प्रेरितहोन 7

स्तिफनुस को भाषाण

1तब महायाजक ने बोल्यो, का या बातहोन सच्ची हइ?

2स्तिफनुस ने बोल्यो हे भैइहोन अरु बापहोन सुन्नु. हमारो बाप अब्राहम हारान मे बसना से पैयले जब मेसोपोटामीया मे थो. तेजमय परमेश्वर ने ओखे दर्शन दियो. 3अरु ओकसे बोल्यो तू अपना देस अरु अपना कुटुम्ब से नीकलीखे उ देश मे जा, जेखे मेने तोखे दिखायो. 4तब उ कसदियहोन का देस से नीकलीखे हारान परमेश्वर ने ओखे वहा से या देस मे लैखे बसायो जेमे अब तुम बसस हय. 5अरु ओखे कुछ मीरास क्युकी पाय रखना भर की भी ओमे जगा नी दी, पन प्रतीज्ञा करी कि मी यो देस तरा अरु बाद तरा वंश का हाथ करी दियु. यध्दपी उ टेम मे ओका कोय बेटो भी नी थो. 6अरु परमेश्वर ने यो बोल्यो, तरी सन्तान खे दुन्या दुसरा देस मे परदेशी हुये, अरु वे उनका सेवक बनाये अरु चार सौ साल तक दुख दिये. 7फिर परमेश्वर ने बोल्यो, जो जात का वे दास हुये ओखे नी दण्ड दियु, अरु ओका बाद वे नीकलीखे या जगा मरी सेवा कर्ये. 8अरु ओने ओकासे खतना कि वाचा बांधी. अरु यो देस मे इसहाक ओकासे पइदा हुयो अरु आठवा दिन ओको खतनो कर्यो गयो. अरु इसहाक से याकूब अरु याकूब से बारा कुलपति पइदा हुयो.

9कुल पतिहोन ने यूसुफ से जलन करीखे ओखे मीस्र देस जानआला होन का हाथ बेच्यो. पन परमेश्वर ओका साथ थो. 10अरु ओखे ओका सब क्लेशहोन से छुड्य खे मीस्र को राजा फिरौन की नजर मे अनुग्रह अरु बुध्दि प्रदान करी, अरु ओने ओखे मीस्र पर अरु अपना पुरा घर पर हाकिम नीयुक्त कर्यो. 11तब मीस्र अरु कनान का पुरा देस मे अकाल पड्यो. जोका से भारी क्लेश हुयो, अरु हमारा बापदादाहोन की अनाज नी मील्यो थो. 12पन याकूब ने यो सुनीखे खे मीस्र मे अनाज हइ, हमारा बापदादाहोन खे पयली बार भेज्यो. 13दूसरी बार यूसुफ ने खुद खे अपना भैइहोन पर प्रगट कर्यो अरु यूसुफ की जाति फिरौन खे मालूम हुइ गइ. 14तब यूसुफ ने अपना बाप याकूब अरु अपना पुरा कुटुम्ब खे जो पचहत्तर इन्सान का मन था, बुलाओ भेज्यो. 15तब याकूब मीस्र मे गयो. अरु वहा उ अरु हमारा बापदादा मरी गया. 16उनको शव शकेम मे पहुच्ये जैखे ओखे मरगट मे रख्यो गयो, जेखे अब्राहम ने चादी दिखे हमोर की सन्तान से मोल लियो थो.

17पन जब वा प्रतीज्ञा का पुरा होन का टेम मे पास आयो जो परमेश्वर ने अब्राहम से करी थी, ते मीस्र मे वे दुन्या बडि गया अरु भोत हुइ गया. 18तब मीस्र मे दूसरो राजो हुयो जो यूसुफ खे नी जानतो थो. 19ओने हमारी जाति से चलाकी करीखे हमारा बापदादाहोन का साथ ह्या तक बुरो व्यवहार कर्यो, कि उनने अपना बच्चाहोन खे फेकी देनो पड्यो कि वे जीन्दा नी र्‍हिया. 20यो टेम मे मूसा पइदा हुयो. उ परमेश्वर की नजर मे भोत ही सुन्दर थो उ तीन महीना तक अपना बाप का घर मे पाल्यो गयो. 21जब फेकी दियो गयो ते फिरौन की बेटी ने ओखे उठैइ लियो, अरु अपनो बेटो करीखे पाल्यो. 22मूसा खे मीस्रिहोन की सब विध्या पडैइ गइ, अरु उ वचन अरु कर्म दो मे सामर्थी थो.

23जब उ चालीस साल को हुयो ते ओका मन मे आयो कि मी अपना इस्त्राएली भैइहोन से भेट कर्यु. 24ओने एक इन्सान पर अन्याय होते देखीखे ओखे बचायो, अरु मीस्रिहोन खे मारी खे सताया हुया खे बदलो लियो. 25ओने सोच्यो कि ओका भैइहोन समझ्ये कि परमेश्वर ओका हाथहोन से उनको उध्दार कर्ये, पन उनने नी समझ्यो. 26दूसरा दिन जब वे आपस मे लडि र्‍हा था ते उ वहा अय नीकल्यो. अरु यो बोलीखे उनने मेल करण का लिये समझायो, हे इन्सानहोन, तुम तो भैइहोन हइ, एक दूसरा पर क्यु अन्याय करस हइ? 27पन जो अपना बाजुआला पर अन्याय करी र्‍हा था, ओने उनसे यो बोलीखे बाजुकरी दियो तोखे कोने हम पर डाॅकटर अरु न्याय रख्यो हइ? 28का जो रीति से तो ने कल मीस्रिहोन खे मारी डाल्यो मेखे भी मारी डालनो चाहस हइ? 29या बात सुनीखे मूसा भाग्यो अरु मीघान देस मे परदेशी हुइखे र्‍हेन लग्यो, अरु वहा ओका दो बेटा पइदा हुया.

30जब पूरा चालीस साल बीती गया ते एक स्वर्गदूत ने सीनै टेकडी का जंगल मे ओखे जलनआली झाडि की अंगार मे दर्शन दियो. 31मूसा यो दर्शन देखीखे अचंभ हुय गो, अरु जब देखन का लिये उ पास गयो, ते प्रभु को यो बोल हुयो. 32मी तरा बापदादाहोन, अब्राहम, इसहाक अरु याकूब को परमेश्वर हइ, तब ते मूसा थर थरानो, ह्या तक कि ओखे देखन को हिम्मत नी र्‍हियो. 33तब प्रभु ने ओकासे बोल्यो, अपना पायहोन से जुती उतारी ले, क्युकि जो जगा तु खडो हइ, वा पवित्र जमीन हइ. 34मे ने सचमुच अपना दुन्या की जो मीस्र मे हय कि दुर्दशा खे देख्यो हइ अरु उनकी आह अरु उनको रोनो सुन्यो हइ. येकालिये उनने छुड्य लिये उतार्यो हइ. अब आ, मी तोखे मीस्र मे भेज्यू

35जो मूसा खे उनने यो बोलीखे नाकार्यो थो तोखे कोइ ने हम पर हाकिम अरु न्याय ठैरायो हइ? ओ खे परमेश्वर ने हाकिम अरु छुडानआलो ठैर्यखे , उ स्वर्गदूत का वजेसे जेने ओखे झाडि मे दर्शन दियो थो, भेज्यो. 36यो इन्सान मीस्र देस अरु लाल समुंदर अरु जंगल मे चालीस साल तक अदभुत काम अरु चिन्ह दिख्य देखीखे उनखे नीकाली लायो. 37यो उ मूसा हइ, जेने इस्त्राएलिहोन से बोल्यो, परमेश्वर तुम्हारा भैइहोन मे से तुम्हारा लिये मरा जसो एक भविष्यव्दक्ता उठाये. 38यो उ हइ, जेने जंगल मे मंडली का बीच उ स्वर्गदूत का साथ सीनै टेकडा पर ओकासे बातहोन करी अरु हमारा बापदादाहोन का साथ थो, ओ खे जिन्दो वचन मील्यो कि हम तक पहुचायो.

39पन हमारा बापदादाहोन ने ओकी माननो नी चायो, क्युकी ओखे हटैखे अपनो मन मीस्र की तरफ फेर्यो. 40अरु हारुन से बोल्यो, हमारा लिये असो देवतो बना जो हमारा आगे-आगे चल्ये. क्युकि यो मूसा जो हम खे मीस्र देस से नीकाली लायो, हम नी जाने ओखे का हुयो? 41उ दिनहोन मे उनने एक बच्चो बनी खे ओकी मुरती का आगे बलि चड्यैइ, अरु अपना हाथहोन का कामहोन मे मगन होन लग्यो. 42आखरी परमेश्वर ने मुडो मोडिखे उनखे छोडी दियो कि आकाश-गन खे पूज्ये, जसो भविष्य-व्दक्ताहोन की किताब मे लिख्यो हइ,

हे इस्राएल का घराना,

का तुम जंसगल मे चालीस साल तक जनवर कि बलि

अरु अनाज बलि मेखे चडाता र्‍हिये.

43तुम मोलेक का झोपडि अरु रिफान देवता का तारा का लिये फिरता था,

मंनजे उन मूर्तीहोन खे जेने तुम ने प्रणाम करण का लिये बनायो थो.

आखरी मे तुमखे बेबीलोन का पार ली जैइ खे बसायु.

44गवा की झोपडि जंगल मे हमारा बापदादाहोन का बीच मे थी, जसो ओने ठैरायो जेने मूसा से बोल्यो. 45ओखे झोपडि खे हमारा बापदादाहोन जुन्नो जमाना से परई खे यहोशू का साथ ह्या लि आया जो टेम मे कि उनने उन गैरयहूदीहोन पर अधिकार पायो जेने परमेश्वर ने हमारा बापदादाहोन का सामने से नीकाली दियो, अरु वा झोपडि दाउद का टेम मे तक र्‍हिये. 46ओका पर परमेश्वर ने अनुग्रह कर्यो. आखरी ओने प्रार्थना करी कि उ याकूब को परमेश्वर का लिये जगा बनानु. 47पन सुलैमान ने ओका लिये घर बनायो.

48पन परम प्रधान हात का बनाया घरहोन मे नी र्‍हे, जसो कि भविष्यव्दक्ता ने बोल्यो

49प्रभु बोलस हइ स्वर्ग मरी राजगद्दी

अरु पृथ्वी मरा पाय का नीच्चे की पीडि हइ,

मरा लिये तुम कोइ प्रकार को घर बनाये?

अरु मरी अराम की कोन सी जगा हुये?

50का ये सब चिजहोन मरा हाथ की बनइ नी?

51हे हठेला, अरु मन अरु कान का खतनारहित दुन्या खे तुम हमेशा पवित्र आत्मा का विरोध करस हइ. जसो तुम्हारा बापदादाहोन करता था, ओसो ही तुम भी करस हइ. 52भविष्य-व्दक्ताहोन मे से कोइ खे तुम्हारा बापदादाहोन ने नी सतायो? उनने उ धर्मी का आगमन का जुन्नो जमाना से सन्देश देनआला खे मारी डाल्यो. अरु अब तुम भी ओखे पकडानआला अरु मारी डालनाला हुये. 53तुम ने स्वर्गदूत का वजेसे ठैराइ हुइ व्यवस्था खे पाइ, पन ओको पालन नी कर्यो.

स्तिफनुस का उपर पथराव

54या बात सुनीखे वे जली गया अरु ओका पर दात पीसन लग्या. 55पन ओने पवित्र आत्मा से परिपूर्ण हुइखे स्वर्ग कि तरफ देख्यो अरु परमेश्वर की महिमा खे अरु यीशु खे परमेश्वर का जवना तरफ खडो हुयो देख्यो . 56देखनु मी स्वर्ग खे खुल्यो हुयो, अरु इन्सान का बेटा खे परमेश्वर का जवना तरफ खडो हुयो देखुस हइ.

57तब उनने बडो बोल से चिल्लय खे कान बन्द करी लिया अरु एक साथ ओ पर झपट्या, 58अरु उ नगर का बाहेर नीकलीखे ओ पर पथराव करण लग्या. गवा ने अपना कपडा शाउल नामको एक जवान का पायहोन का पास उतारी खे रखी दियो. 59वे स्तिफनुस पर पथराव करता र्‍हिया, अरु उ यो बोलीखे प्रार्थना करतो र्‍हिये, “हे प्रभु यीशु मरी आत्मा खे अपनइ ले. 60फिर घुटना टेकिखे उचो बोल से पुकारनु, हे प्रभु यो पाप उन पर मत लगानु.” अरु यो बोलीखे उ सोइ गयो.