लूका 7

यीशु एक रोमन अधी,र खे अच्छो करस

(मत्ती 8:5-13)

1जब उ दुन्या से या सब बात बोली चुक्यो. ते कफरनहूम मे आयो. 2व्हा कोय सुबेदार को एक सेवक जो वोको प्रेम मे थो. बीमारी से मरना पर थो. 3वोने यीशु की बातचित सुनीखे यहूदीयाहोन का कोय बापदादा इन्सान खे उन से ह्या प्रार्थना करण खे वोका पास भेज्यो. कि अयखे मरा सेवक खे अच्छो कर. 4वे यीशु का पास आया ओका से बडी प्रार्थना करीखे बोलन लग्यो. कि वु यो योग्य हइ. कि तू वोका लिये ह्या कर्हे. 5क्‍युकि वु हमारो राष्ट्र से प्रेम रखस हइ. अरु वोनेय हमारी आराधनालय खे बनयस हइ.

6यीशु ओका सात सात चल पर जब वु घर से दूर नी थो. ते सेनापति ने वोका पास कोय दोस्त का वजेसे बोलन भेज्यो. कि हे प्रभु दुख मत उठा क्‍युकि मी यो योग्य नी. कि तू मरी छाय का तल्ले आह्ये.

7यो करण मेने अपना आप खे यो योग्य भी नी समझ्यो कि तरा पास अवु. पर वचन मे बोली देस ते मरो सेवक अच्छो हुय जाह्ये. 8मी भी दुसरा को अधिकार इन्सान आय. अरु सिपय मरा हात मे हइ. अरु जब एक खे बोल्योस. जा. ते व्हा जास हइ. अरु दूसरा से बोलस कि आका तु आस हइ. अरु अपनो कोय सेवक खे कि यो कर. ते व्हा वोखे करस.

9यो सुनीखे यीशु ने अचम कर्यो. अरु वोने मेडो पलटय खे वु गर्दी से जो वोका पीछे अय री थी बोल्यो. मी तुम से बोलुस. कि मेने इस्राएल मे भी असो विश्वास नी पायो.

10अरु भेज्यो हुयो दुन्या ने घर पलटी खे. वु सेवक खे अच्छो पायो.

विधवा, बेटा को जिवन दान

11थोडा दिन का बाद व्हा नाइन नाम को एक गाव खे गयो. अरु वोको सेवक अरु बडी गर्दी वोका सात जय री थी. 12तब व्हा गाव कि फाटक का पास पहुचो. ते देख. दुन्या एक मुडदा खे बाहेर लिये जय रो थो. जो अपनी माय को येकलो बेटो थो. अरु वा विदवा थी अरु नगर का खुप दुन्या वोका सात थी. 13वोखे देखी खे परमेश्वर खे दया अयी. अरु वो ने बोल्यो. मत रोय. 14जब वो ने पास अयखे. अर्थी खे पकड्यो. अरु उठानआला रुखी गया. जब वो ने बोल्यो. हे जवान. मी तरा से बोल्युस. उट. 15जब वु मुडदा उठी खे बठ्यो. अरु बोलन लग्यो अरु वो ने वोखे वो की माय खे दि दियो.

16येमे से सब पर डर छय गयो. अरु वु परमेश्वर की महिमा करीखे बोलन लग्यो कि हमारा बीच मे एक बडो भविष्यव्दक्ता उठ्यो हइ. अरु परमेश्वर ने अपना दुन्या पर कृपा दुष्‍टि करी हइ.

17अरु वोका बारेमे मे यो बात सब यहूदीया अरु आस पास का सब देस मे फैली गय.

बपतिस्मा देने वाला यहून्ना कि खबर देन आलो

(मत्ती 11:2-19)

18अरु यहून्ना खे वोका सेवक ने या सब बात कि खबर दि. 19जब यूहन्‍ना ने अपना सेवक मे से दो खे बुलखे परमेश्वर का पास यो पुछन का लिये भेज्यो. आनवालो तू मे हइ. या हम कोय अरु दूसरा की रस्ता देखा?

20वुन ने वोका पास अयखे बोल्यो. यहून्ना बपतिस्मा देनआला ने हम के तरा पास यो पुछन खे भेज्यो हइ. कि का आनवालो तू ही हइ. या हम दूसरा की रस्ता देखा?

21वाच टेम वो ने भोत बीमार. अरु पीडा. अरु बुरीआत्‍मा से छुडायो. अरु भोत सा अन्‍धा खे आख दीया.

22अरु वो ने वोका से बोल्यो. जो कुछ तुम ने देख्यो अरु सुन्योस. जयखे यहून्ना खे बोलीदे. कि अंन्धो देखस. लगडो चली फिरी सकस हइ. कोढी अच्छो कयो जास हइ. अरु गरीब खे सुसमाचार सुनायो जास हइ. 23अरु धन्‍य हइ वु. जो मरा करण ठोकर नी खाय.

24तब यूहन्‍ना खे भेज्यो हुयो दुन्या चली दिया. ते यीशु यहून्ना को बारे मे दुन्या खे बोलन लग्यो. तुम जंगल मेका देखन गया था? हवा से हलाते हुयो सरकण्‍डे खे? 25ते तुम फिर, देखन गया था? नाजूक कपडा पेन्यो हुयो इन्सान खे? देख्यो. जो भडकीला कपडा पेन्यो अरु सुख चैन से र्हेस हइ, वे राजभवन मे र्हेस हइ. 26ते फिर, देखन गयो थो? कोय भविष्यव्दक्ता खे? ह्या. मी तुम से बोलुस. वरन भविष्यव्दक्ता से भी बडा खे. 27यो उ हइ. जोका बारे मे लिख्योस हइ. कि देख मी अपना दूत खे तरा आगे आगे भेजुस जो तरा आगे रस्ता सीधि कर्हे. 28मी तुम खे बोलुस कि जो बयहोन से जन्म्यो हइ. उन मे से यहून्ना से बडो कोय नी पर जो परमेश्वर का राज्य मे छोटो से छोटो हइ. व्हा वोका से भी बडो हइ.

29अरु सब साधारण दुन्या ने सुनीखे अरु चुगी लेनवाला ने भी यहून्ना को बपतिस्मा लिखे परमेश्वर खे सच्छो मानी लियो. 30पर फरीसीयो अरु व्यवस्थापक ने वो खे बपतिस्मा नी लिखे परमेश्वर की मनसा का अपना बारे मे टाली दियो.

31अरु मी यो जगत की दुन्या की उपमा कोय से दिव कि कोय का बराबर हइ? 32वु वे बच्चा का बराबर हइ जो बजार मे बठ्यो हुयो एक दूसरा खे पुकारी खे बोलतो हइ. हम ने तुम्‍हारा लिये बासरी बजय. अरु तुम नी नाच्या. हम ने विलाप कर्यो. अरु तुम नी रोया. 33क्‍युकि यहून्ना बपतिस्मा देनवालो नी रोटी खाते आयो, नी अंगूर को रस पीते आयो, अरु तुम बोलस हय, वो मे बुरीआत्मा हइ. 34इन्सान को बेटो खाते पीते आयो हइ, अरु तुम बोलस हय, देख कावरो अरु दारु कुट्यो इन्सान. चुगी लेनवाला का अरु पापी को दोस्त. 35पर ज्ञान अपना सब बच्चा से सही न्यायी र्ही गयो हइ.

शमौन नामक फरीसी का घर

36फिर कोय फरीसी ने वोका से प्रार्थना करी. कि मरा सात खानो खा. अरु व्हा वो फरीसी का घर मे जयखे खानो खान बठ्यो. 37अरु देख. वु गाव की एक पापी बय यो जानीखे कि व्हा फरीसी का घर मे खानो खान बठ्योस हइ. सगमरमर का वस्तु मे अत्रर लय. 38अरु वोका पाय का पास पीछे खडी हुयखे. रोती हुय वोका पाय खे आसु से भिजान अरु अपना माथा खे बाल से पोछन लगी अरु वोक पाय का बार बार चूम्मो लिखे वु कापर अत्रर को तेल मल्यो. 39यो देखीखे. व्हा फरीसी जेने वोखे बुलायो थो. अपना मन मे सोचन लग्यो. अगर यो भविष्यव्दक्ता होतो ते समजी जातो. कि यो जो वोखे पकडी री हइ. व्हा कोन अरु कसी बय हइ? क्‍युकि व्हा तो पाप नी हइ.

40यो सुनी यीशु ने वोको उत्तर मे बोल्यो. कि हे शमौन मेखे तोरा से कुछ बोलनो हइ

व्हा बोल्यो. हे गुरु बोल.

41कोय साहुकार का दो कर्जदार थो. एक पाच सौव. अरु दूसरो पचास चादी का सिक्का धारतो थो. 42तब कि वोका पास पलटान खे कुछ नी र्हियो. ते वो ने दो खे माफ करी दियो, अरु वो मे से कोन वोका से जादा प्रेम रखेय.

43शमौन ने उत्तर दियो. मरी समज मे व्हा. जेका बडा पैसा माफ करी गयो.

“तुमने बरोबर उत्तर दियो.” मसीह यीशु ने बोल्यो. 44अरु वा बय का तरप फिरीखे वोने शमौन बोल्यो, तू या बय खे देखस हइ? मी तरा घर मे आयो पन तोने मरा पाय धोन, लिये पानी नी दियो. पर ये ने मरा पाय आसु से भिजया. अरु अपना बाल से पोछी दियो. 45तो ने मेखे चूमो नी दियो. पर जब से मी आयोस तब से ये ने मरा पाय का चूमो नी छोड्यो. 46तो ने मरा माथा पर तेल नी मल्यो. पर ये ने मरा पाय पर अत्रर मल्यो हइ. 47येकालिये मी तरा से बोलुस, कि येका पाप जो खुप था, माफ हुया, क्‍युकि ये ने खुप प्रेम कर्यो, पर जोको थोडी माफ हुयोस, व्हा थोडो प्रेम करस हइ.

48अरु वोने बय से बोल्यो, “तरा पाप माफ हुयो.”

49जब जो दुन्या वोका सात खानो खान बठ्यो थो, वे अपना अपना मन मे सोचन लग्या, यो कोन आय जो पाप कि भी माफ करस हइ? 50पर वोने बय से बोल्यो. तरा विश्वास ने तोखे बचय लियो हइ? शांती से जय जा.