Gowlan Bible
लैव्यव्यवस्था 20
आज्ञा–उल्लंघन कि सजा
फिर यहोवा ने मूसा से बोल्यो, “इस्राएलियोहोन से बोल कि इस्राएलिहोन मे से या इस्राएलिहोन का बिच र्हेनआलाहोन परदेशीहोन मे से कोय क्यु नी हुये जो अपनी कोय बच्चा मोलेक1 देवता खे बलिदान कर्ये, उ निश्चय मारी डाल्यो जाये; अरु जनता ओका पर पथराव कर्ये.” मी भी उ इन्सान का विरोध्द मे हुइ खे ओखे ओका दुनियाहोन मे से यो कारण नष्ट कर्यु कि ओने अपनी सन्तान मोलेक देवता खे दिखे मरा पवित्र जगह खे अपवित्र कर्यो, अरु मरा पवित्र नाम खे अपवित्र ठहरायो. अरु अगर कोय अपनी सन्तान मोलेक देवता खे बलिदान कर्ये, अरु जनता ओका बारे मे आनाकानी कर्ये अरु ओ खे मारी नी डाल्ये. तब तो मी खुद खे उ इन्सान अरु ओका घराना का खिलाप हुइ खे ओ खे अरु जेत्ता ओका पीछे हुइ खे मोलेक देवता का साथ व्यभिचार कर्ये वे सभी खे भी उनका दुनियाहोन का बीच मे से नष्ट कर्यु. “फिर जो जनवर जंत्रमंत्र आलो या भूत साधन आलो का तरप घुम्ये, अरु ओका पीछे हुइ खे व्यभिचार बन्या, ते मी उ जनवर का विरोध्द मे हुइ खे ओखे ओका दुनियाहोन का बीच मे से नष्ट करी दियु.” येकालिये तुम अपना आप खे पवित्र कर; अरु पवित्र बन्या र्हेनु. क्युकी मी तुमारो परमेश्वर यहोवा आय. अरु तुम मरी विधिहोन खे माननु, अरु उनको पालन भी करनु; क्युकी मी तुमारो पवित्र करनवालो यहोवा हई. कोय क्यु नी हुये जो अपना बाप या माय खे शाप दिये उ निश्चय मारी डाल्यो जाये; ओने अपना बाप या माय खे शाप दियो हइ, यो कारण ओको खुन ओका माथा पर पड्ये. “फेर अगर कोय दुसरा की लुगेन का साथ व्यभिचार कर्ये, ते जेने कोय दुसरा की लुगेन का साथ व्यभिचार कर्यो हय, ते वा व्यभिचार अरु उ व्यभिचारिणी दोइ निश्चय मारी डाल्यो जाये.” अगर कोय अपना बाप की लुगेन का साथ सोया, उ अपना बाप को ही तन उघाडनेवाला ढर्हे; येकालिये वे दोइ निश्चय मारी डाल्यो जाये, ओको खुन ओका ही माथा पर आह्ये. अगर कोय अपनी बहु का साथ सोया, ते वे दोइ निश्चय मारी डाल्यो जाये; क्युकी वे गलत काम करणआला ठैर्ये, अरु ओको खुन ओका ही माथा पर पड्ये. अगर कोय इन्सान कोय इन्सान का सात असो ही सबंध बनास जसो कोय बइ का सात, ते उन्हे यो बुरो काम कऱ्यो हइ, यो कारण वे दोयजन माऱ्यो डाल्यो जाये, ओको खुन ओका ही माथा पर पड्ये. अगर कोय अपनी लुगेन अरु अपनी सासु दोइ खे रख्यो, ते यो पाप हइ; येकालिये उ इन्सान अरु वे बयहोन तीनी का तीन अंगार मे जलायो जाये, जेकासे तुमारा बिच मे पाप नी हुइ. फिर यदि कोय इन्सान जनवर से संबध बनास हइ, ते इन्सान अरु जनवर दोइ निश्चय मारी डाल्यो जाये. अगर कोय बय जनवर का पास जैय खे ओका संग सबंध बनास, ते तू वा बय अरु जनवर दोइ खे घात करनु; वे निश्चय मारी डाल्यो जाये, ओको खुन ओका ही माथा पर आह्ये. “अगर कोई अपनी बहिन को, चाह्ये ओकी बहिन सगी चाहे सौतेली, ओको बिना कपडा को आंग देख्ये, अरु ओकी बहिन भी ओको बिना कपडा को आंग देख्ये, ते यो नीन्दित बात हइ, वे दोइ अपना जात भइहोन का आख का सामने नष्ट कर्यो जाये; क्युकी जो अपनी बहिन को आंग उघाड़नेवाला ठयर्ये ओखे अपना दोष को भार खुद उठानु पड्ये.” फिर यदि कोय इन्सान कोय मासिक धर्म लुगेन का संग सोयखे ओको आंग उघाडे, ते उ इन्सान ओका स्त्राव का सबंध के उघाड़नेवाला ढर्हे, अरु वा बइ अपना स्त्राव का सबंध खे उघाड़नेवाली ठहर्ये; यो कारण वे दोइ अपना दुनियाहोन का बीच मे से नष्ट कर्या जाये. अपनी जीजी या फूफू को आंग नी उघाड़नु, क्युकी जो ओखे उघाड्ये उ अपना नजीक कुटुम्बिनी खे बिना कपडा को करस हइ; येकालिये उन दोय खे अपना दोष को बोझो उठानु पड्ये. अगर कोय अपनी काकी का संग सोयो, ते उ अपना काको को आंग उघाड़नेवाला ढर्हे; येकालिये वे दोइ अपना पाप को बोज खे उठाया हुया बिना बच्चा का मरी जाये. अगर कोय अपनी भाभी खे अपनी लुगय बनाया, ते ओखे घिनौनो काम जाननु. अरु उ अपना भैइ को आंग उघाड़नेवाला ढर्हे, यो कारण वे दोइ बिना बच्चा का रिये. “तुम मरा सब विधिहोन अरु सब मरा नियमहोन खे समझ का साथ माननो; जेकासे यो नी हुये कि जो देश मे मी तुमखे लिये जय रो हइ उ तुम खे निकाली दे.” अरु जो जात का राष्ट्रहोन खे मी तुम्हारा आगे से नीकलस हइ उनकी रीति रिवाज पर नी चलनो; क्युकि वे दुन्या ने जो ये सब गलत काम कर्यो हइ, यो कारण मेखे ओकासे घुस्सा हुय गय हइ. पर मी तुम से बोलुस हइ कि तुम ते उनकी जमीन का अधिकारी हुये, अरु मी यो देश खे जेमे दूध अरु मधु कि धाराहोन बोहास हइ तुम्हारा अधिकार मे करी दियु; मी तुमखे परमेश्वर यहोवा हइ जेने तुम खे अन्य देशहोन का दुन्याहोन से अलग कर्यो हइ. यो कारण तुम शुध्द अरु अशुध्द जनवरहोन मे, अरु शुध्द अरु अशुध्द चिडीहोन मे भेद करनु; अरु कोय जनवर या चिडी या कोय प्रकार को जमीन पर रेंगनेवाला जीवजन्तु क्यु नी हुये, जेखे मी ने तुम्हारा लिये अशुध्द ठहरायो वर्जित कर्यो हइ, ओकासे अपना खुद खे अशुध्द नी करनो. तुम मरा लिये पवित्र बन्या र्हेनु; क्योकि मी यहोवा खुद पवित्र हइ, अरु मी ने तुम खे अरु देशहोन का दुन्याहोन से येकालिये अलग कर्यो हइ कि तुम हमेशा मरो हि बन्या र्हेनु. “अगर कोय इन्सान या लुगेन जंत्रमंत्र अरु भूत की साधना कर्ये, ते उ निश्चय मारी डाल्यो जाये. असा पर पत्थराव कऱ्यो जाये, ओको खुन ओका ही माथा पर पड्ये.”
Source notes (1)
- Footnote कनानीहोन का वजेसे पुज्यो जान आलो देवता
Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.