उत्पत्ति 27

इसहाक को याकुब खे आशिर्वाद देनो

1जब इसहाक बूड्डो हुय गयो, अरु ओकी आखहोन असी धुंधली पडी गयं कि ओ खे सूझतो नी थो, तब ओने अपना बडो बेटो एसाव खे बुलैइ खे बोल्यो, “हे मरा बेटा,” ओने बोल्यो, “का आज्ञा.” 2ओने बोल्यो, “सुन, मी तो बूड्डो हुय गयो हइ, अरु नी जाननु कि मरो मरन को दिन कब हुये. 3येकालिये अब तू अपना तीर अरु कमान ली खे मैदान मे जा, अरु मरा लिये शिकार मारी खे ली आ. 4तब मरी रुचि का अनुसार स्वादिष्ट खानो बनैय खे मरा पास ली आनु, कि मी ओ खे खैइ खे मरना से पैयले तो खे जी भरी खे आशिर्वाद दीयु.” 5तब एसाव बात करन खे मैदान मे गयो, जब इसहाक एसाव से या बात बोली र्‍हो थो, तब रिबका सुनी र्‍हि थी.

6येकालिये ओने अपना बेटा याकुब से बोल्यो, “सुन, मेने तरा बाप खे तरो भइ एसाव से यो बोलते सुन्यो हइ, 7‘तू मरा लिये शिकार करी खे ओको स्वादिष्ट खानो बना, कि मी ओ खे खैइ खे तो खे यहोवा का आगे मरना से पैयले आशिर्वाद दियु.’ 8येकालिए अब, हे मरा बेटा, मरी सुन, अरु या आज्ञा मान, 9कि बकरीहोन का पास जैय खे बकरिहोन का दो अच्छा-अच्छा बच्चा ली आ; अरु मी तरा बाप का लिये ओका रुची का अनुसार ओको मास खे स्वादिष्ट खानो बनायु. 10तब तू ओ खे अपना बाप का ली जानु, कि उ ओ खे खैइ खे मरना से पैयले तो खे आशिर्वाद दिये.” 11याकुब ने अपनी माय रिबका से बोल्यो, “सुन, मरा भइ एसाव का पुरा आंग पर कम्बल जसा बाल हइ, अरु मी रोमहीन इन्सान आय. 12कदाचित् मरो बाप मे खे छि लिये, ते मी ओका नजर मे ढोंगी ठैइर्यु; अरु आशिर्वाद का बदला श्राप ही कमायु.” 13ओकी माय ने ओकासे बोल्यो, “हे मरा, बेटा, श्राप तरा पर नी मरा पर पड्ये, तू फक्त मरी सुन, अरु जैय खे वे बच्चा मरा पास ली आ.” 14तब याकुब जैय खे बकरी का बच्चाहोन खे अपनी माय का पास लि खे आयो, अरु माय ने ओका बाप का रुचि का अनुसार स्वादिष्ट खानो बनैय दियो. 15तब रिबका ने अपना बडा बेटो एसाव खे सुन्दर कपडा, जो ओका पास घर मे था, लि खे अपना छोटा बेटा याकुब खे पेनैइ दिया. 16अरु बकरीहोन का बच्चा की चामडाहोन खे ओका हाथहोन मे अरु ओका गाल मे लिप खे दियो. 17अरु उ स्वादिष्ट खानो अरु अपनी बनय हुय रोटी भी अपना बेटा याकुब का हाथ मे दि दी. 18तब उ अपना बाप का पास गयो, अरु बोल्यो, “हे मरा बाप,” ओने बोल्यो, “का बात हइ? हे मरा बेटा, तू कौन आय?” 19याकुब ने अपना बाप से बोल्यो, “मी तरो बडो बेटो आय, मेने तरी आज्ञा का अनुसार कर्यो हइ; येकालिये उट अरु बठी खे मरो शिकार को माँस मे से खा, कि तरा से मे खे आशिर्वाद दि सक्ये.” 20इसहाक ने अपना बेटा से बोल्यो, “हे मरा बेटा, का कारण हइ कि उ तो खे इत्ता झल्दी मिली गयो?” ओने यो जवाब दियो, “तरा परमेश्वर यहोवा ने ओ खे मरा सामने करी दियो.” 21फिर इसहाक ने याकुब से बोल्यो, “हे मरा बेटा, पास आ, मी तो खे टोटली खे जान्यु, कि तू सचमुच मरो बेटो एसाव आय या नी.” 22तब याकुब अपना बाप इसहाक का पास गयो, अरु ओने ओ खे टोटली खे बोल्यो, “बोल याकुब को जसो हइ, पर हाथ एसाव ही का जसा जानी पडस हइ.” 23अरु ओने ओ खे नी पैच्छान, क्युकि ओका हाथ ओका भइ का जसा रोंआर थो आखरी ओने ओ खे आशिर्वाद दियो. 24अरु ओने पूछ्यो, “का तू सच्ची मरो बेटो एसाव आय?” ओने बोल्यो, “हाँ मी आय.” 25तब ओने बोल्यो, “खान खे मरा पास ली आ, कि मी, अपना बेटा को शिकार को माँस मे से खैइ खे, तरा ही से आशिर्वाद दियु,” तब उ ओ खे ओका पास ली आयो, अरु ओने खायो; अरु उ ओका पास दाखमधु भी लायो, अरु ओने पियो. 26तब ओका बाप इसहाक ने ओकासे बोल्यो, “हे मरा बेटा पास अय खे मे खे चूम.” 27ओने पास जैय खे ओ खे चूम्यो, अरु ओने ओका कपडा को बास पैइ खे ओ खे उ आशिर्वाद दियो,

“देख, मरा बेटा की बास जो

असा खेत की जसी हइ जो पर यहोवा

ने आशीष दी हो;

28परमेश्वर तो खे आकाश से ओस,

अरु जमीन की उत्तम से उत्तम पैदा,

अरु भोहुत सा अनाज अरु नयो दाखमधु दिये;

29राज्य-राज्य का इन्सान तरा अधीन हों,

अरु देश-देश का इन्सान तो खे नमस्कार कर्ये;

तू अपना भइहोन को अधिकारी हो,

अरु तरी माय का बेटा तोख नमस्कार कर्ये,

जो तो खे श्राप दें वे खुद ही श्रापित हइ,

अरु जो तो खे आशिर्वाद दिये वे आशीष सक्हे.” 1

आशिर्वाद का लिये एसाव को निवेदन

30जसो ही यो आशिर्वाद इसहाक याकुब खे दि हुया, अरु याकुब अपना बाप इसहाक का सामने से निकल्यो ही थो, कि एसाव शिकार लि खे अय पहुचय. 31तब उ भी स्वादिष्ट खानो बनैय खे अपना बाप का पास लि आयो, अरु ओने बोल्यो, “हे मरा बाप, उठी खे अपना बेटा को शिकार को माँस खा, ताकि मे खे जी से आशिर्वाद दे.” 32ओका बाप इसहाक ने पूछ्यो, “तू कौन आय?” ओने बोल्यो, “मी तरो बडो बेटो आय.” 33तब इसहाक ने भोत थरथर काँपते हुये बोल्यो, “फिर उ कौन थो जो शिकार करी खे मरा पास ली आयो थो, अरु मेने तरा आना से पैयले ले सब मे से कुछ-कुछ खै लियो अरु ओ खे आशिर्वाद दियो? वरन् ओ खे आशीष लगी भी र्‍हिये.” 34अपना बाप की या बात सुनते ही एसाव ने भोत उचो अरु दुख भर्या अवाज से चिल्लैइ खे अपना बाप से बोल्यो, “हे मर बाप, मे खे भी आशिर्वाद दे” 35ओने बोल्यो, “तरो भइ ने तो खे धोको दियो, अरु तरा आशिर्वाद खे लि खे चली गयो.” 36ओने बोल्यो, “का ओको नाम याकुब यथार्थ नी रख्या गयो? ओने मे खे दो बार अडंगा मार्यो, मरो बडा को अधिकार तो ओने ली ही लियो थो; अरु अब देख, ओने मरो आशिर्वाद भी ली लियो हइ,” फिर ओने बोल्यो, “का तोने मरा लिये भी कोय आशिर्वाद नी बचय खे रख्यो हइ?” 37इसहाक ने एसाव खे जवाब दि खे बोल्यो, “सुन, मेने ओ खे तरो अधिकारी ठैरायो, अरु ओका सब भइहोन खे ओका अधीन करी दियो, अरु अनाज अरु नयो दाखमधु दि खे ओ खे बडो कर्यो हइ येकालिये अब, हे मरा बेटा, मि तरा लिये का करु?” 38एसाव ने अपना बाप से बोल्यो, “हे मरा बाप, का तरा मन मे एक ही आशिर्वाद हइ? हे मरा बाप, मे खे भी आशिर्वाद दे,” यो बोलि खे एसाव फूटी-फूटी खे रोन लग्यो.2 39ओका बाप इसहाक ने ओकासे बोल्यो, “सुन, तरो निवास उग्यो जायु जमीन से दूर हो, अरु उपर से आकाश की ओस ओका पर नी पड्ये. 40तू अपनी तलवार का ताकत से जीन्दो र्‍हिये, अरु अपना भइ का अधीन तो हुये; पर जब तू आजादी का लिये लड्ये, तब ओका जूवाड खे अपना कंधा पर से तोडी फेंक्ये.”3

41एसाव ने तो याकुब से अपना बाप खे दियो हुयो आशिर्वाद का कारण बैर रख्यो; अरु ओने सोच्यो, “मरा बाप को अन्तकाल को दिन पास हइ, फिर मी अपना भइ याकुब को खुन कर्यु.” 42जब रिबका खे अपना बडो बेटो एसाव की या बातहोन बतैइ गयं, तब ओने अपना छोटा बेटा याकुब खे बुलैइ खे बोल्यो, “सुन, तरो भइ एसाव तरो खुन करन का लिये अपना मन मे धीरज रख्यो हुयो हइ 43येकालिये अब, हे मरा बेटा, मरी सुन, अरु हारान खे मरो भइ लाबान का पास चली जा; 44अरु थोडा दिन तक, अर्थात् जब तक तरा भइ कि घुस्सा नी उतरे तब तक ओका ही पास ऱ्हेनु. 45फिर जब तरा भइ को घुस्सो तरा पर से उतर्ये, अरु जो काम ओकासे कर्यो हइ ओ खे उ भुली जाये; तब मी तो खे व्हा से बुलाओ भेज्यु असो क्यु हुये कि एक ही दिन मे खे तुम दोय से वंचित होनु पड्ये?”

याकुब को लाबान का पास जानु

46फिर रिबका ने इसहाक से बोल्यो, “हित्ती पोर्यइहोन का कारण मी अपना जान से घिन करुस हइ; येकालिये अगर असी हित्ती पोर्यइहोन मे से, जसी या देश की पोर्यइहोन हइ, याकुब भी एक खे भ्याव करी ले, तो मरा जीवन मे का लाभ हुये?” मी मरी जायु.