ದೆವಾಚಿ ಖರಿ ಕಬರ್
2 ಕೊರಿಂಥ 2
ಆನಿ ಯಂಗ್ದಾ ತುಮ್ಚಿಪ ಯವುನ್, ತುಮಿ ತರಾಸಾತ್ ಗಾಹುನಾಹಿಸಾ ಮನ್ಹುನ್ ಮೀ ನಿರ್ದಾರ್ ಕೆಲಾ. ಮೀಸ್ ತುಮನಾ ತರಾಸ್ ದಿಲಾತ, ಮನಾ ಸಂತೊಶ್ ಕರ್ತ್ಯಾಲ ಕೊನ್? ಮಾಜಿಪ್ನಿ ತರಾಸಾತ್ ಗಾವಲ್ಯಾಲಿ ತುಮಿಸ್ ನವ್ಹಸಾ ಕ್ಯಾ? ತ್ಯಚಿಸ್ ಲಾಗುನ್ ಮೀ ತ್ಯ ಪತ್ರ ಲಿವ್‍ಲ್ಯಾಲ: ಮನಾ ಸಂತೊಸ್ ಕರ್ನಾರ‍್ಯಾಂಚಾನಿಸ್ ಮನಾ ತರಾಸಾತ್ ಗಾಲುನಾಹಿ ಮನ್ಹುನ್ ಮೀ ಆಲೊ ನಾಹಿ. ಮಾಜಾ಼ ಸಂತೊಸುಸ್ ತುಮಚಾ಼ ಸಗಳ್ಯಾಂಚಾ಼ ಸಂತೊಸ್ ಮನ್ಹುನ್ ತುಮಿ ಮನ್ಸಿಲಾ ಮನ್ಹುನ್ ಇಸ್ವಾಸ್ ಕೆಲಾ. ತುಮ್ಚಿವ ಮನಾ ಆಸಲ್ಯಾಲಿ ಖುಬ್ ಮಾಯಾ ತುಮಿ ಸಮಜು಼ನ್ ಗಿಹ್ಯಾ ವ್ಹಯಿಸಾ ಮನ್ಹುನ್ ಮೀ ಖುಬ್ ರಡತ್ ಮನಾತ್‌ಲ್ಯಾ ತರಾಸಾನಿ ದುಖಾನಿ ತುಮಾನಾ ಲಿವಲ್ಯಾ ಖರ ತುಮಾನಾ ದುಖ್ವಾಯಾ ಸಾಟಿ ನವ್ಹ.
ವಾದಿಂಚೆಸಾಟಿ ಮಾಪಿಚ಼ ಮಾಗ್ನ
ಮನಾ ಬೆಜಾರ್ ಕೆಲ್ಯಾಲಾ ಯೊಕ್ ತುಮ್ಚಿಪ ಆಸ್ಲಾತ ತ್ಯನಿ ಮನಾ ತ್ಯವ್ಡಸ್ ದುಖ್ವಾಚೆ ಆಂದಿ ತುಮ್ಚಾತ್ ಖುಬ್ ಲೊಕಾನಾ ದುಖಿವಲ್ಯಾತ ತ್ಯ ದುಖ್ ಸಗಳ್ಯಾನಾ ಜಾ಼ಲ್ಯಾ ಮನ್ಹುನ್ ಮೀ ಸಾಂಗಿತ್ನಾಹಿ. ಆಸ್‌ಲ್ಯಾಲಾ ತುಮ್ಚಿಪ್‌ಲ್ಯಾ ಖುಭ್ ಲೊಕಾಂಚ್ಯಾಪ್ನಿ ಗಾವಲ್ಯಾಲಿ ತೀ ಸಿಕ್ಷೆಸ್ ಪುರೊ. ಆಜು಼ನ್ ತ್ಯಲಾ ಸಿಕ್ಷಾ ದಿಯಾಚೆ ಆಂದಿ ಮಾಪ್ಕರಾ, ಸಮ್ಜಾವಾ ನಾಹಿತ ತ್ಯೊ ಖುಬ್ ದುಖಾತುಸ್ ರಾನ್ಹಾರ್. ಮನ್ಹುನ್ ತ್ಯಲಾ ತುಮ್ಚಿ ಮಾಯಾ ದಾವಾಯಾ ವ್ಹಯಿಸಾ ಮನ್ಹುನ್ ತುಮ್ಚಿಪ ಮಾಕ್ತೊ. ಸಗಳ್ಯಾ ಗುಶ್ಟಿ ಪ್ಯಾಳ್‌ತ್ಯಾಸಾ ಕ್ಯಾ ನಾಹಿ ಮನ್ಹುನ್ ತುಮ್ಚಾ ಗುನಾಚಿ಼ ಪಾರಕ್ ಕರುನ್ ಸಮಜು಼ನ್ ಗಿಹ್ಯಾ ವ್ಹಯಿ ಮನ್ಹುನ್ ಆಸ ಲಿವ್ಲ. ತುಮಿ ಕುನಾಲಾ ಮಾಪಿ ಕರ್ತಾಸಾ. ಮೀ ಸಾಹಿತ್ ತ್ಯಲಾ ಮಾಪಿ ಕರ್ತೊ. ಯಕಯಳಿ ತುಮ್ಚಾತ್‌ಲ್ಯಾ ಕುನಾಲಾತರಿ ಮಾಪ್ ಕೆಲ್ಯಾಲ ಆಸ್ಲತ ಆನಿ ಕ್ರಿಸ್ತಾಪ ಮಾಪಿ ಕೆಲೆ. ಸೈತಾನಾನಿ ಆಮಚಾ಼ ಮೊಸ್ ಕರುನಾಹಿ ಮನ್ಹುನ್ ಆಸ ಕೆಲ. ತ್ಯಚಿ ಪಾರಕ್ ಸಗ್ಳಿ ಆಮಿ ಚಾ಼ಂಗ್ಲಿ ಸಮಜು಼ನ್ ಗೆತ್ಲೆ ನವ್ಹ.
ತ್ರೊವಾತ್ ಪೌಲಾಚಿ ಚಿಂತಾ
ದೇವಾನಿ ಮಾಜಿ ಸಾಟಿ ಅವ್ಕಾಶ್ ದಿಲಾ ಮನ್ಹುನ್ ಯವಜು಼ನ್ ಕ್ರಿಸ್ತಾಚಿ ಬರಿ ಖಬರ್ ಸಾಂಗಾಯಾ ಸಾಟಿ ಮೀ ತ್ರೊವ ಪೆಠತ್ ಆಲೊ. ಫನ್ ಮಾಜಾ಼ ಭಾಹು ತೀತ್ ಮನಾ ತಿಥ ಗಾವ್ಲಾ ನಾಹಿ ಮನ್ಹುನ್ ಮಾಜಾ ಮನಾಲಾ ಸಮಾಧಾನ್ ನಸ್ತಾನಾ ತಿಥ ಆಸ್‌ಲ್ಯಾಲ್ಯಾನಾ ಜಾ಼ವುನ್ ಯತೊ ಮನ್ಹುನ್ ಸಾಂಗುನ್ ತಿಥ್ನಿ ನಿಗುನ್ ಮಕೆದೊನ್ಯಾತ್ ಆಲೊ.
ಕ್ರಿಸ್ತಾಪ್ನಿ ಜೀತ್
ಕ್ರಿಸ್ತಾಪ್ನಿ ಆಮಾನಾ ಜೀತ್‌ಲ್ಯಾಲೆ ಮೆರವನಿಗಿತ್ ಚಾ಼ಲಿವ್ತೊ ಆನಿ ಕ್ರಿಸ್ತಾಚ಼ ಗಿನ್ಯಾನ್ ಆಮ್ಚಿಪ್ನಿ ಚಾಂಗಲ್ಯಾ ವಾಸಾಚೆಗತ್ ಸಗ್ಳಿಕ್ಡ ಪಗಾಳ್ಯಾಲ್ಯಾ ದೇವಾಲಾ ಸ್ತೊತ್ರ ವ್ಹವುನಿ. ರಕ್ಷನಾಚೆ ವಾಟವ ಆಸ್‌ಲ್ಯಾಲ್ಯಾನಾ ಆನಿ ನಾಶಾಡಿಚೆ ವಾಟವ ಆಸ್‌ಲ್ಯಾಲ್ಯಾನಾ ಆಮಿ ದೇವಾಚಾ಼ ಕ್ರಿಸ್ತಾಚಾ಼ ಚಾ಼ಂಗ್ಲಾವಾಸ್ ಜಾ಼ಲ್ಯಾವ್. ನಾಶಾಡಿಚೆ ವಾಟವ ಆಸ್‌ಲ್ಯಾಲ್ಯಾನಾ ಮರ್ನಾಚಾ಼ ವಾಸ್; ರಕ್ಷನಾಚೆ ವಾಟವ ಆಸ್‌ಲ್ಯಾಲ್ಯಾನಾ ಜೀವಾಚಾ಼ ಚಾ಼ಂಗ್ಲಾ ವಾಸ್ ಆಸ್‌ಲ್ಯಾ ಕಾಮಾಲಾ ಕೊನ್ ಲಾಯಿಕ್? ಕಿತಿತರಿ ಲೊಕ ದೇವಾಚ಼ ವಾಕ್ಯಾ ಲಬಾಡ್ ಸಾಂಗುನ್ ಯವಾರ್ ಕರ್ತ್ಯಾತ. ಆಮಿ ತಸ ನವ್ಹ; ದೇವಾನಿಸ್ ನಿವ್ಡುನ್, ದೇವಾಚೆ ಮೊರ್ಹ, ಯೇಸು ಕ್ರಿಸ್ತಾಚೆ ಯಕಿತ್ ಆಮಿ ಖರತ್ಯಸ್ ಸಾಂಗ್ನಾರ.
ದೆವಾಚಿ ಖರಿ ಕಬರ್. Copyright © 2023 The Word for the World International and Gowly Marathi Translation Samti, Karnataka. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.