1 ತೆಸಲೊನಿಕ್ 3

1ಸರ್ತಾನಾ ಆಮಿ ಖುಬ್ ಯೊಳ್ ರಾಖಾಯಾ ವ್ಹಯಿತ್ನಾಹಿ ಮನ್ಹುನ್ ಆಮಿ ಅಥೇನೆಯತ್ ರಾಹ್ಯಾಲಾ ನಿರ್ದಾರ್ ಕರ್ತಾವ್. 2ಆನಿ ಆಮಿ ಕ್ರಿಸ್ತಾಪ ಬಾಹು ಜಾ಼ಲ್ಯಾಲ ಆನಿ ದೇವಾಸಾಟಿ ಕ್ರಿಸ್ತಾಚೆ ಬರಿ ಖಬರ್ ಸಾಂಗಾಚೆ ಗುಶ್ಟಿತ್ ಮಾಜೆ ಸಂಗಚಾ಼ ಕಾಮ್ಗಾರಿ ತಿಮೊತ್ಯಾಲಾ ತುಮಾನಾ ಘಟ್ ಕರಾಯಾ ಆನಿ ಇಸ್ವಾಸಾತ್ ಉಮೇದ್ ದಿಯಾ ತುಮ್ಚಿಪ ಲಾವುನ್ ದಿಲ್ಯಾ. 3ತರಾಸಾತ್ ಆನಿ ಕಶ್ಟಾತ್ ಕೊನ್ ಸಾಹಿತ್ ಬಿಹುನ್ ದೇವಾವ ಇಸ್ವಾಸ್ ಥಿವುನ್ ರಾಹ್ಯಾ ಚ಼ ನಕೊ ಮನ್ಹುನ್ ಆಮಿ ಆಶಾ ಕರ್ತಾವ್. 4ಕಾ ಮಂಜೆ ಆಮಿ ತುಮ್ಚಿಪ ಆಸ್ಥಾನಾ ಆಮಿ ಸಗ್ಳಿ ತರಾಸ್ ಖಾಯಾಲಾಸ್ ವ್ಹಯಿಸಾ ಮನ್ಹುನ್ ಆಂದಿಚಾನ್ ಸಾಂಗಿತಾವ್. ತಸಸ್ ತುಮಾನಾ ಠಾವ ಆಸ್‌ಲ್ಯಾ ಶಾರ್ಕ ಹ್ಯ ಸಗ್ಳ ಜಾ಼ಲ್ಹ. 5ಮನ್ಹುನ್ ಆನಿ ಥಾಂಬಾಚೆ ಆಂದಿ ಎಕ್ ವೆಳಿ ಪರಿಕ್ಷೆ ಕರತ್ಯಾಲ್ಯಾನಿ ತುಮ್ಚಿ ಪರಿಕ್ಷೆ ಕಿಲಿ ನಸ್ತಿತ ಆಮಚಿ ಖಟ್ಪಟ್ ಉಗಸ್ ಜಾ಼ಲಿ ಕ್ಯಾ ಮನ್ಹುನ್ ತುಮಚಾ ಇಸ್ವಾಸಾಚೆ ಗುಸ್ಟಿತ್ ಸಮಜು಼ನ್ ಗಿಹ್ಯಾ ತ್ಯಲಾ ತುಮಚಿಪ ಲಾವುನ್ ದಿಲಾ.

6ಫನ್ ತಿಮೊಥೆ ತುಮ್ಚಿಪ್ನಿ ಪರ್ತುನ್ ಯವುನ್ ತುಮ್ಚಾ ಇಸ್ವಾಸಾಚೆ ಆನಿ ಮಾಯೆಚೆ಼ ಗುಶ್ಟಿತ್ ಬರಿ ಖಬರ್ ಸಾಂಗುನ್. ತುಮಿ ಆಮಾನಾ ಖಾಯಿಮ್ ಮಾಯೆನಿ ಯಾದಕರುನ್ ಆಮಿ ತುಮಾನಾ ಕಸಿ ತಸಿಸ್ ತುಮಿಬಿ ಆಮಾನಾ ಬಗಾಯಾಸಾಟಿ ಮನ್ ಕರತ್ಯಾಸಾ ಮನ್ಹುನ್ ಸಾಂಗಲ್ಯಾ. 7ಮನ್ಹುನ್ ಬನ್ಹಿ ಬಾವ್ಹಾನು, ಆಮ್ಚಾ ಸಗ್‌ಳ್ಯಾ ಕಶ್ಟಾತ್ ತರಾಸಾತ್ ತುಮ್ಚೆ ಇಸ್ವಾಸಾಚೆ ಗುಶ್ಟಿತ್ ಆಮಾನಾ ಉಮೇದ್ ಗಾವ್ಲಿ. 8ಪ್ರಭುಪ ತುಮಿ ಘಟ್ ಉಬಿ ರಾಯ್‌ಲ್ಯಾಸಾ ಹ್ಯಚಿಸಾಟಿಸ್ ಆತಾ ಆಮಿ ಸುಖಾತ್ ಹಾವ್. 9ತುಮ್ಚಿಸಾಟಿ ಆತಾ ಆಮಿ ದೇವಾಲಾ ದನ್ಯಾವಾದ್ ದೆತಾವ್ ತ್ಯಚೆ ಉಪಸ್ಥಿತಿತ್ ಆಮಾನಾ ಆಸ್‌ಲ್ಯಾಲಾ ಆನಂದ ತ್ಯಚಿಸಾಟಿ ಆಮಿ ತ್ಯಲಾ ದನ್ಯವಾದ್ ದೇತಾವ್. 10ಆಮಿ ರ‍್ಯಾತ್ ದೀಸ್ ಖಾಯಿಮ್ ತ್ಯಚಿಪ ಮಾಗ್ನ ಕರ್ತ್ಯಾವ್ ಆಮಿ ವಯಕ್ತಿಕ ತುಮಾನಾ ಬೆಟಾಯಾ ವ್ಹಯಿಲ್ ಆನಿ ತುಮ್ಚಾ ಇಸ್ವಾಸಾಲಾ ಗರಜ಼್ ಆಸ್‌ಲ್ಯಾಲಿ ಪುರ್ನ ಕರಾಯಾಸಾಟಿ,

11ಆನಿ ಆಮಚಾ಼ ಬಾಜಾ಼ಲ್ಯಾಲಾ ದೇವ್ ಆಮಚಾ಼ ಪ್ರಭು ಜಾ಼ಲ್ಯಾಲಾ ಯೇಸು ಆಮಾನಾ ತುಮ್ಚಿಪ ಯಯಾ ಮಾರ್ಗ ನೀಟ್ ಕರುಂತ 12ತುಮಚಿಪ ಆಮಚಿ ಮಾಯಾ ಲ ಜಾ಼ಲ್ಯಾಸಾರಿ ತುಮ್ಚಿ ಮಾಯಾ ಯಕಮಕಪ್ನಿ ಪಗಳುನ್ ಸಗಳ್ಯಾ ಮಾಂಚಾ಼ಂಚಿಪ ಜಾ಼ವುನ್ ಖುಬ್ ವ್ಹಯಿ ಸಾರಿ ಪ್ರಭು ಆಶಿರ್ವಾದ್ ಕರುನಿ. 13ಆಮಚಾ಼ ಪ್ರಭು ಜಾ಼ಲ್ಯಾಲಾ ಯೇಸು ಆಪ್‌ಲ್ಯಾ ಸಗ್‌ಳ್ಯಾ ಭಕ್ತಾಂಚೆ ಸಂಗ ದಿಸ್ಥಾನಾ ದೇವ್‌ ಜಾ಼ಲ್ಯಾಲ್ಯಾ ಆಮ್ಚಾ ಬಾಚೆ ಮೊರ‍್ಹ ತುಮಿ ಪವಿತ್ರ ಆನಿ ದೊಸ್ ನಸ್ನಾರ ವ್ಹಯಿಸಾರ ತುಮ್ಚಿ ಮನ ಘಟ್ ಕರುನಿ.