फिलीपियो 2

मसीहा की दीनता अरु महानता

1आखरी अगर मसीह मे कुछ शांती, अरु प्रेम से सांत्वन अरु आत्मा को हिस्सेदार, अरु कुछ करुणा अरु दया हइ. 2ते मरी या खुशी पूरी करणू कि एक मन र्हेनु, अरु एक ही प्रेम एक ही चित्त, अरु एक ही मन सा रखनु. 3स्वार्थी या झुठी बडइ का लिये कुछ नी करणू, पर दीनता से एक दूसरा खे अपना से अच्छो समझनु, 4हर एक अपना ही हितका नी, क्युकी दूसराहोन का हित की भी चिन्ता करणू. 5जसो मसीह यीशु को स्वभाव थो वसो ही तुम्हरो भी स्वभाव होनु.

6ओका पास हमेशा परमेश्वर को रुप थो, जो अपना रुप मे यद्पी परमेश्वर को स्वरुप थो,

ओका समान र्‍हेनु लाभ हइ लौलिन असो ओने मान्यो नी.

7क्युकी अपना आपखे असो शून्य करी दियो,

अरु सेवक को स्वरुप धारन कर्यो.

8अरु इन्सान का रुप मे प्रगट हुइ, अपना आप खे दीन कर्यो,

अरु ह्या तक आज्ञाकारी र्‍हियु कि क्रुस कि मृत्यु भी सइ लियो.

9यो करण परमेश्वर ने ओका उचो से उची जगा पर से उठायो,

अरु ओखे उ नाम दियो जो सब नाम होन मे उचो हइ.

10कि जे स्वर्ग मे अरु पृथ्वी पर अरु पृथ्वी का नीचे हइ,

वे सब यीशु मसीह का नाम पर घुटना टेकै.

11अरु परमेश्वर बाप कि महिमा,

लिये हर एक जीभ अंगीकार कार करी ले कि यीशु मसीह ही प्रभु हइ.

जगत मे ज्योति, समान चमकनु

12येका लिये हे मरा प्रिय, जो प्रकार तुम सदा आज्ञा मानते आया हइ, ओसो ही अब भी नी फक्त मरा साथ र्हेता हुये पर विशेष करी खे अब मरा दूर र्‍हेना पर भी डरस अरु कापते हुये अपना अपना उध्दार को कार्य पुरो करता जानु. 13क्युकि परमेश्वर ही हइ जेने अपनो प्रेम को काम खे पुरो करण का लिये बिचार डाल्यो हइ ओका जसो, बल भी देस हइ. 14सब काम बिना कुरकुर अरु बिना झगडा को किर्या करणू. 15ताकि तुम नीर्दोष अरु भोला हुइ, तेडा अरु हटेला इन्सानहोन का बीच परमेश्वर को नीष्कलंक सन्तान बन्या र्‍हेनू, जिनका बीच मे तुम जिवन को वचन लियो हुयो संसार मे जलतो दियाहोन का समान दिख्ये देस हइ. 16कि मसीह का दिन मेखे घमण्ड करण को कारन हुये कि नी मरो दौडनु अरु नी मरी मेहनत करणू बेकार हुयो.

17अगर मेखे तुम्हारो विश्वास रुपी बलिदान अरु सेवा का साथ अपना खुन भी बहानू पड्ये का तेभी मी खुश हइ अरु तुम सब का साथ खुशी करस हइ. 18वसो ही तुम भी खुश होनु अरु मरा साथ खुशी करणु.

ती तीमुथियुस अरु इपफ्रुदीतुस

19मेखे प्रभु यीशु मसीह मे आस हइ कि मी तीमुथियुस खे तुम्हारा पास जल्दी भेजू, ताकि तुम्हारी दशा सुनी खे मेखे दिलासो मील्ये 20क्युकि मरा पास असो प्रभाव का कोय नी जो शुध्द मन से तुम्हारी चिन्ता कर्हे. 21क्युकि सब अपना स्वार्थी की खोज मे र्हेस हइ, नी कि यीशु मसीह कि. 22पर ओखे तो तुम ने परख्यो अरु जानी भी लियो हइ कि जसो बेटा का साथ करस हइ, वसो ही ओने सुसमाचार खे फैलाना मे मरा साथ मेहनत कर्यो. 23येका लिये मेखे आस हइ कि जोही मेखे जान लिये कि मरी का हालत हुये खे ते ही मी ओखे जल्दी भेजी दियु. 24अरु मेखे प्रभु मे भरोसो हइ कि मी तुम भी जल्दी आह्यु.

25पर मे ने इपफ्रुदीतुस खे जो मरो मसीह भैइ अरु सहकर्मी अरु संगी योध्दो अरु तुम्हारो जासुस अरु जरुरी बातहोन मे मरी सेवा टहल करणआला हइ, तुम्हारा पास भेझनो जरुरी समझ्यो. 26क्युकि ओको मन तुम सब मे लग्यो हुयो थो, यो करण उ व्याकुल र्‍हेतो थो क्युकि तुम ने ओकी बीमारी को हाल सुन्यो थो. 27नीश्चय ही उ बीमार ते हुइ गयो थो ह्या तक कि मरना पर थो, पन परमेश्वर ने ओ पर दया की, अरु फक्त ओ ही पर नी पर मरा पर भी कि मेखे शोक पर शोक नी हुये. 28येका लिये मे ने ओखे भेजन को अरु भी कोशीस कर्यो कि तुम ओकासे फिर मेला कात करी, खुश हुइ जानू अरु मरो भी शोक घटी जाए. 29येका लिये तुम प्रभु खे ओकासे भोत खुशी का सात मेला कात करणो, अरु असा को सम्मान किर्या करणू. 30क्युकि उ मसीह काम का लिये अपनो जान पर तकलीप उठैखे मरन का पास अय गो थो ताकि जो कमी तुम्हारा तरफ से मरी सेवा मे हुइ ओखे पुरो कर्ये.