Skip to content
BibleKenya

Gowlan Bible

यहेज्केल 13

झुठा इन्सान भविष्यवक्ता का विरुध्द मे भविष्यवाणी

यहोवा को यो वचन मरा पास आयो. “हे इन्सान का बच्चा, इस्राएल का जो भविष्यवक्ता अपना ही मन से भविष्यवाणी करस हइ, उनका विरुध्द भविष्यवाणी करीखे तु बोल, यहोवा को वचन सुनो! प्रभु यहोवा यो बोलस हइ: धिक्कार हइ वे मुर्ख भविष्यवक्ताहोन पर, जो अपना ही मन का अनुसार चलस हइ, अरु उन्हे कुछ नी देख्यो. हे इस्राएल, तुम्हारा भविष्यवक्ता खंडरहोन का कोल्या का जसा हइ. तुम दुनियाहोन का लिये दिवाल का दरवाजाहोन खे सुधारन का लिये उपर नी गया हुये ताकी यहोवा का दिन युध्द मे यो मजबुत बन्यो र्हिये. उनको दर्शन झुटो अरु उनकी भविष्यवाणी झुठी हइ यानिकी प्रभु ने उनके नी भेज्यो हइ फिर भी बोलस कि यहोवा बोलस हइ अरु आशा करस हइ कि उनका वचनहोन के पुरो करे. का तुम्हारो दर्शन झुठो नी हइ, अरु का तुम झुठमुठ को भविष्य नी बोले? तुम बोलस हइ, ‘यहोवा की या वाणी हइ;’ परन्तु मे ने कुछ नी बोल्यो.” येकालिये प्रभु यहोवा को यो बोलनु हइ: तुम्हारी झुठी बातहोन अरु तुम्हारा झुठा दर्शनहोन का कारण, मी तुम्हारा विरुध्द हइ, प्रभु यहोवा की या वाणी हइ. म्हरो हाथ वे भविष्यवक्ताहोन नामको विरुध्द उठ्ये, जो झुठो दर्शन देखता सथा भविष्य की झुठी बात बतास हइ, वे मरा दुनियाहोन मे शामील नी हुये या इस्राएल का नामावली मे उनको नाम लिख्यो नी जानको, अरु न ही वे इस्राएल देश जइ पाये. तब जान्ये की मी प्रभु यहोवा आय. क्योकी उन्हे मरा दुनियाहोन खे यो बोली खे बहेकास हइ, “शांती हइ,” जब की कुछ भी शांती नी हइ, अरु फिर जब एक कमजोर दिवाल बनी जास हइ, ते वे ओमे चुन्नो पोती देस हइ. वे कच्ची पोतय करनआली से बोल कि या दिवाल गिरी जाये. मुसरधार बारीस हुये, अरु मी गार भी गिरायु, जो दिवाल खे गिरइ दिये, अरु भयंकर हवाधुंद चल्ये. जब दिवाल गिरी जाये, ते का दुनियाहोन तुम्हारा से यो नी पुछन का, “तुम जो चुन्नो पोत्यो थो, उ कहा गयो?” येकालिये प्रभु यहोवा तुमखे का बोलस हइ : मी अपना क्रोध मे भयंकर हवाधुंद लायु, अरु अपना क्रोध मे भयंकर विनाश का साथ गार अरु मुसरधार बारिस करायु. मी वा दिवाल खे तोडी डाल्यु, जेका पर तुमने चुन्नो पोत्यो हइ अरु येखे मठ्ठी मे मिलइ दियु ताकी येकी नीव खाली पडी रिये. जब वा गिर्ये, ते तुम भी ओका साथ नष्ट हुइ जाये; अरु तब तुम जान्ये की मी यहोवा आय. यो प्रकार म्हरो क्रोध वा दिवाल पर अरु जेने ओका पर चुनो पोत्यो उनका पर भडक्ये, जिन्हे ओका पर चुन्नो पोत्यो थो. तब मी तुम्हारा से बोल्यु, दिवाल नष्ट हुइ गइ अरु जिन्हे ओका पर चुन्नो पोत्यो ते वे भी नष्ट हुइ गया. अर्थात इस्राएल का वे भविष्यवक्ता जो यरुशलेम का विषय मे भविष्यवाणी करस अरु ओकी शांती को दर्शन देखस हइ, जबकि वाहा कोइ भी प्रकार कि शांति नी थी, प्रभु यहोवा कि या वाणी हइ.

झुटी बइहोन को दर्शन

“हे इन्सान का बच्चा, अब तुम अपनो मुडो अपना दुनियाहोन कि वे बेटिहोन का विरुध्द खोल, जो अपना ही मन से भविष्यवाणी करस हइ. तुम ओका विरुध्द भविष्यवाणी कर.” अरु बोल, प्रभु यहोवा को यो बोलस हइ: धिक्कार हइ वे बइहोन पर, जो अपना हाथ पर ताबीज बाधस हइ अरु दुनियाहोन खे फसान का उद्देश से अपना माथा खे झाकन का लिये कपडा बनास हइ, का तुम मरा दुनियाहोन की जान खथरा मे डाल्ये अरु अपनो खुद की जान बचइ लिये? तुमने मुठी भर जौ अरु रोटी का कुछ टुकडा का लिये मरा दुनियाहोन का बिच मेखे अपवित्र कर्यो हइ, मरा वे लोग जो झुठी बात बोलस हइ, उनका से झुठ बात करीखे तुमने वे दुनियाहोन खे मारी डाल्या हइ जिनखे जिन्दा रेहनु थो अरु तुमने उनखे छोडी दिया हइ जिनखे जिन्दा नी रेहनु थो. “येकालिये प्रभु यहोवा को यो कहनो हइ: मी तुम्हारा वे तावीजहोन का विरुध्द हइ जेमे तुम दुनियाहोन खे चिडी का जसा फसास हइ; मी तुम्हारा हाथ की तावीजहोन खे तोडी दियु; मी वे दुनियाहोन खे आजाद करी दियु, जिनखे तुम चिडी का जसा फसास हइ. मी तुम्हारो घुंघट खे फाडी डाल्यु अरु अपना दुनियाहोन खे तुम्हारा हाथ से बचायु, अरु वे फिर तुम्हारा बस मे नी रेनका, तब तुम जान्ये की मी यहोवा आय. क्योकी तुम ने न्यायी के अपना झुठ से दु:खी कऱ्यो जब कि मेने उनके कोउय दु:ख नी दियो अरु तोने दुष्ट के हिम्मत दि कि वे अपनी बुरी रस्ता से नी फिऱ्या येकालिये हिम्मत दी. येकालिये अब तुम नी ते झुठा दर्शन देखी सक्ये अरु नी ते भविष्य की झुठी बातहोन बोली सक्ये, मी अपना दुनियाहोन खे तुम्हारा हाथ से बचायु, अरु तब तुम जान्ये मी यहोवा आय.”

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.