವ್ಹಯಾ ವ್ಹನಾರ್. ಮಿ ತುಲಾ ಸಾಂಗಾಚ಼ ಕ್ಯಾ ಮಂಜೆ: ಪಾಂಡ್ರಾ ಕಪ್ಡಾ ಇಕತ್ ಘೆ. ತವಾ ಮೀ ಮರೆದಿಚ಼ ತುಜ಼ ಉಗ್ಡ ಶರೀರ್ ಜಾ಼ಕಾಯಾ ವ್ಹನಾರ್. ತು ತುಜಾ ಡೊಳ್ಯಾನಾ ಲಾವಾಯಾ ವಖಾತ್ ಇಕತ್ ಗಿಹ್ಯಾ ವ್ಹಯಿಸ್ ಮನ್ಹುನ್ ಮಿ ತುಲಾ ಸಾಂಗ್ತೊ. ತವಾ ತುಲಾ ಖರ್ಯಾನಿಸ್ ನದ್ರಾ ಯನಾರ್.
“ಮೀ ಮಾಯಾ ಕರ್ತ್ಯಾಲ್ಯಾ ಲೊಕಾನಾಸ್ ಮೀ ಶಾರ್ಕಿ ಕರ್ತೊ ಆನಿ ಸಿಕ್ಷಾ ದೇತೊ. ಮನ್ಹುನ್ ತುಮಿ ಮನಾನಿ ರಾವ್ಹಾ! ದೇವಾಕ್ಡ ಪರ್ತಾ. ಹಬಕ್, ಮೀ ದಾರಾಪ ಉಬಾರಾವ್ಹುನ್ ವಾಜಿವತ್ಯೊ. ಕುನಿ ತರಿ ಐಕುನ್ ದಾರ್ ಉಗಡ್ಲತ, ಮೀ ಆತ್ ಯವುನ್ ತ್ಯಚಿ ಸಂಗ ಜೆವ್ನಾರ್ ಆನಿ ತ್ಯೊ ಮಾಜಿ ಸಂಗ ಜೆವ್ನಾರ್.
“ಮೀ ಜಿತ್‍ಲ್ಯಾಲ್ಯಾ ಮಾಜಾ ಬಾ ಸಂಗ ತ್ಯಚಾ ಸಿಂಹಾಸನಾವ ಬಸ್ಲೊ. ತಸಸ್ ಜಿತ್‍ಲ್ಯಾಲ್ಯಾ ಪರ್ತೆಕಾಲಾ ಮಾಜಿ ಸಂಗ ಸಿಂವಾಸಾನಾವ ಬಸಾಯಾ ಹಾಕ್ ಹಾ.
ಪವಿತ್ರಾತ್ಮ ಸಬೆನಾ ಸಾಂಗ್‍ತ್ಯಾಲ್ಯಾ ಹ್ಯಾ ಖನ್ಕತಿ ಐಕ್ ತ್ಯಂಚಿವ, ಧ್ಯಾನ್ ಥಿವುನ್ ಐಕ್. ”
Source notes (1)
- Footnote ಆಮೆನ್ ಹಿತ ಹ್ಯಲಾ ಯೆಸು ಕ್ರಿಸ್ತ್ ಹ್ಯಾ ನಾವಾಚಾ಼ ಆರ್ತ್ ಸಾಂಗಲ್ಯಾ. ಹ್ಯಾ ಇಬ್ರು ಸಬ್ದಾಚಾ಼ ಆರ್ತ ತಸಸ್ ವ್ಹವುನಿ ನಾಹಿತ ಖರ ವ್ಹವುನಿ.
ದೆವಾಚಿ ಖರಿ ಕಬರ್. Copyright © 2023 The Word for the World International and Gowly Marathi Translation Samti, Karnataka. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.