Skip to content
BibleKenya

Gowlan Bible

ओमोस 4

“हे सामरी राज कि धनवान बइहोन1, हे सामरिया टेकडी कि बइहोन योही वचन सुन, तुम जो कंगालहोन पर अत्याचार करस, अरू गरीबहोन के कुचली डालस हइ, अरू अपना अदमी खे बोलस हइ, ‘ला, ताकि हम पिह्या!’ परमेश्वर यहोवा अपनी पवित्रता कि कसम खय खे बोलस हइ, देख, तूम पर असो दिन आनवालो हइ, कि तूम काटा से, अरू तुमारा बच्चा मछ्छी पकडन का गल से खीची ली जाये. तुम मेसे हर एक दिवारहोन कि दरार मे से हुइखे सीदी निकली जाये अरू हर्म्मोन टेकडीहोन मे डाली जाये,” यहोवा का या वाणी हइ.

इस्राएल सुधरना मे असफल

“बेतेल मे अय खे गुना कर, अरू गिलगाल मे अय खे बहुत सा गुना कर; अपनो चडानो फजर खे, अरू अपनो दशमांश हर तीसरा दिन ली आया कर; धन्यवाद भेट खमीर मिलयखे चडा, अरू अपना स्वेच्छाभेटहोन कि चर्चा चलयखे उनको प्रचार कर; क्योंकि हे इस्राएलीहोन, असो करनो तू भास हइ,” परमेश्वर यहोवा कि या वाणी हइ.

“मे ने तुमारा सब नगरहोन मे अकाल भेज्यो हइ, अरू तुमारा सब जगाहोन मे रोटी कि कमी करी हइ, तेभी तूम मरा तरप फिरी खे नी आया,” यहोवा कि या वाणी हइ.

“जब कटना का तीन महीनो ऱ्ही गया, तब मे ने तुमारा लिये पाणी नी गिरायो; मे ने एक नगर मे पानी गिरय खे दुसरा मे नी गिरायो; एक खेत मे पानी गिऱ्यो, अरू दुसरो खेत जेमे नी गिऱ्यो, उ सुखी गो. येकालिये दुनीया नगरहोन मे पानी पीन का लिये माऱ्या माऱ्या फिरता हुया, तेभी वे मगम नी हुया; तेभी तूम मरा तरप नी फिऱ्या,” यहोवा कि या वाणी हइ.

“मे ने तूम खे लुह अरू गेरुई किडा से माऱ्यो हइ; अरू जब तुम्हारी वाटिकाहोन अरू दाख कि बारी होन, अरू अंजीर अरू जैतून का झाड बहुत हुइ गा, तब टोटरहोन ने उनखे खय लियो; तेभी तूम मरा तरप फिरी खे नी आया,” यहोवा कि या वाणी हइ.

“मे ने तुम्हारा बीच मे मिस्र देस का जसी बडी बेमारी फैली; मे ने तुम्हारा घोडाहोन खे छुडयखे तुम्हारा जुवानहोन खे तलवार से मारी डाल्यो; अरू तुम्हारो छावनी को बुरोयगधंयरो तुम्हारा पास पहुचायो; तेभी तूम मरा तरप फिरी खे नी आया,” यहोवा कि या वाणी हइ.

“मे ने तूम मे से कोय एक खे असो उलटय दियो, जसो परमेश्वर ने सदोम अरू आमोरा खे उलटय दियो थो,2 अरू तूम अंगार से निकाली हुइ लकडी का जसा ठहऱ्या; तेभी तुम मरा तरप फिरी खे नी आया,” यहोवा कि या वाणी हइ.

“यो कारण, हे इस्राएल, मी तरा से असो ही कऱ्यु, अरू येकालिये कि मी तरा मे यो काम करना पर हइ, हे इस्राएल, अपना परमेश्वर का सामने आन का लिये तैयार हुइ जा!”

देख, टेकडाहोन खे बनानआलो अरू हवा खे बनानआलो, अरू इन्सान खे ओको मन का बिचार बतानआला अरू फजर खे अंधारो करनआला, अरू जो पृथ्वी का उची जगाहोन पर चलनआलो हइ, ओको ही नाम सेनाहोन को परमेश्वर यहोवा हइ!

Source notes (2)
  1. Footnote हे बाशान कि गायो
  2. Cross-reference निर्गमन 19:24

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.