Skip to content
BibleKenya

Gowlan Bible

उत्पत्ति 48

याकुब का एप्रैम अरु मनश्शिह को आशिर्वाद देना

या बातहोन का बाद किय ने युसुफ से बोल्यो, “सुन, तरो बाप बिमार हइ,” तब उ मनश्शे अरु एप्रैम नामको अपना दोय बेटाहोन का संग लि खे ओका पास गयो. कोय ने याकुब खे बतैइ दियो, “तरो बेटो यूसुफ तरा पास अय रो हइ,” तब इस्राएल अपना खे समांली खे खटीया पर बठी गयो. अरु याकुब ने युसुफ से बोल्यो, “सर्वशक्तिमान परमेश्वर ने कनान देश खे लूज नगर का पास तो खे दर्शन दि खे आशिर्वाद दियो. अरु बोल्यो, ‘सुन मी तो खे फलवन्त करी खे बडायु, अरु तो खे राज्य राज्य की मण्डली को मुल बनायु, अरु तरा बाद तरो कुल खे यो देश दियु, जेकासे कि उ सदा तक उनकी निज जमीन बनी र्‍हिये.’ अरु अब तरा दोय बेटा, जो मिस्र मे मरा आना से पयले पैदा हुया हइ, वे मरा ही ठैइर्ये; अर्थात जो रीती से रुबेन अरु शिमोन मरा हइ, उ रीती से एप्रैम अरु मनश्शे भी मरा ठैइर्ये. अरु ओका बाद तरा जो सन्तान पैदा हुये, उ तरा तो ठैइर्ये; पर बटवारा का टेम्मे वे अपना भइहोन ही का कुल मे गिन्या जाये. जब मी पद्दान से आयो थो, तब एप्राता पहुँचना से थोडी दुर पैयले राहेल कनान देश मे, रस्ता मे मरा सामने मरी गय; अरु मेने ओ खे वइ अर्थात एप्राता जो बैतलहम भी बोल्योलास हइ, उय रस्ता मे मट्टी दी.” तब इस्राएल खे युसुफ खे बेटो दिखी पड्यो, अरु ओने पूच्छो, “यो कोन आय?” युसुफ ने अपना बाप से बोल्यो, “यो मरो बेटो आय, जो परमेश्वर ने मे खे यहा दियो हइ” ओने बोल्यो, “उन खे मरा पास लि आ कि मी उन खे आशिर्वाद दियु.” इस्राएल की आखहोन बुडापा का कारण धुन्दली हुय गय थी, यहा तक कि ओ खे कम सूझतो थो, तब यूसुब उन खे उनका पास ली गयो; अरु ओने उन खे चूमी खे गलो लगैइ लियो. तब इस्राएल ने युसुफ से बोल्यो, “मे खे आशा नी थी, कि मी तरो मुंडो फिर देख पायु; पर देख परमेश्वर ने मे खे तरो कुल भी दिखायो हइ.” तब युसुफ ने उनने अपना बाप का घुटना का बीच से हटी खे अरु अपना मुंडा का बल जमीन पर गिरी खे नमस्कार कर्यो. तब युसुफ ने उन दोय खे लि खे, अर्थात एप्रैम खे अपना दाहिना हाथ से, कि उ इस्राएल का बाया हाथ पड्ये, अरु मनश्शे खे अपना बाया हाथ से, कि इस्राएल का दाहिना हाथ पड्ये, उनका पास लि गयो. तब इस्राएल ने अपना दाहिना हाथ बड्‍येइ खे एप्रैम का माथा पर जो छोटो थो, अरु अपना बाया हाथ बडैइ खे मनश्‍शे का माथा पर रखी दियो; ओने तो जानी बुझी खे असो कर्यो; नी ते बडो मनश्शे ही थो. फिर ओने युसुफ खे आशिर्वाद दि खे बोल्यो, “परमेश्वर जेका सामने मरा बापदादो अब्राहम अरु इसहाक चलता था उय परमेश्वर मरा जन्म से लि खे आज तक मरो चरवाहा बन्यो हइ. अरु उय दूत मे खे पुरी बुराइ से छुडाता आयो हइ, उय अब इन पोर्याहोन खे आशिर्वाद दे; अरु ये मरा अरु मरा बापदादो अब्राहम अरु इसहाक का बोल्योलास अरु पृथ्वी मे बहुतायत से बडनु.” जब युसुफ ने देख्यो कि मरा बाप ने अपना दाहिना हात एप्रैम का माथा पर रख्यो हइ, तब या बात ओ खे बुरी लगी; येकालिये ओने अपना बाप का हाथ यो मनसा से पकड लियो, कि एप्रैम का माथा पर से उठैइ खे मनश्शे का माथा पर रखी दे. अरु युसुफ ने अपना बाप से बोल्यो, “हे बाप, असो नी क्युकि बडो यही हइ; अपना दाहिना हाथ येका माथा पर रख.” ओका बाप ने बोल्यो, “नी, सुन, हे मरा बेटा, मी या बात खे भली भाँति जानुस हइ अगर येकासे भी इन्सानहोन की एक मण्डली पैदा हुये, अरु यो भी महान हुय जाये, ते भी येको छोटो भइ येकासे जादा महान हुय जाये, अरु ओका कुल से भोत सा जातहोन निकल्ये.” फिर ओने उय दिन यो बोली खे उन खे आशिर्वाद दियो, “इस्राएली दुनिया तरो नाम लीके असो आशीर्वाद दियो कर, ‘परमेश्वर तोके एप्रैम अरू मनश्शे का जसो बनय दे,’ ” अरु ओने मनश्शे से पहले एप्रैम को नाम लियो. तब इस्राएल ने युसुफ से बोल्यो, “देख, मी तो मरना पर हइ पर परमेश्वर तुम इन्सानहोन का संग र्‍हिये, अरु तुम खे तुम्‍हारा पितरो का देश मे फिर पहुचैइ दिये. अरु मी तो खे तरा भइहोन जादा जमीन को भाग देउस हइ, जे खे मेने एमोरीहोन का हाथ से अपनी तलवार अरु धनुष का ताकत से ली लियो हइ.”

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.