Skip to content
BibleKenya

Gowlan Bible

लैव्यव्यवस्था 14

कोढ से शुद्ध ठैरायो जान्यो

फिर यहोवा ने मूसा से बोल्यो, “कोढी के शुद्ध रखन की व्यवस्था या हइ. उ याजक का पास पहुचाया जाह्ये.” अरु याजक तंम्बु का बाहेर जाये, अरु याजक उ कोढी खे देख्यो, अरु अगर ओको कोढ को चठ्ठो अच्छो हुयो हइ, ते याजक आज्ञा दे कि शुद्ध रखन आला का लिये दो शुद्ध अरु जिन्दी चिडी होन, देवदारु की लकडी, अरु लाल रंग को कपडो अरु जुफा ये सब लायो जाये. अरु याजक आज्ञा दे कि एक चिडी बोहाते हुया पाणी का उपर मट्टी का बरतन मे बलि कर्यो जाये. तब वा जिन्दी चिडी खे देवदारु की लकडी अरु लाल रंग का कपडा अरु जुफा या सभी खे लिखे एक सात वा चिडी का खुन मे जो बोहाते हुया पाणी का उपर बलि कर्यो गयो हइ डुबय दे. अरु कोढ से शुद्ध ठेरनआला पर सात बार छिड़की खे ओखे शुद्ध ठहरायो, तब उ जिन्दी चिडी खे मैदान मे छोडी दे. अरु शुद्ध ठेरनआला अपना कपडा खे धोये, अरु सब बाल मुंडीखे पाणी से आंग धोय ले, तब उ शुद्ध ठर्ये; अरु ओका बाद उ छावनी मे अय पाये, पर सात दिन तक अपना डेरा से बाहर ही ऱ्हे. अरु सातवा दिन उ माथो, दाडी अरु भुया का सब बाल मुँड़ाए, अरु सब हिस्सा मुण्डन कर्ये, अरु अपना कपडा खे धोये, अरु पाणी से आंग धोय ले, तब उ शुद्ध ठर्ये. आठवा दिन वे दो नीरोगी मेडा को बच्चो, अरु एक साल की नीरोगी मेडा की बच्‍ची, अरु अन्न दान का लिये तेल से ओसन्यो हुयो एपा1 को पाच किलो आटो, अरु आदो लिटर तेल लायो. अरु शुद्ध रखनवालो याजक ये चिजहोन समेत उ शुद्ध होन वाला इन्सान खे यहोवा का सम्मुख मिलापवालो तम्बू का दरवाजा पर खडो करनु. तब याजक एक मेडा को बच्‍चा लिखे दोषबलि का लिये ओखे अरु उ आदा लिटर तेल खे सामने लायो, अरु ये दोइ खे हलान की दान का लिये यहोवा का सामने हलाये; अरु उ मेडा का बच्‍चे खे उ जगा मे जहा वा पापबलि अरु होमबलि जनवरहोन को बलिदान कर्या कर्ये, अर्थात् पवित्रस्‍थान में बलिदान करनु; क्युकी जसो पापबली याजक को निज भाग हुये, ओसो ही दोषबलि भी ओको निज भाग हुये; उ परमपवित्र हइ. तब याजक दोषबलि का खुन मे से कुछ लिखे शुध्द ठेरनआला का जवनो कान का माथा पर, अरु ओका जवना हाथ अरु जवनो पाय का उंगलाहोन पर लगाया. तब याजक वा आदा लिटर तेल मे से कुछ लिखे अपना बाया हाथ की हथेली पर डाल्यो, अरु याजक अपना जवना हात की उंगली खे अपना बाया हथेली पर तेल मे डुब्यखे वा तेल मे से कुछ अपनी उंगली से यहोवा का सामने सात बार छिडक्ये. अरु जो तेल ओकी हथेली पर र्‍हि जाये याजक ओमे से कुछ शुध्द होनआला का जवनो कान का माथा पर अरु ओका जवना हाथ अरु जवनो पाय का अंगूठाहोन पर दोषबलि का खुन का उपर लगाये. अरु जो तेल याजक की हथेली पर र्‍हि जाये ओखे उ शुद्ध होनआला का माथा पर डाली दे. अरु याजक ओका लिये यहोवा का सामने पापहोन के झाके. याजक पापबली खे भी चड्यैइ, ओका लिये जो अपनी अशुदधता से शुद्ध होनवालो हइ प्रायश्‍चित्त कर्ये; अरु ओका बाद होमबलि जनवर को बलिदान करीखे : अन्न दान समेत वेदी पर चढायो; अरु याजक ओका लिये प्रायश्‍चित्त कर्ये, अरु उ शुध्द ठर्ये. “पन अगर उ गरीब हुय अरु येतनो लान का लिये ओका पास पइसा नी हुये, ते उ अपनो प्रायश्‍चित्त करणा का लिये, हलान का लिये मेडा को बच्‍चा दोषबलि का लिये, अरु तेल से ओसन्यो हुयो एपा2 पाच किलो आटो अन्न दान करिखे, अरु आदा लिटर तेल लायो. अरु दो फांडकुल या कबुतर का दो बच्‍चे लायो, जो उ ला सक्या; अरु इनमे से एक तो पापबली का लिये अरु दुसरो होमबलि का लिये हुये. अरु आठवा दिन वे ये सभी खे अपना शुद्ध ठहरन का लिये मिलानआला तम्बु का दरवाजा पर यहोवा का सामने याजक का पास ली आया. तब याजक उ आदा लिटर तेल अरु दोषबलिआला मेडा का बच्चा खे लिखे हलान की दान का लिये यहोवा का सामने हलाये. फिर दोषबलि का मेडा का बच्‍चे को बलिदान कर्यो जाये; अरु याजक ओका खुन मे से कुछ लिखे शुध्द र्हेनआला का जवना कान का माथा पर, अरु ओका जवना हाथ अरु जवनो पाय का उंगला पर लगाया. तब याजक वा तेल मे से कुछ अपना डाखोऱ्या हाथ की हथेली पर डालीखे, अपना जवना हात की उंगली से अपना डाखोऱ्या हात की हथेली पर तेल मे से कुछ यहोवा का सामने सात बार छिडक्ये; फेर याजक अपनी हथेली पर तेल मे से कुछ शुध्द ठेरनआला का जवनो कान का माथा पर, अरु ओका जवना हाथ अरु जवनो पाय का उंगला पर, अरु दोषबलि का खुन का जगह पर लगा; अरु जो तेल याजक की हथेली पर र्‍हि जाये ओखे उ शुद्ध ठेरनआला का लिये यहोवा का सामने प्रायश्‍चित्त करन खे ओका माथा पर डाली दे. तब उ फांडकुलहोन या कबुतर का बच्चा मे से जो उ लय सकस हइ एक खे चढाये, पन जो चिडी उ लय सकस हइ, उनमे से उ एक खे पापबलि का लिये अरु अन्न दान समेत दुसरा खे होमबलि का लिये चढाये, या रीति से याजक शुध्द ठहरनवाला का लिये यहोवा का सामने पापहोन के झाके. जेखे कोढ को चठ्ठो हुयो हइ, अरु ओकी येत्ती धन नी हुये कि उ शुद्ध रखन की चिजहोन खे लय सकस, ते ओका लिये या व्यवस्था हइ.”

भवन को कोढ

फिर यहोवा ने मूसा अरु हारुन से बोल्यो, जब तुम दुन्या कनान देश मे पहुच्ये, जेखे मी तुमारी निज भुय होन का लिये तुमखे देउस हइ, उ टेम अगर मी कोढ की चठ्ठो तुमारा अधिकार का कोय घर मे दिखायु, ते जेको उ घर हुये उ अय खे याजक खे बतय दे कि मी देखुस हइ कि घर मे समजनु कोय चठ्ठो हइ. तब याजक आज्ञा दे कि उ घर मे चठ्ठो देखन का लिये मरा जाना से पैयले ओखे खाली कर, कही असो नी हुये कि जो कुछ घर मे हइ, वे सब अशुदध ढर्हे; अरु पीछे याजक घर देखन खे अंदर जाये. तब उ चठ्ठा खे देख्ये; अरु अगर उ चठ्ठो घर की दिवालहोन पर हरी हरी या लाल लाल मान खोदी हुइ लकीरहोन का रुप मे हुये, अरु ये लकीरहोन दिवाल मे खोल दिखय पडस हइ. ते याजक घर से बाहेर दरवाजा पर जैय खे घर खे सात दिन तक बन्द करी रख्ये. अरु सातवा दिन याजक अयखे देख्ये; अरु अगर उ चठ्ठो घर की दिवालहोन पर फैली गयो हइ, ते याजक आज्ञा दी कि जो पत्थरहोन खे चठ्ठो हइ उनखे निकाली करी नगर से बाहेर कोय अशुदध जगा मे फेकी दे. अरु उ घर का अंदर ही अंदर चारी तरफ खुरच, अरु उ खुर्ची हुइ मट्टी नगर से बाहेर कोय अशुदध जगा मे डाली दी. अरु वे पत्थरहोन का जगा मे अरु दूसरा पत्थर लि खे ला अरु व्हा ताजो गारो लिखे घर की जुडय कर. अगर फत्तरहोन खे नीकली जाना अरु घर का खुरच्यो अरु लिप्यो जाना का बाद उ चठ्ठो फिर घर मे फुटीखे निकल्ये, ते याजक अयखे देख्ये; अरु अगर उ चठ्ठो घर मे फैली गय हइ, ते उ जानी ले कि घर मे हानिकारक कोढ हइ; वा खराब हइ. अरु उ सब ईट समेत पत्थर, लकडी अरु घर खे खोदी खे गिरय दे; अरु वे सब चिजहोन खे उठयखे नगर से बाहेर कोय अशुदध जगा पर फेकी दे. अरु जब तक उ घर बन्द र्हिये तब तक अगर कोय ओमे जाये ते उ संज्या तक अशुदध र्हिये. अरु जो कोय उ घर मे सोये उ अपना कपडा खे धोये; अरु जो कोय उ घर मे खानो खाये उ भी अपना कपडा खे धोये. “पर अगर याजक अयखे देख्ये कि जब से घर लिप्यो गयो हइ तब से ओमे चठ्ठो नी फैल्यो हइ, ते यो जानीखे कि उ चठ्ठो दुर हुइ गयो हइ, अपना घर खे शुद्ध ठैरायो.” अरु उ घर खे पवित्र करन का लिये दो चिडी, देवदारु की लकडी, अरु लाल रंग को कपडो अरु जुफा का झाड कि डग्यान लायो. अरु एक चिडी बोहाते हुया पाणी का उपर मट्टी का बरतन मे बलिदान करनु, तब उ देवदारु की लकडी, अरु लाल रंग का कपडा अरु जुफा का झाड कि डग्यान अरु जिन्दो चिडी या सभी खे लिखे बलिदान कर्या हुया चिडी का खुन मे अरु बोहाते हुया पाणी मे डुबय दे, अरु उ घर पर सात बार छिडक्ये. यो प्रकार उ चिडी का खुन, अरु बोहाते हुया पाणी का चिडी, अरु देवदारु की लकडी. जुफा का झाड कि डग्यान अरु लाल रंग का कपडा का वजेसे घर खे शुध्द कर. तब उ जिन्दी चिडी खे नगर से बाहेर मैदान मे छोडी दे; या रीति से उ घर का लिये प्रायश्‍चित्त कर्ये, तब उ शुध्द ठर्ये. सब प्रकार का कोढ का चठ्ठा, अरु दाद, अरु कपडा, अरु घर को कोढ, अरु सूजन, अरु फोडो, अरु दाग का बारे मे, शुध्द अरु अशुध्द रखन की शिक्षा देन कि व्यवस्था या हइ. सब प्रकार का कोढ कि व्यवस्था या हइ.

Source notes (2)
  1. Footnote पाच किलो आटो
  2. Footnote पाच किलो आटो

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.