यहेज्केल 48

गोतहोन मे जमीन बाटनो

1गोतहोन को भाग यो हइ : उत्तर सीमा से लग्यो हुयो हेतलोन का रस्ता का पास से हमात की घाट तक, अरु दमिश्क की सीमा का पास हसरेनान से उत्तर का तरफ हमात का पास तक एक भाग दान हुये; अरु ओकी पुर्वी अरु पश्चिमी सीमा भी हुये. 2दान की सीमा से लग्यो हुयो पुर्व से पश्चिम तक आशेर को एक भाग हुये. 3आशेर की सीमा से लग्यो हुयो, पुर्व से पश्चिम तक नप्ताली को एक भाग हुये. 4नप्ताली की सीमा से लग्यो हुयो पुर्व से पश्चिम तक मनश्शे को एक भाग. 5मनश्शे की सीमा से लग्यो हुयो पुर्व से पश्चिम तक एप्रैम को एक भाग हुये. 6एप्रैम की सीमा से लग्यो हुयो पुर्व से पश्चिम तक रुबेन को एक भाग हुये. 7रुबेन की सीमा से लग्यो हुयो, पुर्व से पश्चिम तक यहुदा को एक भाग हुये.

देश का बिच मे जमीन को विशेष भाग

8यहुदा की सीमा से लग्यो हुयो पुर्व से पश्चिम तक उ अर्पण कर्यो हुयो भाग हुये, जेका से तुमखे अर्पण करनु पड्ये, उ पच्चीस हजार बास चौडो अरु पुर्व से पश्चिम तक कोइ एक गोत का भाग का जसो लम्बो हुये, अरु ओका बिच मे पवित्र जगाह हुये. 9जो भाग तुमखे यहोवा खेस अर्पण करनो पड्ये, ओकी लम्बइ पच्चीस हजार बास अरु चौडाइ दस हजार बास की हुये. 10यो अर्पण कर्यो हुयो भाग पवित्र भाग याजकहोन खे मिल्ये; उ उत्तर का तरफ पच्चीस हजार बास लम्बो, पश्चिम का तरफ दस हजार बास चौडो, पुर्व तरफ दस हजार बास चौडो अरु दक्षिण का तरफ पच्चीस हजार बास लम्बो हुये; अरु ओका बीचोबीच यहोवा की पवित्र जगाह हुये. 11क्ष यो विशेष पवित्र भाग सादोक का बच्चा खे वे याजकहोन को हुये जो मरी आज्ञाहोन को पालन करतो रिये, अरु इस्राएलिहोन को भटकी जान का टेम लेविहोन का समान नी भटक्या था. 12येकालिये देश को अर्पण कर्यो हुयो भाग मे से यो उनका लिये अर्पण कर्यो हुयो भाग मनजे परम पवित्र देश ठहर्ये; अरु लेविहोन की सीमा से लग्यो रिये. 13याजकहोन की सीमा से लग्यो हुयो लेविहोन को भाग हुये, उ पच्चीस हजार बास लम्बो अरु दस हजार बास चौडो हुये. सारी लम्बाइ पच्चीस हजार बास की अरु चौडाइ दस हजार बास की हुये. 14वे ओमे से नी तो कुछ बेच्ये, नी दुसरी जमीन से बदल्ये; अरु नी जमीन की पहली उपज अरु कोइ खे दी जाये. क्योकि वा यहोवा का लिये पवित्र हइ. 15चौडइ का पच्चीस हजार बास का सामने जो पाच हजार बच्यो रिये, उ नगर अरु बस्ती अरु चराइ का लिये साधारण भाग हुये; अरु नगर ओका बिच मे हुये. 16नगर को यो माप हुये, मनजे उत्तर, दक्षिण, पुर्व अरु पश्चिम का तरफ साढे चार चार हजार हाथ. 17नगर का पास उत्तर,दक्षिण, पुर्व, पश्चिम मे चराइहोन हुये. जो ढाइ सौ बास चौडी हुये. 18अर्पण कर्यो हुयो पवित्र भाग का पास कि लम्बइ मे से जो कुछ बचे, मनजे पुर्व अरु पश्चिम दोइ तरफ दस दस हजार बास जो अर्पण कर्यो हुयो भाग का पास हुये, ओकी उपज नगर मे मेहनत करनवाला का खाना का लिये हुये. 19इस्राएल का सब गोतहोन मे से जो नगर मे मेहनत कर्ये, वे ओकी खेती कर्यो कर. 20सब अर्पण कर्यो हुयो भाग पच्चीस हजार बास लम्बो अरु पच्चीस हजार बास चौडो हुये; तुमखे चौकोर पवित्र भाग अर्पण करनु हुये जेमे नगर कि विशेष जमीन हुये. 21“जो भाग रि जाये, वा प्रधान खे मिल्ये. पवित्र अर्पण कर्यो हुयो भाग को, अरु नगर की विशेष जमीन का दोइ तरफ मनजे उनको पुर्व अरु पश्चिम का तरफ को पच्चीस हजार बास की चौडइ का पास, जो अरु गोतहोन को भागहोन का पास रिये, उ प्रधान खे मिल्ये अर्पण कर्यो हुयो पवित्र भाग अरु भवन को पवित्र जगाह उनका बिच मे हुये. 22जो प्रधान को भाग हुये, उ लेविहोन का बिच अरु नगरहोन की विशेष जमीन हुये. प्रधान को भाग यहुदा अरु बिन्यामिन की सीमा का बीच मे हुये.

अन्य गोतहोन को भाग

23“जादा गोतहोन को भाग यो प्रकार हुये : पुर्व से पश्चिम तक बिन्यामिन को एक भाग हुये. 24बिन्यामिन की सीमा से लग्यो हुयो पुर्व से पश्चिम तक शिमोन को एक भाग. 25शिमोन की सीमा से लग्यो हुयो पुर्व से पश्चिम तक इस्साकार को एक भाग. 26इस्साकार की सीमा से लग्यो हुयो पुर्व से पश्चिम तक जबूलून को एक भाग. 27जबूलून की सीमा से लग्यो हुयो पुर्व से पश्चिम तक गाद को एक भाग. 28अरु गाद की सीमा का पास दक्षिण का तरफ की सीमा तामार से लेकर कादेश को मरीबोत नामक झरणा, अरु मिस्र को नालो अरु महासागर तक पहुच्ये. 29जो देश तुमखे इस्राएल का गोतहोन खे बाटनो हुये उ यो हइ, अरु उनको भाग भी यो ही हइ, परमेश्वर यहोवा की या वाणी हइ.

यरुशलेम को दरवाजो

30“नगर से निकलन का लिये यो दरवाजो हुये, मनजे उत्तर का तरफ जेकी लम्बइ साढे चार हजार बास की हुये. 31ओमे तीन फाटक हुये; मनजे एक रुबेन को फाटक, एक यहुदा को फाटक, अरु एक लेवी को फाटक हुये; क्योकि नगर का फाटकहोन को नाम इस्राएल का गोतहोन को नाम पर रखनु हुये. 32पुर्व का तरफ साढे चार हजार बास लम्बी हुये; अरु ओमे तीन फाटक हुये; मनजे एक यूसुफ को फाटक, एक बिन्यामिन को फाटक, अरु एक दान को फाटक हुये. 33दक्षिण का तरफ सीमा साढे चार हजार बास लम्बी हुये, अरु ओमे तीन फाटक हुये, अरु ओमे तीन फाटक हुये; मनजे एक शिमोन की फाटक, एक इस्साकार को फाटक, अरु एक जबूलून को फाटक हुये; 34अरु पश्चिम का तरफ सीमा साढे चार हजार बास लम्बी हुये, अरु ओमे तीन फाटक हुये; मनजे एक गाद को फाटक, एक आशेर को फाटक अरु एक नप्ताली को फाटक हुये.1 35नगर का चारी तरफ को घेरो अठराह हजार बास को हुये, अरु उ दिन से आगे का नगर को नाम ‘यहोवा शाम्मा2’ रिये.”