लैव्यव्यवस्था 17

खुन की पवित्रता

1फिर यहोवा ने मूसा से बोल्यो, 2हारुन अरु ओका बेटाहोन से अरु सब इस्राएलीहोन से बोल कि यहोवा ने या आज्ञा दी हइ: 3इस्राएल का कुल मे से कोय इन्सान हइ जो मेडा का बच्‍चा, या बकरी, चाहे तम्बु मे चाहे तम्बु से बाहेर मारीखे 4मिलापआला तम्बु का दरवाजा पर, यहोवा का घर का सामने यहोवा खे चडान का निमित्त नी लीके जाये, ते उ इन्सान खे खुन बोहान को दोष लग्ये; अरु उ इन्सान जो खुन बहानवालो ठयर्ये, उ अपना दुनियाहोन का बिच से खतम कर्यो जाये. 5या विधि को यो कारण हइ कि इस्राएली अपनो बलिदान जेखे वे खुला मैदान मे खुन करस हइ, वे उनखे मिलापआला तम्बु का दरवाजा पर याजक का पास, यहोवा का लिये लीके जयखे ओका लिये मेल-मिलाप बलिदान करिखे बलिदान कर्या कर. 6अरु याजक खुन खे मिलापवाला तम्बू का दरवाजा पर यहोवा की वेदी का उपर छिडक्ये, अरु चरबी खे ओका सुखदायक बासदेनवाला का लिये जलाये. 7वे जो बकरा के पुजनआला हुइखे व्यभिचार करस हइ, वे फिर अपना बलिजनवरहोन खे उनका लिये बलिदान नी कर्ये. तुमारी पीडीहोन का लिये या हमेशा कि विधि हुये. 8“तू उनका से बोल कि इस्राएल का घराना का दुनियाहोन मे से या उनका बिच ऱ्हेनवालाहोन परदेशीहोन मे से कोय इन्सान क्यु नी हुये जो होमबलि या मेल-मिलाप बलिदान चढाये,” 9अरु उनखे मिलापआला तम्बू का दरवाजा पर यहोवा का लिये चडान खे नी ली आये; उ इन्सान अपना दुन्याहोन मे से खतम कर्यो जाये. 10फिर इस्राएल का घराना का दुनियाहोन मे से या उनका बिच ऱ्हेनवालाहोन परदेशीहोन मे से कोय इन्सान क्यु नी हुये जो कोय प्रकार को खुन खाये, मी उ खुन खानवाला का विरुध्द हुइके ओखे ओका दुनियाहोन का बीच मे से खतम करी डाल्यु. 11क्युकी आंग को जान खुन मे र्‍हेस हइ; अरु ओखे मेने तुम दुन्या खे वेदी पर चडान का लिये दियो हइ कि तुम्हारा जान का लिये पाप खे झाक्यो जाये; क्युकी जान का कारण खुन से ही प्रायश्‍चित्त होस हइ. 12यो कारण मी इस्राएलिहोन से बोलुस हइ कि तुम मे से कोय जनवर खुन नी खानु, अरु जो परदेशी तुमारा बिच ऱ्हेस हइ उ भी खुन कभी नी खानु. 13“इस्राएलिहोन मे से या उनका बिच र्हेनवालाहोन परदेशीहोन मे से कोय इन्सान क्यु नी हुये जो शिकार करीखे खान का योग्य जनवर या चिडी खे पकड्ये; उ ओका खुन खे लुंडकयखे धुल्ला से झाकी दे. 14क्युकी आंग को जान जो हइ उ ओको खुन ही हइ जो ओका जान का साथ एक हइ. येका लिये मी इस्राएलिहोन से बोलुस हइ कि कोय प्रकार का जनवर को खुन खे तुम नी खानु, क्युकि सब जनवरहोन को जान उनको खुन ही हइ. जो कोय ओखे खाये उ खतम कर्यो जाये. 15अरु चाये उ देशी हुये या परदेशी हुये, जो कोय लास या मार्यो हुया जनवर को मास खाये उ अपना कपडा खे धोयखे पाणी से आंग धो, अरु संज्या तक अशुध्द र्हिये; तब उ शुद्ध हुये. 16पन अगर उ कपडा खे नी धोये अरु नी आंग धोये, ते ओखे अपना दोष को भार खुद उठानु पड्ये.”