ओबद्याह 1

एदोम खे दण्ड

1ओबद्याह को दर्शन. एदोम1 का विषय2 मे यहोवा यो बोलस हइ : हम ने यहोवा का तरप से समाचार सुन्यो हइ, अरु एक खबर बतानआला के देश-देशहोन मे यो बोलन खे भेज्यो गयो हइ. 2“उठ! हम ओकासे लडन खे उठ्या.” मी तोखे दुसरा देशहोन से छोटो करी दियु, तु भोत बुरा मे गिन्यो जाह्ये. 3हे चट्टानहोन की दरारहोन मे बसनआला, हे उची जगा मे र्‍हेनआला, तरा अभिमान ने तोखे धोको दियो हइ; तु मन मे बोलस हइ, “कोन मेखे जमिन पर उतारी दिये?” 4पर अगर तू चील का जसो उचो उडस हइ, अरु ताराहोन का बीच अपनो गोदो बनायो हइ, तेभी मी तोखे व्हा से नीचे गिरायु, यहोवा को यो वचन हइ.

5अगर चोर-डाकू रात खे तरा पास आस हइ, ते का वे चोऱ्या हुया धन से मगन हुइ खे चली नी जाय? हाय, तू कसो बरबाद होनआलो हइ! अगर अंगूर का तोडनवाला तरा पास आस, ते का वे खय खय के अंगूर नी छोडी जास हइ. 6पन एसाव को धन कसो ढुंडीके लुट्यो गयो हइ, ओको लुकायो धन कसो पतो लगय लगयखे निकाल्यो गयो हइ!

7जेत्ता ने तरा से वाचा बाधी थी, वे सब ने तोखे सीमा तक ढकली दियो हइ. जो दुन्या तरा से मेल रखता था, वे तोखे धोको दिखे तुमके अपना अधिकार मे ली लिये. अरु जो तरी रोटी खास हइ, वे तरा लिये फन्दा लगास हइ ओमे कुछ समज नि हइ. 8परमेश्वर की या वाणी हइ, का मी उ टेम एदोम नगर मे से दिमागआला खे, अरु एसाव की टेकडी मे हुशारहोन खे खतम नी कर्यु? 9हे तेमान3, तरा शूरवीहोन को मन कच्चो हुइ जाये, अरु यो एसाव कि टेकडी पर का हर एक इन्सान मरी खे खतम हुइ जाये.

एदोम खे दण्ड को कारण

10हे एसाव, उ जुलुम का कारण जो तोने अपना भैइ याकुब पर कर्यो, सरम से तरो माथो झुख्ये अरु हमेशा का लिये खतम हुइ जाये. 11जो दिन परदेशी दुन्या ओकी धन सम्पत्ती लुटीखे ली गया, अरु दुसरा दुन्याहोन इस्राएल नगर का प्रवेश फाटकहोन से घुसी खे यरुशलेम के बाटन का लिये चिट्ठी डाली, उ दिन तू भी उनका मे से एक थो. 12पन तोखे अच्छो नी थो कि तू अपना भैइ का दिन मे, अर्थात् ओका दु:ख का दिन मे ओका तरप देखतो ऱ्हेस, अरु यहुदिहोन का विनाश का दिन उनका उपर खुशी करस, अरु उनका संकट का दिन घमंड से बात बोलस हइ. 13पन तोखे अच्छो नी थो कि मरी दुन्या का दु:ख का दिन तू ओका फाटक मे घुसस, अरु ओका दु:ख का दिन ओकी दुर्दशा खे देखतो ऱ्हेस, अरु ओकी विपत्ति का दिन ओकी धन सम्पत्ति पर हाथ लगास. 14तोके उचित नी थो कि चौराह पर ओका भागन आला के मारी डालन का लिये खडो ऱ्हेतो, अरु संकट का दिन ओका बच्या हुया के पकडातो.

परमेश्‍वर देश-देशहोन को न्याय करस

15क्युकि सब देश-देशहोन पर यहोवा को दिन को आनो नजीक हइ. जसो तोने कर्यो हइ, ओसो ही तरा से भी कर्यो जाये, तरो व्यवहार पलटी खे तरा ही माथा पर आह्ये. 16जो प्रकार तोने मरा पवित्र टेकडी पर पियो, उही प्रकार से सब देश-देशहोन लगातार पीती र्हिये अतनो ही नी सुड़क-सुड़ककर पीये, अरु असी गायब हुइ जाये जसी पहले थी ही नी.

इस्राएल की विजय

17पन उ टेम सिय्योन टेकडी पर बच्या हुया दुन्या र्हिये, अरु वा पवित्र जगा ठर्ये; अरु याकुब को कुल अपना निज भागहोन को अधिकारी हुये. 18तब याकुब को घरानो अंगार, अरु युसुफ को घरानो ले, अरु एसाव को घराना फन बनी जाये; अरु वे ओमे अंगार लगय खे उनखे भस्म करे, अरु एसाव का घराना को कोय नी बचे; क्युकी यहोवा ने ही असो बोल्यो हइ.

19दक्षिण देश का दुन्या एसाव कि टेकडी का अधिकारी हुये जाये, अरु नीचे का देश का दुन्या पलिश्तिहोन का अधिकारी हुये; अरु यहूदीया, एप्रैम अरु सामरिया कि जगा खे अपना भाग मे करी लिये, अरु बिन्यामिन गिलाद को अधिकारी हुये. 20इस्राएलिहोन का उ दल मे से जो दुन्या गुलामी मे हुइके कनानिहोन का बिच सारपत तक र्‍हेस हइ, अरु यरूशलेमीहोन मे से जो दुन्या गुलामी मे हुइके सपाराद मे र्‍हेस हइ, वे सब दक्षिण देश का नगरहोन को अधिकारी हुय जाये. 21जित्या हुया दुनिया एसाव कि टेकडी को न्याय करन का लिये सिय्योन टेकडी पर चडी जाये, अरु शासन यहोवा को हि हुइ जाये.